ملخص كتاب The Barefoot Investor – للكاتب سكوت بيب
ممكن نعتبر الكتاب ده دليل للشاب الريفي اللي عنده طموح إنه يوصل للحرية المالية، واللي بيعلمك ازاي تتحكم في مصروفاتك الشخصية بطريقة سهلة ومُبسطة، مع التركيز على إلغاء الديون وتحسين معيشتك، وفي نفس الوقت تقدر تتقاعد بسلام، كمان كتاب The Barefoot Investor فيه نصايح كويسة جدًا عن الادارة المالية هنتكلم عنها.
في كل بلد في العالم بيكون فيه شخصية شبيهة بـ”ديف رمزي“ صاحب كتاب Total Money Makeover، في أستراليا بقي فيه شخص اسمه “سكوت بيب“، المعروف بـ“The Barefoot Investor”. سكوت عاش في مزرعة ريفية وحب الحياة البسيطة، وده اللي هنتكلم عنه وعن الدروس اللي قال عنها في كتابه عن الحرية المالية.
ممكن تستمر في إنك تعيش في الماضي وتحاسب نفسك على أخطائك المالية اللي عملتها وأنت صغير، وتقول لنفسك إنه فات الأوان … أو تقوم وتبدأ تعمل حاجات تفتخر بنفسك بيها بعدين.
سكوت بيب
إقرأ المزيد: نصائح مالية من كتاب الأب الغني والأب الفقير
في البداية
عشان يقدر يحافظ سكوت بيب على حريته اللي اتعلمها، بدأ يشتغل في سوق الأسهم، بس اكتشف بسرعة إن المالية معقدة أكتر من مجرد اختيار شوية أسهم كويسه، عشان كدا قرر يركز على تنظيف الصناعة المالية دي، اللي فيها نصب كتير في الأمور المالية الشخصية.
دلوقتي هو أكتر خبير مالي موثوق فيه في أستراليا، وبيتكلم كتير في التلفزيون الوطني، ونصح الحكومة وفرق رياضية عالمية بخصوص الامور المالية، وبيعيش مع زوجته وأولاده في مزرعة في الريف مرة تانية، كتابه ده هو دليله الشامل، واللي من وقت نشره اتباع منه أكتر من 400,000 نسخة، في 3 أجزاء، الزراعة والنمو والحصاد، بيشارك 9 خطوات ممكن تتبعها عشان توصل للحرية المالية، وهو واحد من أفضل 14 كتاب عن المالية.
3 دروس مهمين في كتاب The Barefoot Investor
- سهل إدارة حساباتك المصرفية بتوزيع الفلوس على حسابات مختلفة.
- اهمل بطاقات الإئتمان وأول حاجة تعملها هي تسدد ديونك.
- خطط لمستقبلك المالي بالإستثمار في صناديق المؤشرات “إندكس”، وحاول تشغل العملية بتلقائية.
خلينا دلوقتي نشوف إزاي تقدر تحسّن وضعك المالي!
الدرس الأول: إدارة أموالك بحسابات بنكية مختلفة
معظم الناس المتجوزين خصوصًا الرجالة بيحبوا يتعاملوا مع المالية اللي في الأسرة، ونقل الفلوس من حساب لحساب وده بيديهم قوة، حتى لو كان معاهم مبالغ صغيرة، شريكك ممكن ما يحبش الجداول الإلكترونية وتحديد الميزانية والإستثمارات زي اللي بتحبها انت.
بس واحد من أول الحاجات اللي عرفها “سكوت” عن المالية الشخصية، إنه لازم يكون الزوجين مشاركين في الإدارة، ده معناه إنه لازم يكون فيه نظام سهل للفهم والشرح في دقايق قليلة، ده اللي خلّى سكوت يفكر في طريقة الـ“Serviette Strategy”، اللي هي عبارة عن 3 صناديق مرتبطة ببعضها وهدفها إدارة كل الفلوس اللي بتيجي.
شرح طريقة Serviette Strategy
دلوقتي هنعرف كل حاجة عن الطريقة دي من خلال توضيح الصناديق التلاته واللي هما:
- صندوق “Blow”: هنا بتقدر تستخدم الفلوس للانفاق اليومي، وفلوس قليلة للرفاهية، وكمان فلوس للطوارئ.
- صندوق “Mojo”: هنا بتحط فلوسك اللي بتستخدمها في حالة وجود مشاكل مالية أكبر، ويُفضل يكون فيه 3 شهور من مصروفك.
