التحليل المالي بإستخدام النسب المالية – تحليل القوائم المالية
![التحليل المالي بإستخدام النسب المالية](https://bashmohasb.com/wp-content/uploads/2021/02/closeup-of-hands-using-computer-laptop-with-screen-showing-analysis-data-1024x694.jpg)
التحليل المالي بإستخدام النسب المالية دي من اهم ادوات التحليل المالي، الفكرة ببساطة هي انك بتاخد رقمين من القوائم المالية وتقسمهم علي بعض وممكن يكون الرقمين من نفس القائمة أو قائمتين مختلفين، ومن النادر لما تاخد ارقام من قائمة حقوق الملكية!
فكل رقمين بتقسمهم علي بعض دا بيكون مؤشر بيقيس السيولة أو النشاط أو المديونية أو الربحية.
التحليل المالي بإستخدام النسب المالية
هنتعرف في المقال علي شرح العناصر الجايه:
- ايه هو التحليل المالي باستخدام النسب المالية؟
- القوائم المالية المطلوب تحليلها.
- النسب المالية.
ايه هو التحليل المالي بإستخدام النسب المالية؟
التحليل بإستخدام النسب أو المؤشرات المالية مفيد جدا خاصتا لو هنعمل مقارنة بمستوى الصناعة أو بالشركة التوب في نفس الصناعة وده عشان نعرف احنا فين بالنسبة للشركات التانية، بتدرس العلاقة بين متغيرين أو اكتر من بنود القوائم المالية لنفس الفترة الزمنية بحيث يكون عندنا فهم اعمق للارقام الموجودة في القوائم المالية.
القوائم المالية المطلوب تحليلها
المركز المالي: بنقارن ما بين الاصول و كذلك الخصوم وكذلك حقوق الملكية بتعرفنا ازاي الشركة بتمول اصولها؟
قائمة الدخل: بعرف منها الشركة بتكسب قد ايه؟
قائمة الدخل فيها ايرادات ومصروفات الشركة والفرق ما بينهم يا ارباح يا اما خسائر، والارباح دي يا اما الشركة بتوزعها علي المساهمين أو انها بتعيد استثمارها، وطول ما في سيولة في النقدية كل ما قدرت الشركة انها تتجاوز اي تقلبات اقتصادية في المستقبل عشان كده دايما هتسمع من المستثمرين التقال بيقولو Cash is King.
التدفقات النقدية: بتعرفنا التغييرات اللي حصلت علي رصيد النقدية خلال السنة.
أو ممكن تقول انها بتزودنا بتقرير اكتر تفصيلا عن ازاي الشركة بتحقق ايرادات؟ وبالتالي فالتلاعب فيها بيكون اكتر صعوبة من التلاعب في قائمة الدخل، ومع كل المعلومات والارقام الموجودة داخل القوائم دي فالتحليل بيكون اصعب وهنا المستثمرين بيلجأو للنسب المالية.
النسب المالية
ممكن تختصر التحليل المالي بإستخدام النسب المالية لـ4 نسب رئيسية:
- السيولة
- الربحية
- النشاط
- المديونية
1- نسب السيولة:
بتعرفني مدي قدرة الشركة علي سداد إلتزاماتها المتداولة من اصولها المتداولة وفي اكتر من نسبة بتقيس السيولة.
نسبة التداول= الاصول المتداولة / الالتزامات المتداولة
بتعرفك عدد المرات اللي الاصول المتداولة هتغطي فيها الالتزامات المتداولة وكل ما النسبة دي زادت كل ما زادت امكانية الشركة في سداد التزماتها المتداولة.
طبعا ده بيطمن المستثمرين ان الشركة معاها سيولة تواجه اي مخاطر!
لكن خدبالك من حاجة النسبة المعيارية للسيولة 1:2 وارتفاع النسبة دي مبيدلش علي كفاءة ادارة الشركة! لأ طبعا..
ده بيدل علي انها مش عارفه توظف فلوسها يعني معاها سيولة ومبتستثمرهاش!
نسبة السيولة النقدية = (النقدية + البنك + أ م) / الالتزامات المتداولة
بتعرفك مدي الاعتماد علي النقدية السائلة بعد استبعاد المدينون والمخزون وطبعا كل ده بيفرق مع المستثمر.
نسب السيولة السريعة = الأصول المتداولة – (المخزون / الالتزامات المتداولة)
بدون اللجوء للمخزون لأنه اقل بند من بنود الاصول المتداولة سيولة وكذلك اكتر بند معرض لمخاطر انخفاض السعر أو التلف أو الحريق، بنستخدم النسبة دي ف حالة الركود الاقتصادي أو البطء في دوران المخزون خاصتا لما يكون الكمية كبيرة اكتر من اللي السوق طالبه والنسبة المعيارية للسيولة السريعة 1:1.
