إزاي تحسب قيمة شركتك بطريقة سهلة وبسيطة؟
الـ valuation ده تقييم لقيمة شركتك في السوق، وبتستخدمه علشان تعرف تحدد سعر الشركة لما تيجي تبيعها أو تجيب مستثمرين علشان يستثمروا فيها، وفيه كذا طريقة ممكن تستخدمها علشان تعمل valuation لشركتك، وأهم 3 طرق هنكلمك عنها في التدوينة دي هي طريقة الإيرادات المتعددة، وطريقة الأرباح المستقبلية المقدرة، وطريقة مقارنة الشركات المماثلة، كمان هنوضح إزاي تحسب قيمة شركتك بإستخدام الـ Tools المتاحة ليك، وايه هي المعايير الأساسية لتقييم قيمة شركتك وتحديد سعرها.
إقرأ المزيد: البيانات بتتكلم: إزاي تقرا قصة الشركة من الأرقام؟
الإيرادات المتعددة
الطريقة دي بتعتمد على إيرادات الشركة السنوية، وبتحسب الـ valuation من خلال ضرب إيرادات الشركة في معامل معين بيتناسب مع نوع الشركة والصناعة اللي بتشتغل فيها، والمعامل ده بيتحدد بناءً على معاملات الشركات المشابهة في السوق.
الأرباح المستقبلية المقدرة
الطريقة دي بتستند على توقعات الأرباح المستقبلية للشركة، وبتقدر قيمة الشركة بناءً على الأرباح اللي ممكن تحققها في المستقبل، وعشان تحدد الـ valuation بالطريقة دي، بتحتاج تعمل توقعات للأرباح وتطبق معدل تخفيض معين بناءً على درجة المخاطرة اللي بتتعرض لها الشركة.
مقارنة الشركات المماثلة
الطريقة دي بتقارن شركتك بشركات تانية في نفس الصناعة والسوق وبتحلل الـ valuation بتاعتهم علشان توصل لتقييم لشركتكن وتقدر تستخدم معايير زي معاملات الأرباح أو الإيرادات للشركات المماثلة، وتحسب متوسطهم وتطبقه على شركتك.
إزاي تحدد قيمة شركتك بإستخدام الـ Tools المتاحة ليك؟
فيه أدوات كتيرة متاحة على النت، ومنها البرامج والجداول الإلكترونية اللي بتساعدك تحسب الـ valuation بناءً على المعطيات اللي بتحتاجها زي مثلاً، انك ممكن تستخدم برنامج Excel أو Google Sheets علشان تعمل جداول تساعدك تحسب الـ valuation بالطرق اللي احنا اتكلمنا عنها.
كمان فيه مواقع وتطبيقات مُتخصصة في عملية الـ valuation، زي موقع “Crunchbase” وتطبيق “Equidam“، اللي بيقدموا أدوات وميزات متطورة بتساعدك تحسب تقييم شركتك بشكل دقيق وموضوعي.
المعايير الأساسية لتقييم قيمة شركتك وتحديد سعرها
ده بيكون علي حسب كل شركة وصناعة، لكن فيه بعض المعايير الأساسية اللي بتتكرر في معظم القطاعات زي:
- نمو الإيرادات: معدل نمو الإيرادات بتاع الشركة مهم جداً علشان يعكس إزاي الشركة متطورة وعملائها راضيين عن منتجاتها أو خدماتها.
- هامش الربح: ده بيقيس نسبة الأرباح للإيرادات، وبيوضح مقدار كفاءة الشركة في تحويل الإيرادات لـ أرباح.
- حجم السوق والتوسع: إزاي الشركة بتتوسع في السوق وبتنافس في سوق كبيرة ومُربحة، ده بيعتبر عامل مهم في تحديد الـ valuation.
- الديون والتزامات الشركة: الشركات اللي عندها ديون والتزامات كتيرة ممكن تكون أقل جاذبية للمستثمرين، وده بيأثر على تقييمها.
- فريق الإدارة والعاملين: وجود فريق إدارة قوي وعاملين متميزين بيعتبر من أهم المعايير اللي بتأثر في قيمة الشركة.
- الابتكار والتكنولوجيا: الشركات اللي بتستثمر في البحث والتطوير، وبتشتغل علي تطوير منتجات جديدة ومبتكرة عشان تكون أكتر جاذبية للمستثمرين.
- المنافسة: قوة المنافسة في السوق ومدى قدرة الشركة على المنافسة بنجاح، بردو بتأثر كتير في تحديد قيمتها.
مهم: ازاي تقدم نصائح وإرشادات مالية وادارية للشركات والأفراد؟
يعني باختصار شديد، ممكن نقول ان عملية الـ valuation دي بتعتمد على مجموعة من المعايير والعوامل المختلفة، ومش محصورة في حاجة واحدة، المهم إنك تحاول تجمع أكبر قدر من المعلومات عن شركتك والسوق اللي بتشتغل فيها علشان تتوصل لتقييم دقيق وموضوعي لشركتك.
وبكده نكون انتهينا من شرح إزاي تعمل valuation لشركتك، واتكلمنا كمان عن أهم الأدوات والمعايير اللي بتعتمد عليها العملية دي.
أتمني تكون استفدت وتكون قادر تطبق اللي اتعلمته من تدوينتنا على شركتك، موفق إن شاء الله.