- صندوق “Grow”: هنا بتحط فلوس استثمارات التقاعد وزيادة الثروة.
تقسيم الفلوس على 5 حسابات بنكية
- الـ”Daily”: فيه 60% من دخلك، وبتستخدمه في الإيجار، الأكل، القسط، والحاجات اللي بتحتاجها كل يوم.
- الـ”Splurge”: موجود فيه 10% من دخلك عشان تقدر تستمتع بحاجات قصيرة المدى للترفيه، زي السينما أو ملابس جديدة.
- الـ”Smile”: وده برضو فيه 10% من دخلك عشان تقدر تتمتع بحاجات طويلة المدى، زي الاجازات السنوية.
- الـ”Fire Extinguisher”: أما ده فيه 20% من دخلك بتستخدمها في سداد ديون زي بطاقات الإئتمان.
- الـ”Mojo”: بتحطه في بنك تاني وتحط فيه الفلوس الإضافية.
الدرس التاني: ابدأ في سداد ديونك بقطع بطاقات الإئتمان
- بعد ما عرفت الإدارة بطريقة الصناديق، “سكوت” بيقدم فكرة مثيرة للاهتمام هتقدر تتخلص بيها من ديونك، خد مقص وقطع كل بطاقات الإئتمان اللي عندك لقطع صغيرة، سداد ديون بطاقات الإئتمان في الاول إستراتيجية مهمة، عشان في العادة بتكون مبلغ صغير ومناسب للتحكم فيه، بس هي كفاية عشان تحس إنك حققت حاجة مهمة.
- بس لما تقطع بطاقات الإئتمان، بتقضي على أي تراكم عليها بعد كده لما تحاول تسدد ديونك الحالية، ولما تخلص من بطاقات الإئتمان دي، ده الوقت عشان تبدأ فيه الشغل. بعد كده اتصل بالبنك وقولهم إن في عرض لمدة 18 شهر من غير فوايد من بنك منافس [وقول اسم البنك اللي انت عايزه].
- ممكن ما يكونش عندك، بس مش مشكلة، المهم إنهم يتفاوضوا معاك على تخفيض الفايدة والرسوم على ديون بطاقاتك الإئتمانية الحالية، بمجرد ما تحدد أفضل الشروط، بتقدر تبدأ في إستخدام فلوس صندوق الإنقاذ عشان تسدد ديونك شوية شوية وتبدأ في الحركة.
الدرس التالت: استخدم الصناديق الرقمية للنمو على المدى البعيد بشكل تلقائي
إنك تعيش من غير ديون حاجة، والنمو النشط لفلوسك حاجة تانية، ودا اللي بيخوف أغلب الناس، عشان كده “سكوت” بينصح بإستخدام صناديق المؤشرات كبداية للاستثمار، بسيطة ومش محتاجة تراكيب واستراتيجيات معقدة، والأهم إنها أقل رسوم تشغيلية.
صناديق المؤشرات هي عبارة عن أصول استثمارية بتتبع وبتتتبع الأسهم الأكبر والأكتر انتشار في صناعة أو منطقة جغرافية محددة، زي مثلا صندوق “Vanguard Total World Stock Index Fund” بيتكون من سلة من أكتر من 8000 سهم في العالم، وبيعكس عوائد سوق الأسهم العالمية السنوية برسوم 0.19% بس مش بتدفع رسوم أولية عشان مدير الصندوق مش بيشتري ويبيع الأسهم بشكل مستمر.
حتى “وارين بافيت” نفسه مش بيتفوق على سوق الأسهم كله، فصناديق المؤشرات هي أفضل اختياراتك للاستثمار على المدى البعيد بشكل تلقائي.
خلاصة الكلام
الأشخاص المختلفين بيحتاجوا لكتب مختلفة في أوقات مختلفة، ممكن يكون عندك نظام مالي خاص بيك فعلا، أو ممكن ما يكونش عندك ديون بتسيطر عليك، بس أي حالة انت فيها، إنك تقرأ كتاب جديد في المالية مرة أو مرتين في السنة عادة بتخليك تراجع استراتيجيتك وتفكر فيها من أول وجديد، وده في حد ذاته ليه قيمته.
مهم: ملخص كتاب The One-Page Financial Plan
الكتاب ده ينفع الشخص اللي عمره 26 سنة ولسه بيبدأ مسيرته المهنية، ومش بيتبع أي نظام مالي، والأب الشاب اللي عمره 37 سنة وعايز يتخلص من ديونه، وأي حد عنده خوف من إنه يبدأ في الاستثمار.