ملخص كتاب The Financial Diet – تشيلسي فاجان
![ملخص كتاب The Financial Diet - تشيلسي فاجان](https://bashmohasb.com/wp-content/uploads/2023/09/ملخص-كتاب-The-Financial-Diet-تشيلسي-فاجان-1024x568.jpg)
كتاب “The Financial Diet” هو دليل لنصائح مالية مفيدة للمبتدئين، بيقدم نصايح عن تقليل المصاريف واستراتيجيات مالية مظبوطة في مجالات كتير زي التخطيط المالي والاستثمار والشغل والأكل والبيت، الكتاب ده هيغير من طريقة تفكيرك وحياتك، وده من خلال الدروس المهمة اللي هنتكلم عنها في الملخص ده، تابع معايا عشان تعرف أكتر.
الفلوس مش بتشتري السعادة، بس بتشتري الحاجات اللي بتخليك سعيد، بتشتري الراحة والأمان وغيرها.
تشيلسي فاجان
إقرأ المزيد: ملخص كتاب Playing With FIRE – دليل تحقيق الاستقلال المالي
بداية الملخص
حجم ثروتك بيتحدد برصيدك في البنك، بس حجم إحساسك بالغنى بيتحدد بجيرانك، يعني مثلا الكاتبة “تشيلسي فاجان” لما كانت ساكنة في حي فقير في “شارلوت” في ولاية كارولاينا الشمالية، كانت مش بتحس إنها فقيرة، كانت الألعاب المستعملة والملابس القديمة أمور عادية في حياتها. بس لما نقلت أسرتها لـ “أنابوليس” في ولاية ماريلاند، بدأت الأمور تتغير، فجأة أصحابها في الفصل كان عندهم عربيات ويخوت، وكانوا بيضحكوا على هدومها اللي مش ماركة، ده أثر كتير على علاقتها بالفلوس، واتعلمت إنها تربط بين الدولارات والقيمة الذاتية.
بعد 10 سنين من بداية حياتها المهنية في الكتابة، لقت نفسها بتهرب من أصحاب الديون ومشغولة دايمًا بالفلوس، في الأخر استفادت من الفلوس اللي جابتها بعد أول عقد ليها مع دار النشر، وحولت حياتها للأحسن.
أول ما بدأت “تشيلسي” شغلها كان مدونة “The Financial Diet” على موقع “تمبلر”، وبقى وجهة مميزة للستات عشان يتكلموا عن فلوسهم بالتعاون مع شريكتها “لورين”، حولت “تشيلسي” كل الحكايات اللي عرفتها عن الفلوس لكتاب، اللي هو نفسه اسمه “The Financial Diet”.
3 دروس مهمة من كتاب The Financial Diet
- اعمل شوية مبادئ مالية، حتى لو بدائية.
- اتعلم طريقة طبخ “طريقة الجدة الإيطالية” هتغير ميزانية الأكل بتاعتك للأبد.
- متحلمش بمستوى عالي جدًا، احلم بمستوى وسط، عشان متضغطش نفسك ماليًا.
الدرس الأول: اعمل شوية مبادئ مالية، حتى لو بدائية
“تشيلسي” بتقول إنها لسه بتفتكر يوم ما اتعرضت للديون، واحده صاحبتها كانت محتاجه فلوس وطلبت منها إنها تديها فلوس، فعلا اديتها الفلوس اللي محتاجاها بس لما خدت مرتبها ودفعت قسط الإيجار والمصاريف التانية، فجأة شافت رصيدها بقى صفر وكان عليها 200 دولار، وكان موقف صعب أوي عليها وقتها.
في اليوم ده عرفت إنها مش هتقدر تنام لو في ديون عليها، عشان تمنع نفسها من مواقف زي دي، قررت إنها تعمل قاعدة لنفسها وهي “مش هعمل أي ديون”، صحيح مفيش قاعدة مثالية، بس ده مش معناه إنك متحطش قواعد خالص.
4 مبادئ بتنصح تشيلسي إنك متعملهاش لو عايز توفر فلوس
![ملخص كتاب The Financial Diet - تشيلسي فاجان](https://www.bashmohasb.com/wp-content/uploads/2023/09/4-مبادئ-بتنصح-تشيلسي-إنك-متعملهاش-لو-عايز-توفر-فلوس.jpg)
- متحاولش تسدد ديون بطاقتك الإئتمانية شهر بعد شهر، لو مش عارف تسددهم خلال شهر واحد، وقبل ما ترتفع الفوايد العالية يبقى متصرفش الفلوس دي خالص.
- متصرفش كتير وتعيش حياة الرئيس التنفيذي، عشان المصاريف الزيادة مش هتفرق معاك ولا هتفيدك حتى لو كنت بتدير شركة كبيرة، متصرفش فلوس في حاجات مش ضرورية زي حلاق بـ300 دولار ورحلة تاكسي بـ100 دولار.
- مش تتجاهل حسابك البنكي، وخليك شايف رصيدك مرتين في الأسبوع على الأقل.
- متستناش التوفير يجيلك من غير تعب، خليك ملتزم بنسبة محددة من دخلك كل شهر وخلي الدفعات دي تتحول بشكل تلقائي.
