اتعلم ازاى تحط المدير فى جيبك بدون مُعلم بأبسط الخطوات لو كان مديرك راجل أو ست
” اتعلم ازاى تحط المدير فى جيبك بدون مُعلم ” بيقولك يا سيدي ان 85% من الناس اللي بتسيب شغلها مش بيكون بسبب الوظيفة نفسها , لكن بسبب مديرك في الشغل , وده حسب تقرير أعدّه موقع التوظيف الشهير ” Careerbuilder.co.uk “, ولذلك عزيزي الرجل هنحاول نجاوب سوا علي السؤال اللي حير الملايين ودمر أجيال، وحير العقول .. ازاي أحط مديري في جيبي !
اتعلم ازاى تحط المدير فى جيبك بدون مُعلم
طبعا هتلاقي كتب بالهبل بقى تقولك كن مثالي وكن منضبط واشنق نفسك كل يوم وولع في مراتك وعيالك عشان خاطر سعادته،
لا سيبك من الكلام اللي ميأكلش عيش ده، احنا هنا بنقف على أرض الواقع، خلاصة الخلاصة بقى ومن الاخر خد الكام نصيحة دول :
أولًا معاملة المدير الراجل حماده ومعاملة المديرة الست حماده تاني خاااالص،
ومفيش داعي أقول لو مديرتك واحدة ست ” خاصة انسة ” يبقى تراجع علاقتك بأمك عشان أكيد داعية عليك من قلبها !
اتعلم ازاى تحط المدير فى جيبك بدون معلم لو مديرك راجل ؟
– جوزك على ما تعوديه : بمعني من أول يوم افرض شخصيتك ومتخافش تقول لا عند اللزوم ، خلي قلبك ميت .
– ماتخفش تعرض رأيك مهما كان مختلف طالما في مصلحة العمل ( مش في مصلحتك انت يا نمس عشان الحاجات دي بتتفقس وهتبقى Black List في لمح البصر ) بس حاول تسوق فكرتك كويس و تعرف طريقة تفكير مديرك! هل هو روتيني , مبدع , بيحب الشغل الكتير ! واعرض فكرتك بطريقته هو , مش بطريقتك !
– ماتحاولش تفاتح مديرك في أي موضوع خاصة الأجازات في الحالات الاتية: لو هو جعان، مراته منكدة عليه، مديره مديله دش بارد.
-كن لطيف مع زملاء العمل : ده قدام مديرك بس، أول مايمشي ولع فيهم بجاز.
-انزل معاه القهوة بالليل : ودي أهم من كل الي فات، بص يابني القهوة دي كنز لا يفنى ونعيم لا ينضب ومفعولها كالسحر، طب لو مالوش في القهاوي ؟ علمه، خد بإيده وضيعه ( لا بلاش حشيش في المرحلة دي خليها وقت التقييم السنوي ).
وانت سهران معاه هتعرف معلومات كتير زمايلك ما يعرفوهاش، ممكن تسخنه على زميلك اللي انت مش طايقه، تفاتحه في ترقية بعد ما تكون حكيتله قد ايه الحياه صعبة بعد البامبارز ما غلي،
كذلك أوعى تديله فرصة يقرب لحد غيرك، اعمل عليه كماشة….اه ابقى اعزمه على كرسي معسل بلاش بخل، كله عشان مستقبلك .
اتعلم ازاى تحط المدير فى جيبك بدون معلم لو مديرك ست ؟
– مبدأيا الستات كائن يعشق التحوير – حتي لو تظاهروا بالعكس – يعني ماينفعش تكون مباشر وصريح بتاتا، لازم تلف وتدور عشان الستات دايما بيشككوا في نية أي موظف، أو نية أي كائن حي غير أحادي الخلية أصلا.
– تحسسها ان مالكش رأي ولا رؤية من غيرها وانها الكل في الكل وهي بطلة الحرب والسلام
– لما تكون شايفها هتخيش بالشركة وخلاص لا بد انك تبدي – أستغفر الله العظيم – رأي، اتبع أسلوب حويط ومعقد، يعني شوف كل الحلول الزبالة اللي تودي ف داهية واطرحها وبصنعة لطافة بينلها عيوب كل مقترح،
وفي الاخر خالص، قولها طب تفتكري لو عملنا كذا ” أهو…رأيك أهو يا معلم “، ممكن ايه ال يحصل ؟؟
وقبل ماتبدأ هي تفكر في أسباب فشل فكرتك انزل انت بأسباب نجاحها، وضيق عينك كدة وحسسها انك مركز وبتعصر مخك.
– عاملها كأنثى قبل مديرة ( حتى لو كانت شبه وش رجلك الخارجي )، حسسها ان مين اللي أمه داعياله اللي هيتجوزها،
أو ان مفيش حد يستاهلها أصلا وانها أكبر من انها تدفن مهاراتها وذكاءها مع مجرد راجل، مفيش مانع برضه تحسسها ان كل الرجالة في المكان عينهم منها، لو انت مش متجوز في احتمال نباركلك وساعتها أنا معرفكش، اتصرف.
-العب على نفسية الخصم، في أوقات تلاقي الستات اكتأبوا كده بدون أسباب ومش طايقين نفسهم ومحبطين، كن أنت الكتف الحونين،
اسألها في حاجة معكرة مزاجها ؟؟ هاتلها شوكولاتة واكتب عليها ” عشان جالاكسي هي اللي بتخلينا نعدي كل ده “….
ملحوظة: بالرجوع للنقطة السابقة أعتقد ده وقت تلبيس الدبل…ألف مبروك
أخيرا
وعلى غرار أسلوب الكابتن محمود بكر : واحد بقى يسألني انتي إيه مؤهلاتك عشان تنصحني بخصوص حياتي العملية،
ولهذا الشخص أقوله : أمال انت فاكرني كنت هبقي مدير في شغلي ازاي من غير ماكون عملت كل الحاجات دي !
كمان لو حابب تتعرف علي دراسات الجدوي الخاصة بالمشاريع تابع قسمنا :
دراسة جدوي المشروعات الصغيرة والمتوسطة
وعشان تقدر تتابع مقالاتنا الجديدة أولًا بأول انضم لصفحتنا علي الفيسبوك :