ملخص كتاب The Simple Path to Wealth – ج. ل. كولينز
![ملخص كتاب The Simple Path to Wealth - ج. ل. كولينز](https://bashmohasb.com/wp-content/uploads/2023/07/ملخص-كتاب-The-Simple-Path-to-Wealth-ج.-ل.-كولينز.jpg)
كتاب The Simple Path to Wealth “الطريق الأقصر إلي الثروة” بيقدم طريقة بسيطة في 3 خطوات لتحقيق الحرية المالية، نقلها أب غني لبنته الصغيرة من خلال سلسلة من الرسائل. الكتاب فيه نصائح عن الديون والمصروفات وبيشرح أهمية وضع خطة مالية وتحديد المستهدفات المالية. كمان بيتكلم عن التقاعد وكيفية التخطيط ليه بطريقة تضمن الحرية المالية والاستمتاع بالحياة.
في حاجات كتير الفلوس بتقدر تشتريها، بس أغلى حاجة هي الحرية، الحرية إنك تعمل اللي انت عايزه وتشتغل مع الناس اللي بتحترمهم ويحترموك.
ج. ل. كولينز
إقرأ المزيد: ملخص كتاب Millennial Money Makeover – كونور ريتشاردسون
بداية القصة
قصة مشهورة عن اتنين صحاب طفولة كل واحد كمل في طريق، واحد بقى مستشار للملك والتاني راهب، بعد سنين قابلوا بعض والمستشار حس إن صاحبه مش كويس ماديًا فحاول ينصحه وقاله: “لو اتعلمت تخدم الملك مش هتحتاج تعيش على الرز والفول بس”، بس الراهب رد عليه وقاله: “لو اتعلمت تعيش على الرز والفول مش هتحتاج تكون خدام الملك”.
المثل المشهور ده اللي بيتكلم عنه “J.L. Collins” في كتابه “The Simple Path to Wealth” عشان يوصل فكرة معينة: الثروة مش الأهم تكون سلطة أو فلوس كتير، الثروة هي الحرية، “Collins” بيقول إن الحرية بتاعتك هي الحاجة الأهم اللي تقدر تشتريها، وفي الكتاب ده بيقدم طريقة بسيطة للوصول للحرية دي.
بدأت الفكرة الأساسية للكتاب بسلسلة من الرسائل اللي بعتها “ج. ل. كولينز” لبنته الصغيرة في البداية، وبعدها الكتاب بقى من أكتر الكتب مبيعات، اتباع حوالي 400,000 نسخة، من مميزات الكتاب واللي شد الناس ليه هو أسلوب “Collins” البسيط والسهل، وعلى حسب رأيه إنك تقدر تبني ثروة من خلال 3 خطوات بس.
أهم تلات دروس من كتاب The Simple Path to Wealth
- اصرف أقل من اللي بتكسبه.
- اخلص من الديون بسرعة، وخليك بعيد عنها.
- استثمر أغلب فلوسك في صناديق الاستثمار المؤشرية.
جاهزين للطريقة البسيطة لتحقيق الثروة؟ يلا بينا نشوف خريطة الطريق اللي اقترحها “J.L. Collins” بالتفصيل.
الدرس الأول: اصرف أقل من اللي بتكسبه
لو مستواك المعيشي بيساوي دخلك أو حتى أكتر من دخلك بحاجة بسيطة، فانت بكدا “عبد مدهون بالدهب”. “كولينز” بيتكلم عن “مايك تايسون” اللي هو واحد من أعظم الملاكمين في التاريخ، اللي كسب أكتر من 300 مليون دولار ومع كدا افلس. بتلاقي ناس عندها اللي يكفيها بس بيشتكوا من كتر الشغل المتعب، وده دليل على إنه مربوط بسلسلة من دهب، وإن رغباته بتسيطر عليه، “كولينز” بيقول رغباتنا محتاجه لكتير من الصيانة العقلية والمالية.
الكتاب مفيهوش جزء كبير عن الميزانية وتقليل المصاريف على القهوة أو تقليل السحب من البطاقات الائتمانية. “كولينز” ببساطة معتمد على الاحساس الشخصي، الكل عارف دخله كام وكمان يعرف شوية في الحسابات البسيطة، يعني ممكن كل الناس إنهم يعرفوا على الأقل بيصرفوا كام.
بناء الثروة أكيد بيعتمد على وجود فرق إيجابي بين دخلك وبين مصاريفك، والفرق ده بيكون هو معدل التوفير بتاعك اللي تقدر تستثمره عشان توصل للثروة.
جمال التوفير بيبان في حاجتين، بيقول “كولينز”، انت بتتعلم تعيش بأقل حتى وانت بتزود استثماراتك. “كولينز” مش بيعيش حياة فخمة وحتى ماكنش عنده عربية، بس عنده الحرية في اختيار مساعديه وازاي يقضي وقته، نسبة ادخار “كولينز” هي 50% من دخله، وبينصحك تستهدف نفس الرقم. ومن اللحظة اللي يبدأ دخلك يكون أكتر من اللي بتحتاجه، حاول تصرف أقل من اللي تكسبه ووفر الباقي.
