ملخص كتاب Your Money Or Your Life – دليل الحرية المالية
كتاب “Your Money Or Your Life” هو الدليل النهائي للحرية المالية، بيتكلم عن تسع طرق مُجربة عشان تنتهي من دورة المعيشة من راتب لراتب وتسدد ديونك، وازاي تكسب فلوس أكتر عشان تعيش حياتك من غير قلق مالي. بيقولوا إن الفلوس هي جذر كل شر، بس عدم وجودها مش بيخلينا سعداء كمان، في الحقيقة عدم وجودها بيخلينا نكون عايزينها أكتر، وبنضيع وقت ومجهود عشان نوصل للحرية المالية اللي بنتمناها، بس فيه ناس كتير بتضيع حياتها في الفخ ده من غير ما يوصلوا للهدف اللي بيتمنوه.
لو عايش عشان يكون عندك كل حاجة، يبقى عُمر اللي عندك ما هيكفيك.
فيكي روبن
إقرأ المزيد: ملخص كتاب Everyday Millionaires – كريس هوجان
البداية
الحياة من غير ديون هي اللي بنطمح ليها وبنتمنى فلوس أكتر ونقدر نهتم بنفسنا واللي حوالينا، كل دي أهداف الناس اللي مش اتولدوا في قمة الرفاهية، بس كتير مننا بيفشلوا في تحقيقها عشان بيقولوا إن النظام المالي شرير.
كتاب “Your Money or Your Life” لـ “فيكي روبن” و “جوزيف دومينغيز” بيعلمك ازاي تحسن علاقتك بالفلوس وتحقق الحرية المالية، اللي هي إنك يكون عندك فلوس كافية عشان تعيش حياة ليها معنى ومتقلقش من الفلوس تاني، لو ده كويس ليك فتابع معانا عشان هنشرح 9 طرق فعالة لتحقيق الهدف ده.
أهم الدروس من كتاب Your Money or Your Life
- الاستقلال المالي بييجي من معرفة قيمة أصولك ودخلك الحالي ومصاريفك السابقة.
- اعمل ميزانية خاصة ونظام تقييم لدخلك ومصاريفك.
- استثمر فلوسك اللي اتعبت عليها عشان تحافظ على قيمتها.
لو انت جاهز تحول علاقتك بالفلوس كمل معايا للأخر عشان هنشرح كل درس بالتفصيل.
الدرس الأول: الاستقلال المالي بييجي من معرفة قيمة أصولك ودخلك الحالي ومصاريفك السابقة
أي خطة كويسة لازم يكون فيها أساس أو نقطة بداية، لو عايز تحسّن علاقتك بالفلوس لازم تعرف في البداية كام جنية بتصرفه.
- ابدأ بتتبع كل دخلك السابق وجمعه، وكشوفات الدفع وحتى معلومات من الضمان الاجتماعي، اجمع الأرقام واتأكد من إضافة الهدايا النقدية وأي دخل تاني استلمته في حياتك.
- بعد كده شوف عندك ايه دلوقتي، فلوس كاش والفلوس اللي في البنك والأسهم أو السندات بالقيمة السوقية الحالية، والأصول الثابتة عندك زي العربية أو البيت، ولازم تحسب كمان الالتزامات زي القسط الشهري للبيت أو العربية والديون.
- لما تخلص من كل الحسابات والجمع والطرح اللي عملتهم، ده الوقت اللي تشوف فيه صافي قيمتك، اتأكد إنك بتواصل المتابعة وبتضيف وتطرح بناءًا على الأحداث اللي بتمر بيها، بس برضو لازم تعتمد على جدول “إكسل” عشان تدير أمورك المالية بشكل أفضل.
- خطوة مهمة تانية في العملية دي هي تصنيف مصاريفك، اعمل أقسام زي المشتريات من السوبر ماركت والنشاطات الاجتماعية والإيجار وهكذا، واتأكد إنك خليت جزء للادخار، يعني لازم تبدأ في التخطيط المالي، مش لازم تلتزم بصيغة معينة، دور على أي صيغة تناسب طريقة حياتك، المهم إنك تبدأ في التخطيط بشكل عام.