2- نسب المديونية:
كذلك النسبة دي مهمة جدا لان الدين هو وسيلة للحصول علي تمويل، وفي اكتر من نسبة لقياس المديونية في التحليل المالي بإستخدام النسب المالية.
نسبة الديون = اجمالي الديون / اجمالي الاصول
كل ما الشركة قللت من اعتمادها علي القروض لتمويل اصولها كل ما كانت المخاطر اقل، والافضل انك تستثمر في شركة مش عليها ديون أو ان ديونها تكون قليلة.
نسبة الديون لراس المال = اجمالي الديون / اجمالي الاموال المملوكة
نسبة الديون لحقوق الملكية = اجمال الديون / حقوق المساهمين
3- نسب النشاط:
من اهم النسب في التحليل المالي بإستخدام النسب المالية بتعرفك نشاط الشركة بيزيد ولا بيقل؟ وايه مدي كفاءة الشركة في استخدام اصولها؟ عشان تنتج اكبر قدر ممكن المنتجات او الخدمات.
وخد بالك من حاجة لو هتاخد العنصرين من قائمة الدخل بس مفيش مشكلة و كذلك لو هتاخدهم من المركز المالي بس بردو مفيش مشكلة اما لو هتاخد عنصر من هنا وعنصر من هنا فكدا في مشكلة!
لازم تاخد بالك منها وهي انك هتاخد المتوسط للعنصر اللي هتجيبه من المركز المالي قيمته في يوم 1/1 +
قيمته في يوم 31/12 وهتقسمهم / 2 وده لان المركز المالي بتجيبلي المركز المالي لـ 31/12،
اما الدخل فبتعبر عن فترة كاملة من يوم 1/1 لـيوم 31/12.
معدل دوران الاصول = صافي المبيعات / اجمالي الاصول
بتعرفك عدد مرات اعادة استثمار الاموال في الاصول وكل ما يزيد المعدل ده، فده بيدل علي ان الشركة بتحقق حجم معاملات بيتناسب مع حجم اصولها يعني بتعرفك مدي كفاءة الادارة في استخدام الاصول.
معدل دوران الاصول الثابتة = صافي المبيعات / الاصول الثابتة
بتعرفك مدي كفاءة الادارة في استخدام الاصول الثابتة
معدل دوران المخزون = المبيعات / متوسط المخزون
بيعرفنا عدد مرات دوران المخزون خلال الفترة، يعني عدد المرات اللي الشركة بتشتري فيها منتجات أو بتبيعها.
معدل دوران المدينين = صافي المبيعات الاجلة / متوسط المدينين
بتعرفنا مدي كفاءة الشركة في ادارة الائتمان علي تحصيل الديون، يعني عدد مرات اللي بتحصل فيها الديون خلال السنة.
متوسط فترة التحصيل = عدد ايام السنة 365 / معدل دوران المدينين
معدل دوران راس المال العامل = صافي المبيعات / متوسط راس المال العامل
بتعرفنا عدد مرات دوران راس المال العامل خلال سنة مالية واحدة.
4- نسب الربحية:
اكتر نسبة مهمة للمستثمرين في التحليل المالي بإستخدام النسب المالية ضروري تقارن ما بين صافي الربح اللي اتحقق بحجم الايرادات، وفي اكتر من نسبة لقياس الربحية.
نسبة ربحية المبيعات = مجمل الربح / المبيعات
بتوضح العلاقة ما بين سعر المنتج والتكلفة بتاعته، و كذلك ايه مقدار الربح من كل عملية بيع؟
نسبة صافي الربح = صافي الدخل / الايرادات
بيعرفك كل جنية بيحقق قد ايه صافي ارباح؟
معدل العائد علي حقوق الملكية = صافي الربح / حقوق الملكية
بتعرفنا العائد نتيجة استثمار الفلوس بيكسب قد ايه؟
معدل العائد علي الاستثمار = صافي الربح / اجمالي الاموال المستثمرة
بيبن كفاءة الشركة ف استثمار فلوسها.
معدل العائد علي الاصول = صافي الربح / اجمالي الاصول الثابتة والمتداولة
بيظهر مدي كفاءة الشركة ف استخدام اصولها.
و كذلك ممكن تعرف نسبة اجمالي المصروفات للمبيعات = المصروفات / المبيعات
وكمان ممكن نعرف نسبة مصاريف التسويق لوحدها = مصاريف التسويق / المبيعات
لتحميل ملف كيف تقرأ النسب المالية؟ – لو حابب تتعلم ازاي تعمل دراسة جدوي أو تتعرف علي دراسات جدوي لمشروعات مختلفة ممكن تتابع قسم دراسة الجدوي