الدرس التاني: اخلص من الديون بسرعة، وخليك بعيد عنها
![ملخص كتاب The Simple Path to Wealth - ج. ل. كولينز](https://www.bashmohasb.com/wp-content/uploads/2023/07/اخلص-من-الديون-بسرعة،-وخليك-بعيد-عنها.jpg)
فيه أكتر من شكل وطريقة للتعامل مع الديون، بعض الخبراء بيقولوا إنها ممكن تكون أداة مفيدة، وبعضهم بيقترح إنك تهرب منها على قد ما تقدر، شخصيًا بفضل النظرة الأخيرة وكمان ده رأي “كولينز”. الديون بتكون زي اللي كاتم على نفسك، لازم تحاول تسدد الديون اللي عندك في أسرع وقت، لما يكون مش عليك أي ديون، الزيادة اللي هتوفرها من دخلك هتقدر تستثمرها في البورصة وكل شهر هتبدأ تزيد.
–> “كولينز” كمان بيتكلم عن 3 أنواع من الديون اللى احنا بنعتبرهم “الديون الكويسه”، يعنى الفلوس اللى بنقترضها عشان نستخدمها فى أهداف إنتاجية:
- قروض الأعمال : النوع ده لازم نتعامل بحرص كبير معاه عشان ممكن يغرقك ويقضي عليك.
- قروض التعليم : مش لازم يكون موجود عشان بيزود تكلفة التعليم وبيجبر الناس على وظايف مش هياخدوها حتى بعد سنين من التخرج.
- قروض العقارات: “كولينز” بيقترح إنك تشترى أقل بيت على قد احتياجاتك بدل من أكبر بيت تقدر تشتريه بفلوسك، هو بيفكر في البيت زى التفاح: حاجة تقدر تشتريها بأي كمية، بس كل ما تشتري أكتر، هتقيدك ماليًا أكتر وأكتر في السنين اللي جاية.
لو أنت لسه مبتدئ ومفيش أي ديون عليك حاول تستمر على كدا، ولو انت عندك ديون حاول تسدها بسرعة، وبعدين ركز على زيادة ثروتك.
الدرس التالت: استثمر أغلب فلوسك في صناديق الاستثمار المؤشرية
- “صناديق المؤشرات“، أوقات بيكون فيه ملل من تكرار نفس النقطة مره والتانيه، بس هي موجودة في كتير من كتب المالية لسبب معين، “كولينز” مش استثناء هو كمان جزء من الجماعة الكبيرة من خبراء المال اللى بيعتبروا الإستثمارات في صناديق المؤشرات هى العمود الفقري لأي استراتيجية لبناء الثروة.
- “كولينز” بيقترح صندوق “Vanguard Total Stock Market Index Fund” واللي رمزه “VTSAX”، أو الصندوق المتداول الخاص بيه “VTI”، طالما انت فى مرحلة تجميع الثروة، وبتحاول تزود “بيض العش” الخاص بيك اكتر من 25 ضعف حجم مصاريفك السنوية، “كولينز” بيقول إن لازم تخصص 100% من إستثماراتك في الصندوق ده اللي بيتتبع كل الأسهم الأمريكية.
- الموضوع ده هيبقى صعب مش سهل زي ما انت فاكر، “كولينز” بيقولنا حتى لو عملت تشغيل “اوتوماتيك” على مصاريفك الشهرية للوسيط اللي بتتعامل معاها، لما السوق ينزل ناس كتير حواليك هتتسرع وهتبيع، والإعلام هيعمل ضجة ويقولك بيع، بس لو اتمسكت بالسهم ومشيت في الطريق للنهاية فمحتمل تنجح في الأخر، التاريخ بيقول إن البورصة دايمًا بترجع لصالح اللي بيصبروا عليها ويستثمروا فيها لفترات طويلة.
- لما توصل لهدفك في المحفظة اللي هو مليون دولار مثلا، تقدر تسحب بأمان بين 3-7% منها سنويًا وفي نفس الوقت محفظتك بتزيد. النظرية دي على حسب كلام “كولينز” واللي بترجع لقاعدة الـ 4% اللي اختبرتها دراسات كتير، دلوقتي كل اللي باقي هو إنك تستمتع بحرية جديدة. اصرف أقل من اللي بتكسبة واستثمر الزيادة وابعد عن الديون، ده الطريق البسيط للغنى، وأتمنى إنك تمشي فيه لحد النهاية.
خلاصة كتاب The Wealthy Gardener
الكتاب بيقدملنا استراتيجية بسيطة لإدارة المال والاستثمار. بغض النظر عن خلفيتك المالية أو مستوى معرفتك، كمان فيه مفاهيم ونصائح قوية تساعدك إنك توصل للاستقرار المالي وتحقيق الحرية المالية. بلاش تتردد في قراءته وتطبيق المبادئ اللي بيقدمها، وهتلاقي نفسك علي أول الطريق لبناء ثروة مالية قوية وحياة مادية أكثر استقرار وسعادة.
مهم: ملخص كتاب Your Money Or Your Life – دليل الحرية المالية
ملخص الكتاب هيفيد الشباب اللي خريج حديث، والراجل اللي لسه عنده وقت كبير قبل التقاعد، وأي حد بيدور على طريقة بسيطة وخالدة للاستثمار وتكون ناجحة.