إزاى تقنع مديرك يديلك أجازة فى 5 خطوات

” إزاى تقنع مديرك يديلك أجازة فى 5 خطوات ” 99% من كل الناس اللي شغالين فى مصر سواء بقه قطاع حكومى أو خاص بيعانوا لما يجى يطلبوا أجازه من شغلهم .. وبيعاملوك على اساس ان حضرتك شغال عندهم بدون ابسط حقوق ليك وهي الأجازه ..

طبيعى بعد اى فتره فيها ضغط شغل بتحس انك نفسك تستريحلك يومين تريح فيهم ضهرك او حتى لو نفسك فى شهر 7 أو 8 تروح تقضيلك يومين فى الساحل أو السخنة أو اى حتى حلوة وتستريح بقه من الشغل شوية .. والمشكلة هنا انك مش بتطلب مثلا استثناء لاجازه عشان رصيد اجازتك خلص لا ده انته بتطلب من رصيد الاجازة بتاعك ( سواء بقه دا الأنيوال أو زى مابيسموها فى الحكومة اجازة اعتيادى أو عارضه ) وأول ماتقول لمديرك انا عايز اجازة .. تلاقى مديرك اتحول لـ رياض المنفلوطى ويرد يقولك ” أجااازة !!! يعنى ايه اجازه ؟ “

وده المفروض حقك القانونى طبقا لقانون العمل اللى حضرتك شغال بيه ..

بس انا عايزك تنسى موضوع قانون العمل ده وانك هاتروح تعمل شكوى فى مكتب العمل والكلام اللى مايأكلشى عيش ده ..

لان ده فى الاخر بيكون نهايته وحشه وهي انك غالبا بتلاقى نفسك مفصول من الشركة وبرده تروح تضرب راسك فى الحيط

طيب تعالو نقولوكوا على تكنيك طلب الاجازة وتتصرف ازاى لو اترفضت.

إزاى تقنع مديرك يديلك أجازة فى 5 خطوات الخطوة الاولي

نصيحة قبل ماتطلب الاجازة حاول تشوف اى شغل مطلوب منك تنجزه وتخلصه مش كده وبس.

لا لا عليك انك تتوقع ايه الشغل اللي من الممكن ينطلب منك خلال الفتره الجاية وحاول تعمل حاجه من الاتنين يا اما تنجزه وتظبطه أو تخفيه وماتعرفشى حد ان الشغل ده مطلوب منك

( وده فى حالة لو الشغل ده معقرب وفيه حوارات كتير ولازم يعدى على اكتر من شخص ).

إزاى تقنع مديرك يديلك أجازة فى 5 خطوات الخطوة التانية

ماتبقاش جدّ اوى ومندفع وانت بتطلب الاجازة عشان مديرك مايحسش انك بتجبره على الاجازة دى ولاوى دارعه ..

فحاول ترميها وسط هزار كده فى وقت دردشه ومش مطلوب ان كلامك يبان انه جدّ …

يعنى فى وسط هزار كده تقول ” اه .. انا اخلص شويه الشغل ده عشان اخد اجازه بقه ” وتقوم ضاحك هههههه بس ومن هنا تشوف رد فعله ايه عشان على اساسه هانشوف هنعمل ايه وفى حاجه من الاتنين :

يا أما هتلاقى فى كلامه موافقه مبدئية على الاجازة ومن هنا تبدأ تحول الكلام لجد يامعلم وتعرف ان مزاجه رايق وهو دا الوقت الصح عشان تفتح الموضوع وتحاول تاخد منه وعد بالاجازه على قد ماتقدر وتحدد عدد ايام الاجازة وماتستغربشى لو لقيت فى كام حجه كده هوه هيقولهالك زى مثلا “مش هتاخد اجازة الا لو خلصت شغل معين “

ويا أما هتلاقى وشه قلب جد ويوقف هزار ويقولك ” لا مافيش اجازات خالص الشهر ده ” ومن هنا تعرف ان ده مش هيجى معاه الطريقة دى ولازم تشوف طريقة تانيه.

إزاى تقنع مديرك يديلك أجازة فى 5 خطوات الخطوة التالتة

اختار الوقت :

وده فى حاله لو مديرك متفاهم وبتقدر تتكلم معاه وطلبت منه اجازات قبل كدا ووافق عليها عادى ..

كذلك لازم بردو يكون الوقت مناسب ويكون رايق عشان تعرف تطلع منه بأكتر ايام للاجازه.

إزاى تقنع مديرك يديك أجازة فى 5 خطوات الخطوة الرابعة

افرد عضلاتك :

قبل ماتقرر تاخد اجازه .. حاول تصحصح كده شوية وتستخدم طريقة استعراض العضلات الـ هو تسيبك من الكسل شوية وتشوف شغلك وشغل الـ حواليك وتنجزه بس مش فى السر لا لا – هو انت هاتعمل شغل غيرك ببلاش – انته لازم تروحله المكتب وتقوله ” خلصت شغل كذا وكذا ياريس “.

بس اهم حاجه تقولها بصياعه وميبنشى منها انك بتعمل كده عشان تطلب حاجه.

إزاى تقنع مديرك يديلك أجازة فى 5 خطوات الخطوة الخامسة

اوعى تطلب اجازاتك ورا بعضها :

خليك معلم ووزع أجازاتك على مدار السنه وبلاش تخلى اجازاتك كلها ورا بعض ..

لان اللي بيعمل كده بيبان دايما انه بتاع اجازات ومش بتاع شغل.

انما لو عايز تقول عذر عشان تعرف تاخد بيه اجازة ويكون مقنع شوية ..

فيه دراسة من شركة التأمين الصحى axa اللى عملت استطلاع رأى مع المديرين وطلعوا بأهم الاعذار اللى ممكن المديرين يوافقوا عليها ودى خليها اخر حل عندك وترتيبهم كالتالى :

عندك دور برد ، ضهرك بيوجعك ، وقعت وحصلك كدمه ومش قادر تتحرك ..

وأجاازة سعيييدة