نقاط ضعف لازم تتخلص منها وقت التداول

نفسية المتداول في البورصة مهمة جدا ولازم نتكلم عنها من وقت للتاني، علشان متأكد إنها بتأثر جدا على نجاحك كمتداول في سوق المال، الضغط النفسي والمشاعر والعواطف الزيادة، بتكون في سوق التداول نقاط ضعف لازم تتخلص منها وقت التداول، عشان كده هنتكلم عن أهم المشاعر والعواطف اللي لازم تتجنبها وقت التداول في البورصة.

إقرأ المزيد: ازاي تدير رأس مالك صح في البورصة؟

الخوف من الخسارة

الخوف من الخسارة والاستمرار في الصفقات الخسرانة عشان ترجع الأسعار زي ما كانت، والنزول من الصفقات لما توصل لمنطقة الدخول، واللي بيسبب زيادة الخساير عشان مفيش احتمالية ترجع الأسعار تاني في الحالات دي.

الخروج المبكر

خروجك المبكر من صفقات معينة لما تيجي تحقق منها ربح صغير، وده عشان انت خايف من تراجع الأسعار، وانك متحققش أي ربح.

التردد بسبب الخوف

طبيعي إن الواحد يتردد قبل ما يدخل صفقة في البورصة، وبيعمل كده عشان بيخاف يخسر، وده بيكون أمر طبيعي، الحل إنك تقلل حجم الفلوس اللي بتتعامل بيها عشان تخفف الخسارة المحتملة، وتابع دايمًا طريقتك في التداول، واحدة واحدة هتلاقي انك بقيت أحسن من الاول وزادت ثقتك في نفسك وفي طريقتك، وده هيساعدك تزود حجم الفلوس اللي بتتعامل بيها وتخاطر أكتر في المستقبل.

الطمع في مكاسب اكبر

الطمع بيخلي المتداولين في السوق يخالفوا خطط إدارتهم للمخاطرة، ويزودوا من حجم المخاطر في التداول عشان يحققوا أرباح أكتر، ومش بيعملوا اعتبار المخاطرة او انهم يخسروا كل حاجة مرة واحدة، ولا إن كان حجم الفلوس اللي بيتعاملوا بيها بيتناسب مع محفظتهم أو لأ.

كمان في اوقات كتير الطمع بيخليهم يدخلوا في الصفقات بدري جدا ومش بيستنوا الأسعار المناسبة، وده بيخليهم يضّيعوا فرصة تحقيق أرباح أكبر، وساعتها بيزودوا من مخاطر خسارتهم، فيزيد حجم وقف الخسارة ويقلل من حجم الأرباح المتوقعة.

الأمل المبالغ فيه

نقاط ضعف لازم تتخلص منها وقت التداول — الأمل المبالغ فيه وقت التداول

الأمل بيحصل لما حد يكون بيتداول في البورصة مثلاً، وبيفتح صفقة فبيشتري فيها سهم، وفجأة السهم بينزل في السعر والشخص بيخسر في الصفقة، اللي بيحصل في الأغلب إن الشخص ده بيخاف إنه يقبل الخسارة ويقفل الصفقة علي كده لأ، ده بيحاول يكون عنده أمل إن السعر هيبقى أعلى تاني وهيقدر يخرج من الصفقة بربح أو على الأقل بدون خساير.

كمان لما حد يكون بيتداول، وفيه خساير في صفقات كتير، بيحاول يعوض عنها بصفقة جديدة كبيرة، يعني بيشتري فيها أكتر من اللي كان مخطط ليه، عشان يحاول يحقق ربح كبير ويعوض عن الخساير اللي قبل كده، بس ده بيرجع يبين إن الشخص ده بيتداول بالطمع والأمل فقط، ومش ماشي علي خطة تداول منظمة، وده بيعمله مشاكل أكتر.

الإحباط بسبب الفشل المتكرر

الشعور اللي بين الخوف والطمع والأمل، دايمًا بيوصلنا للإحباط، وفي توقيت غلط ممكن نخرج من صفقة بربح قليل، لكن بعد كدة بنكتشف إن السعر بيستمر وحقق الهدف اللي كان متوقع، واحنا خرجنا قبل كدة، وكمان بنحاول نزيد مخاطرتنا في صفقات معينة، ونفكر إنها مضمونة، ولكن المفاجأة بتكون إن السوق بيمشي عكس ما كنا متوقعينه، والخسارة بتكون كبيرة، وده بيأثر على أرباح صفقات تانية، كنا جايين ناخدها بناءً على نفس المخاطرة اللي عملناها.

لازم تعرف ان الالتزام بخطة التداول الخاصة بيك، بيحميك من الإحباط والطاقة السلبية، عشان بتكون شغال بنظام متحدد قبل كدا بعناية، وكمان بتكون درست نتايجه قبل ما تلتزم بيه، وده بيخليك في النهاية تتقبل أي خسارة أو فرص فاتتك كجزء من النظام ده.

مهم: التركيز على الخروج في التداول: السر لتحقيق الأرباح وتفادي الخساير