العمر مليان تضحيات على طول، فلو تقدر تضحي في أول عمرك وتستفيد باقي عمرك هيكون أفضل، يعني تقدر تغير قواعدك للفلوس من وقت للتاني على حسب خبرتك ونظرتك للفلوس.
الدرس التاني: اتعلم طريقة طبخ “طريقة الجدة الإيطالية” هتغير ميزانية الأكل بتاعتك للأبد
من سن 14 لحد 18، كانت “تشيلسي” بتوفر كل دولار تقدر عليه وبتصرف 75% من المرتب، لما بقى عندها سيطرة كاملة على فلوسها، ضيعتهم على الملابس الغالية والأكل والفسح.
بعد كده لما قيمت علاقاتها بالحاجات دي، مثلا بالنسبة للأكل اتعلمت من جدة شريكة حياتها الإيطالية إنها بدل ما تاكل أكل خارجي وبدل ما تهتم بوصفات معينة مُكلفة وتدفع فلوس كتير فيها، قررت تعرف المكونات وتتعلم تطبخ بأي حاجة متاحة، بكدا هتوفر فلوس ومش هتتعب نفسها في الاختيارات الكتير في السوبر ماركت، وهتستمتع بالأكل أكتر.
تعرفوا إيه هي أسرار الجدات الإيطاليات في الطبخ؟
- لو عندك زيت وبهارات وتوم وبصل في البيت، تقدر تعمل وجبة سريعة بأي حاجة، حتى لو مش معاك غير بيضتين أو خضار.
- عمل الأكل بكميات كبيرة أحسن من عمله بالوجبة، بكده هتقدر تاكل الباقي في اليوم اللي بعده، وتسيب الباقي يتجمد لأيام تانية عادي.
- متشتريش حاجات من السوبر ماركت لما تكون جعان أو غضبان عشان هتشتري حاجات كتير هتندم عليها وهترميها.
الأكل من أهم الحاجات في حياتنا، اتعلم تتمتع بيه من غير ما تحتاج فلوس كتير، وهتوفر آلاف الدولارات علي مدار حياتك.
الدرس التالت: متحلمش بمستوى عالي جدا، احلم بمستوى وسط، عشان متضغطش نفسك ماليا
الدنيا مليانه ناس بتعرض حياتها الفخمة والغنية على انستجرام ويوتيوب وفيس بوك وتويتر، واللي بتتباهى بأحدث الحاجات اللي عملتها وبتعتبرها نجاحات، بس إنك تفكر في الحاجات الصغيرة وتهتم بالتفاصيل، دي حاجة مش كويسة.
في قناتها المشهورة على اليوتيوب، “تشيلسي” بتحكي بأسلوب كويس عن ازاي تقدر تتخلص من الهدوم اللي ملهاش لازمة، والنباتات الغريبة اللي بتحتاج لعناية كتير، وكمان لحد أغطية السرير الفاخرة، بتعلمك إنك تقدر تكون سعيد بالحاجات البسيطة وتبعد عن الحاجات اللي ملهاش أي لازمة. لما ييجي الكلام عن الأحلام، “تشيلسي” بتقدم نفس النهج:
بدل ما تحلم بحاجات كبيرة وتحط ضغط كبير عليك ماديا وغيره، حاول تحلم بحاجات متوسطة واستمتع بالنتائج اللي تيجي من شغلك.
إنك تحلم بأهداف كبيرة حاجة كويسة، واجتهد دايمًا عشان تحققها، بس الواقعية هي اللي هتفيدك أكتر. لو كان عندك عيلة وبتصرف عليهم وشغال كذا شغلانه وعليك ديون، مفيش حاجة غلط في إنك تعيش اليوم بيومه لحد ما تتخلص من الديون، وبعد كده هتقدر تجمع فلوس وتبدأ شغلك الخاص اللي هيوفرلك اللي محتاجة واللي كنت بتحلم بيه.
مش كل حاجة ممكن تتحقق في أي وقت، لما ييجي الوقت إنك تاخد مخاطرة، ولما يكون الوقت أحسن إنك تلعب بأمان لفترة، خد القرارات اللي تحس إنها الأحسن ليك، وخطط كويس قبلها، ولو حلمت بحاجات متوسطة، هتحس بالسحر وتحقيق حاجاتك المادية هيكون ليها طعم خاص.
في نهاية الملخص
الكتاب بيقدملنا رؤية جديدة ومنظور مبتكر عن كيفية التعامل مع الأمور المالية. الكتاب مش بس بيدرس إزاي نوفر ونستثمر، لكن بيشمل كل جوانب الحياة الشخصية والمالية، زي الصحة والعلاقات والمشتريات. تشيلسي بتقدم نصايحها وخبرتها بأسلوب بسيط وممتع، وبتشجعنا نتعلم ازاي نحقق توازن حقيقي بين الاستمتاع بالحياة وتحقيق الاستقرار المالي. فالحكاية مش بس عن الفلوس، لكن عن كيفية تحقيق الرضا الشخصي والتطور في كل جوانب الحياة.
مهم: ملخص كتاب The Automatic Millionaire – ديفيد باش
الكتاب ده بنرشحه لأي حد سنه صغير وأهله بيوفروا فلوس عشانه، والشباب اللي دايمًا فلوسهم مش بتكفي، وأي حد بيدور على نصايح عشان يوفر في المصاريف ويكون مستقر ماليًا.