ملخص كتاب The New Trading For A Living – الكسندر إيلدر
![ملخص كتاب The New Trading For A Living - الكسندر إيلدر](https://bashmohasb.com/wp-content/uploads/2023/07/ملخص-كتاب-The-New-Trading-For-A-Living-الكسندر-إيلدر.jpg)
الكتاب بيعلمك ازاي تتعامل بشكل هادي مع تداول الاسهم، عن طريق تزويدك بالادوات الاساسية لتحليل الرسوم البيانية وقواعد لتقليل المخاطر وكمان بيعرفك تبعد عن الأخطاء الشائعة اللي بيعملها المبتدئين في تداول الاسهم، “د. الكسندر إيلدر” نشر كتابه الكلاسيكي للتداول ده سنة 1993، وفي 2014، نشر كتاب The New Trading For A Living مرة تانية عشان يساعد المتداولين الجدد يكونوا محترفين بسرعة أكتر، “د. إيلدر” بيدّرس للمتداولين من عقود، وخبرته الخاصة جاية من شهادته الطبية.
المتداول المتمرس بيحاول يدخل السوق لما الوضع يكون هادي ويجيب فلوسه لما السوق يكون في الاوقات العصيبة.
الكسندر إيلدر
إقرأ المزيد: أسرار تداول البورصة من خبير السوق مارك دوجلاس
نبذه مختصرة عن حياة مؤلف الكتاب الكسندر إيلدر
“إيلدر” اتولد في روسيا، وبعدين راح لإستونيا وبدأ دراسته الطبية في سن الـ16، وبعد سنين، وهو عمره 23 سنة، كان بيشتغل طبيب على سفينة، وساب السفينة بعد كده ونزل في أفريقيا وطلب اللجوء السياسي في الولايات المتحدة، واتقبل طلبه، بعد كدا بدأ يشتغل كطبيب نفسي في نيويورك سيتي وفي النهاية بدأ يدرس في جامعة كولومبيا، وده كان سبب إنه بيستند في استراتيجيته للتداول على علم النفس البشري أكتر من التكتيكات.
كتاب The New Trading For A Living بقى من أشهر الكتب عن التداول في العالم، وفيه نصائح ممتازة للتداول العملي.
دروس مهمة في كتاب The New Trading For A Living
- متدفعش عمولتك من أرباحك.
- خلي مشاعرك في البيت.
- خفف من المخاطر باستخدام قاعدتين سهلين.
عايز تتداول عشان تعيش من دخل التداول؟ دي الخطوات الأولى عشان تبدأ!
الدرس الأول: متدفعش عمولاتك من أرباحك
زي أي حاجة، إنك تبقى متداول محترف مش هيحصل في يوم وليلة، والأخطاء اللي ممكن يعملها أي حد جديد في المجال ده، ممكن تتفاداها، وأيًا كان الوسيط اللي هتسجل معاه، هياخد عمولة على كل صفقة هتعملها، دي مش حاجة بسيطة ولا رخيصة، يعني السعر الشائع هو 10 دولار على الصفقة، بس لو انت مبتدئ ومش معاك فلوس كتير، وبتعمل صفقات كتيرة، العمولات هتبقى بتاكل كل أرباحك.
تخيل إنك عايز تستثمر 10,000 دولار على مدار السنة، وبتعمل 4 صفقات في الأسبوع، اللي مش كتير خالص، والعمولة اللي هتدفعها على كل صفقة هي 10 دولار، هتدفع 40 دولار كل أسبوع بس في العمولات، لو بتكمل العدد ده لمدة 50 أسبوع في السنة، هتدفع 2,000 دولار في العمولات، يعني 20% من رأس مال التداول بالكامل، عشان كدا مهم أوي إنك تختار وسيط برسوم منخفضة في البداية وتقلل من التداول علي قد ما تقدر.