الدرس التاني: اعمل ميزانية خاصة ونظام تقييم لدخلك ومصاريفك
مع وجود ميزانية هيكون عندك سجل أكتر وضوح لدخلك ومصاريفك، وبيكون أسهل تتبع مصاريفك، وهيكون في وقت عشان تشوف حاجة جديدة أكبر من كده، اللي هي نسبة طاقة حياتك للرضا اللي بتوصله، خليني أوضح أكتر:
- في الأساس لما بتبيع وقتك وتشتغل وتاخد فلوس، بتبيع جزء مهم من طاقتك، كل ده بتاخد مكانه فلوس بتستخدمها عشان تشتري الأساسيات وعشان تعيش حياة تستحقها، لما بتحول الحاجات دي لأرقام هتلاقي إنك بتاخد سعر ساعة معين، بس محتاج وقت عشان تستعد للشغل وفلوس عشان تشتري حاجات لازمة للشغل زي الهدوم الجديدة، فبيكون دخلك الفعلي في الساعة ممكن يكون أقل بكتير من اللي كنت فاكره.
- بالنسبة لحساب نسبة دخلك بالساعه، خليك فاكر إنك بتاخد من عمرك وجهدك في الشغل عشان تقدر تصرف الفلوس على حاجات بتضيف معنى لحياتك، فلو لاحظت إن النسبة دي مش متساوية بالنسبة لبعض الحاجات، زي مثلا الخروجات الكتير للمطاعم، يبقى لازم تحاول تقلل المصاريف عشان متبقاش بتضيع وقت كتير وجهد في حاجة بتضيفلك قيمة قليلة، بس لو الحاجة دي مهمة أوي ليك، حاول تخفض في حاجة تانية مكانها.
- وبعيد عن الفلوس الدراسات بتقول إن أكتر الناس بيحسوا إن النجاح في الحياة بيتقاس بالفلوس، والموظفين بيكونوا مُعرضين أكتر للاكتئاب والقلق، عشان كدا خليك حريص على إستثمار وقتك وفلوسك في الحاجات اللي بتضيفلك سعادة وتناسب شخصيتك.
الدرس التالت: استثمر فلوسك اللي اتعبت عليها عشان تحافظ على قيمتها
واحد من أخر أجزاء الكتاب بيتكلم عن الاستثمار، اللي معناه إنك تحط فلوسك في أصول زي السندات والأسهم والعقارات، عشان تنتج دخل أكتر على المدى البعيد، فتبدأ منين؟ الناس بتفكر في الاستثمار على إنها حاجة خطر، بس ده عشان مش عارفين يستثمروا ازاي.
في الأساس هتختار الأوراق المالية الأكتر أمان، بالذات لو انت جديد في السوق، هتحتاج مستشار مالي، بس لازم تقرر هتخصص كام كل شهر، الخصخصة دي هتتبني على احتياجاتك المالية على المدى البعيد، وكمان من الأمان إنك تعمل حساب 6 شهور لنفقاتك قبل ما تبتدي.
الاستثمار خطر في المدى القصير، عشان أوراقك المالية ممكن تنزل قيمتها وتلاقي نفسك محتاج لصندوق الطوارئ، بس المدى البعيد بيقدر ينتج ثروة كبيرة، عشان كدا هتلعب اللعبة دي عن طريق اختيار أذون الخزانة، وصناديق المؤشر المتداولة، ولما تبتدي تفهم اللعبة شوية تقدر تختار شركات معينة بنسبة صغيرة من فلوس الاستثمار بتاعتك.
في نهاية ملخص كتاب Your Money Or Your Life – دليل الحرية المالية
زي ما وضحنا إن الكتاب بيتكلم عن فكرة الفلوس من ناحية أوسع، بيبتدي بأهمية حساب صافي ثروتك، وبيوصل لاستثمار الفلوس الزايدة، قراءة الكتاب دي مهمة لأي حد بيدور على الحرية المالية. الكتاب بيخلينا نفهم إن الفلوس مش كل حاجة في الدنيا ومش هي الهدف الأول والأخير في حياتنا. بيعلمنا إزاي نعرف نستخدم فلوسنا بطريقة صح ونركز على الحاجات اللي بتدينا قيمة حقيقية وسعادة داخلية.
مهم: ازاي تكون غني: ملخص كتاب I Will Teach You To Be Rich
الملخص مفيد لأي حد عايز يبدأ يهتم بالفلوس ويوفر عشان يتقاعد، وممكن يكون مهتم بالتمويل وفرص الاستثمار، أو عايز يتحكم في فلوسه عشان يقدر يعيش حياة ليها معنى.