إزاي تستثمر في سوق المال – أفكار وارن بافيت
![إزاي تستثمر في سوق المال - أفكار وارن بافيت](https://bashmohasb.com/wp-content/uploads/2023/04/إزاي-تستثمر-في-سوق-المال-أفكار-وارن-بافيت.jpg)
وارن بافيت هو راجل أعمال مشهور في أمريكا، ويعتبر واحد من أغني الناس في العالم، وهو رئيس شركة Berkshire Hathaway. وبيتميز وارن بافيت عن غيره بإنه عنده خبرة كبيرة في مجال الاستثمار، بمعني أصح بيعرف يختار الصفقات المربحة من خلال خبراته الطويلة في المجال ده، وكمان ده مش معناه انه مش ممكن يتعرض للخسارة، بس وقتها بيحاول يخلي خسارته بسيطة بالنسبة للأرباح اللي بيحققها.
إقرأ المزيد: عشان تبقى مستثمر ناجح، اتعلم إزاي تحمي رأس مالك
أهم 5 نصائح استثمارية للأفراد في سوق المال من وارن بافيت
وارين بافيت، الرجل اللي الناس بتسميه “عرّاف الأسهم“، والكل بيراقب وبيستنى فين هيستثمر فلوسه، لأنه ببساطة هو بوصلة المستثمرين في العالم. وارين بافيت اشترى أول سهم ليه وهو عنده 11 سنة، وفي سن 16 بقى عنده 53 ألف دولار، وفي الوقت الحالي وارين بافيت رئيس مجلس إدارة شركة Berkshire Hathaway، وعنده 90 سنة وثروته تقريبًا 76 مليار دولار، وهو السابع في قايمة أغنى الأغنياء في العالم.
في التدوينة دي، هنتكلم عن 5 نصائح مهمة جدا في الاستثمار للأفراد من وارين بافيت.
النصيحة الأولى: بيتكلم بافيت عن الفلوس والبورصة والمستثمرين
وارن بافيت بيقول انك لازم تكون خايف وانت بتشتري الاسهم لما الناس كلها بتشتريها، لان السعر ممكن يكون مبالغ فيه، يعني لازم تدور عن الاسهم اللي بتهتم بيها ناس قليلة، ولو اتأكدت انها كويسة ماليا وفنيا تشتريها، المهم انك تكون شجاع وانت بتشتري والناس كلها بتكون خايفة، عشان كده بافيت عنده اكتر من 76 مليار دولار دلوقتي.
النصيحة التانية: من وارن بافيت للمستثمرين هي الادخار
يعني احنا لازم ندخر فلوسنا لحد ما نحتاج ليها، وكمان عشان نقدر نستفيد من الفرص الاستثمارية لما تيجي، يعني لازم نعمل حساب طوارئ ونحط فيه فلوسنا عشان نقدر نتحمل أي خسارة محتملة، وفي نفس الوقت نقدر نستغل الأموال دي لشراء الأسهم لما تنزل في السعر، وده هيساعدنا نكسب فلوس كتير لما يرتفع سعرها تاني.
النصيحة التالته: ركز على شراء أسهم الشركات اللي بتوزع الأرباح
![إزاي تستثمر في سوق المال - أفكار وارن بافيت](https://www.bashmohasb.com/wp-content/uploads/2023/04/ركز-على-شراء-أسهم-الشركات-اللي-بتوزع-الأرباح.jpg)
إنك تركز على شراء أسهم الشركات اللي بتوزع ربحها، عشان ده بيبين إن الشركة ماليتها كويسه وقادرة على سداد التزاماتها، وكمان إنها شركة ناجحة وبتحقق أرباح، وبافيت بيفضل كتير الاستثمار في الشركات دي، خاصة اللي بتوزع أرباح لفترات طويلة وبيزيد ربحها مع الوقت، فمش تختار سهم شركة بتوزع أرباح في سنة وبعدين بتحقق خسارة في سنتين أو تلاتة، علشان ده يدل إن الشركة استفادت من ظرف معين لفترة محدودة ومش قادرة تحقق أرباح مستمرة.
النصيحة الرابعة: شراء الأسهم المعدومة قيمتها
يعني وارن بافيت بيجيب الأسهم اللي سعرها أقل من قيمتها الحقيقية، وبيحسب القيمة الحقيقية بتاعتها على حسب الأرباح اللي بتتحقق منها والفلوس اللي بتكسب خلال الخمس سنين اللي فاتت على الأقل، وكمان بيشوف هل الشركة عليها ديون ولا لأ، وبيقارن الشركة دي بشركات زيها عشان يعرف هل سعر أسهمها أقل من قيمتها الحقيقية ولا لأ.
النصيحة الخامسة: الشراء والاحتفاظ
وارن بافيت هنا بيقول ان لازم تشتري الأسهم وتحتفظ بيها لفترة طويلة، زي ما بيعمل بالظبط، بس في نفس الوقت مش تفضل محتفظ بشركة لو بتعاني من خساير أو بتقل أرباحها بشكل مستمر، بافيت بيشوف محفظته الاستثمارية، ولو شاف إنه في شركة خسرانة مش بتنافس زي ما كانت بتعمل، بيبيع أسهمه فيها أو بيقلل عددها، وبينصح بافيت المستثمرين إنهم يستنوا الفرصة المناسبة ويشتروا الأسهم في الوقت اللي السعر فيه مناسب.
مهم: ايه هي أسرار التداول الناجح في سوق الاسهم؟
الخلاصة بالنسبالي
حابب أقولك ان الاستثمار بيكون فرصة حلوة إنك تقدر تزود من فلوسك وتحقق أهدافك المالية أه، بس كمان لازم تفهم إن الاستثمار مش لعبة سهلة ولازم تدرس وتتعلم وتتابع باستمرار عشان تتحقق النتايج اللي انت عايزها، بمعني متتسرعش وانت تاخذ قراراتك ولا تستعجل على الربح السريع، خليك دايمًا متحمل المخاطر المرتبطة بالاستثمار واحترم تأثير العوامل الاقتصادية والسياسية على سوق الاستثمار.
الاستثمار الكويس بيحتاج منك صبر وتركيز وتخطيط، ولكنه أكيد يستحق المجهود اللي انت هتعمله، فأهم حاجة قبل ما تستثمر أي فلوس، خد الوقت اللي يحتاجه عقلك وقراراتك عشان تكون متأكد إنك بتختار الطريق الصح.
متنساش تتابع صفحتنا علي مواقع التواصل عشان لو حبيت تسألنا عن أي حاجة بخصوص الاستثمار.