الدرس التاني: خلي عواطفك في البيت
غلطة المبتدئين التانية إنهم بيتداولوا بطريقة عاطفية، زي اللي بيلعب بوكر، مفيش مكان للعواطف في التداول، ممكن تكون متعلق بشركة معينة وتشتري سهمهم بسبب انتاجاتهم المميزة، الكلام ده مش صح، لما تدّخل العواطف في التداول، ساعتها بتبدأ تلعب قمار، لما تحس إنك مش قادر تقاوم رغبتك في التداول أو إن السهم ده هيطير، وتسمح لعواطفك تتحكم في طريقة تداولك، فده بيدل على إنك بتتداول زي بتوع القمار.
التداول ببساطة بيجيبلك فلوس، زي ما بتاخد فلوس من أي شغل تاني، فمش لازم تبقى ملهوف على الفلوس، لما تسيب العواطف تتحكم في طريقة تداولك، ممكن تشوف رأس مالك بيتبخر في لحظات، عشان كدا خلي عواطفك في البيت وتتداول بعقل بارد.
الدرس التالت: قلل احتمالات الخسارة بقاعدتين سهلين
![ملخص كتاب The New Trading For A Living - الكسندر إيلدر](https://www.bashmohasb.com/wp-content/uploads/2023/07/قلل-احتمالات-الخسارة-بقاعدتين-سهلين.jpg)
الدكتور “إيلدر” ليه قاعدتين حلوين عشان تساعدك تقلل احتمالات الخسارة وتحمي راس مالك من التخمين، القاعدتين دول هم 2% و 6%.
- قاعدة الـ 2%: بتقول إنك متقدرش تخاطر بأكتر من 2% من راس مالك في أي صفقة، يعني لو عندك 100,000 جنيه عايز تستثمرهم، واشتريت سهم بـ 50 جنيه وحددت وقف الخسارة عند 48 جنيه (يعني لو نزل السهم للمستوى ده هتبيع تلقائي)، يبقى تقدر تشتري 1000 سهم، وخسارتك القصوى هتبقى 2 جنيه للسهم، يعني 2,000 جنيه، اللي بيمثل اتنين في المية من راس مالك الكلي، ومن غير وقف الخسارة، ممكن تخسر كل حاجة.
- قاعدة الـ 6%: بتقول لو خسايرك والمخاطر المفتوحة في الشهر ده عدت 6% من راس مالك الكلي، فمتعملش أي صفقات جديدة، طب لو فرضنا إنك فعلا خسرت 2,000 جنيه في الشهر ده، وكمان عندك 4 صفقات تانية مفتوحة، وممكن تخسر من كل صفقة 1,000 جنيه، كدا يبقى خسارتك الإجمالية 6,000 جنيه، يعني في الحالة دي متعملش أي صفقات جديدة لحد ما تخلص الشهر، عشان متخسرش أكتر من 6% من راس مالك.
في الختام
ملخص كتاب “The New Trading For A Living”، مفيد أوي وبيقدم نصائح عملية كتير، الدكتور “إيلدر” بيقدم قواعد ونصائح محددة بشكل كبير، واللي بتخليك تحس إنك تقدر تاخد اللي عرفته وتستخدمه في غرفة التداول بشكل فوري، بيعجبني في الكتاب إنه فيه نصائح محددة، وإن النصيحة بتاعته ممكن تساعدك في التداول بشكل عام، ومش مقتصرة على أي نوع معين من الاستثمار، زي الخيارات والأسهم والعقود الآجلة.
مهم: ليه الناس بتخسر في البورصة؟ سيكولوجية التداول
ممكن الكتاب يناسب المراهق اللي عنده 14 سنة وسمع عن التداول وحابب يتعلم قبل ما يقدر يتداول بنفسه، والشخص اللي عنده 52 سنة وبيستثمر وبيتأثر بعمولات عالية عشان مش عنده نفس الفلوس اللي عند الصناديق الاستثمارية الكبيرة، وكمان أي حد مرة جرب يقامر بفلوس وحس بالندم.