ملخص كتاب Cryptoassets – دليلك لفهم البيتكوين
![ملخص كتاب Cryptoassets - دليلك لفهم البيتكوين](https://bashmohasb.com/wp-content/uploads/2023/09/ملخص-كتاب-Cryptoassets-دليلك-لفهم-البيتكوين.jpg)
كتاب “Cryptoassets” دليلك عشان تفهم فئة الأصول الرقمية الجديدة وبتوضحلك تاريخ البيتكوين، وطريقة الاستثمار فيها وكمان العملات المشفرة التانية، وازاي بتشتغل التقنية اللي ورا كل ده واللي اسمها “Blockchain”، هتتعرف علي كل حاجة خاصة بالاستثمار وطريقة ادارة العملات الرقمية بأسهل الطرق الممكنة في المقال ده.
بعد إجراء تحليل التقييم أو على الأقل التفكير في القيمة الحالية، أفضل حاجة للمستثمر المبتكر إنه يعملها هو معرفة وفهم مطوري العملات المشفرة والمجتمع المحيط بيهم.
كريس بيرنيسكي
إقرأ المزيد: ملخص كتاب المستثمر الذكي The Intelligent Investor
في البداية
سمعت قبل كده عن البيتكوين؟ أكيد سمعت، الـ “Bitcoin” دي وغيرها من الأصول الرقمية، اللي هي نوع جديد من الأصول، بتوفر فرص كتير للمستثمرين بكل الأنواع. بس الأصول الرقمية المشفرة دي إيه بالظبط؟ هي بتتكون من حاجتين: برمجيات وعملة، الأصول الرقمية دي بتكون ليها قيمة حسب العرض والطلب في السوق زي أي نوع تاني من الأصول، بس الفرق إنها بتكون غير ملموسة.
البتكوين مثلا ليها برمجيات بتخصها وهي عملة جديدة بذاتها، مش زي البترول اللي بيُستهلك وبيتحول، بس بتكون زي الدهب في ندرته وجماله وفايدته، وليها ميزة كمان، إنها محدودة، مش زي الفلوس اللي الحكومة بتطبعها. التكنولوجيا الجديدة دي هتبقى ليها تأثيرات حقيقية على حياتك وعلى العالم كله.
3 دروس مهمة من ملخص كتاب Cryptoassets
- التكنولوجيا الثورية اللي ورا كل العملات المشفرة هي “Blockchain”.
- الفكرة اللي عندنا عن المالية والاستثمار بتتغير بسرعة، بس ممكن تكسب من خلال تعلم كل حاجة وإنك تكون شجاع.
- رغم إن الاستثمار في العملات المشفرة ممكن يبان مثير، بس خلي بالك في احتمالية تخسر فيها فلوسك.
الدرس الأول: أساس كل الأصول المشفرة هو تكنولوجيا “Blockchain” الثورية
الأصول المشفرة زي “البيتكوين ” و “اللايتكوين” مش هيكونوا ممكنين من غير التكنولوجيا اللي اسمها “البلوكتشين”، ببساطة ده دليل رقمي بيبين مين اللي مالك للعملات المشفرة وكام عنده، بس الحكاية معقدة شوية أكتر من كده. أول حاجة لازم تفهمها في الـ “Blockchain”، إنها أحسن من قواعد بيانات الحكومات والبنوك عشان هي مش متمركزة في مكان واحد، الناس اللي بتدير البرنامج على الكومبيوتر بتاعهم، وهما اللي بيشغلوا ويحدثوا “البلوكتشين”.
–> في 3 صفات رئيسية في الـ “Blockchain”، لازم تفهمهم عشان تفهم إزاي بيشتغل:
![ملخص كتاب Cryptoassets - دليلك لفهم البيتكوين](https://www.bashmohasb.com/wp-content/uploads/2023/09/أساس-كل-الأصول-المشفرة-هو-تكنولوجيا-Blockchain-الثورية.jpg)
- “موزع”، يعني أي حد في العالم ممكن يستخدمه بشرط إنه يكون عنده كمبيوتر.
- “مشفر” برموز كمبيوتر محدش يقدر يكسرها.
- “غير قابل للتغيير”، يعني مفيش حد يقدر يمسح حاجة منه، ده عشان بيتزامن مع شبكة كومبيوترات عالمية كبيرة بتشغله.
حاجة تانية مهمة في التكنولوجيا دي هي إنها بتزيد بشكل مستمر، لما بتتسجل تحويلة جديدة في “بيتكوين”، بيتضاف “block” جديد للسلسلة، الـ “Miners” بيتنافسوا عشان يضيفوا كل بلوك جديد، عشان لو عملوا كدا، بياخدوا مقابلها بيتكوين. التكنولوجيا دي قوية عشان حذف أي حاجة منها محتاج موافقة كل اللي بيستخدموا البرمجيات بتاعتها، يعني لو حد أساء إستخدامها، بيكون سهل القبض عليه.
الدرس التاني: أفكارنا عن المالية والاستثمار بتتغير بسرعة، بس ممكن تكسب بتعلم كل حاجة وتكون شجاع
قبل كام سنة، شغلت فلوسي في البورصة لأول مرة، كانت فرحة وفي نفس الوقت قلق، عشان لما بتكون فلوسك موجودة بين المكسب والخسارة، مش سهل تتوقع اللي جاي، بس بعد كده جبت مئات الدولارات من استثماراتي، اللي بيزعلني بس، إني كنت عايز أستثمر أكتر وكمان كنت عايز ابدأ في استثمار بيتكوين من زمان، بيقولوا إن أفضل وقت لزرع شجرة هو دلوقتي، دلوقتي بدأت أستثمر في “الكريبتو”.
في البداية كانت الاستثمارات دي أكتر تخبط وعشوائية، بس دلوقتي ثابتة وأكتر أمان من اللي كانت عليه قبل كده، والفرصة اللي فيها إنها تغير كل حاجة في مجال المال والبنوك. تخيل ازاي البريد الالكتروني دمر البريد التقليدي أو ازاي “نتفليكس” قتلت “بلوك باستر”، القصة الجاية دلوقتي هتبقى إن البيتكوين هيهدم أنظمة المال التقليدية، فكل ما اتأخرت في الدخول، كل ما هتخسر فرصة أكبر.
“البيتكوين” غالي دلوقتي، بس الكاتب بيتوقع إن اللي بيستثمروا فيه دلوقتي لسه ليهم إمكانية كبيرة للربح، ولما تزيد الأعمال اللي بتقبله كوسيلة دفع، هيكبر بسرعة، وأيًا كانت “العملة المشفرة” اللي هتستثمر فيها، اتأكد إنك بتعرف مخاطر الاستثمار ومش بتكتفي بالمضاربة وخلاص.
الدرس التالت: رغم إن الاستثمار في العملات المشفرة يبان مثير، بس خلي بالك في احتمالية تخسر فلوسك
لما تفكر في الاستثمار في العملات الرقمية لازم تاخد بالك من المخاطر النفسية اللي ممكن تحصل، أول حاجة خلي بالك من الاستثمار بناءًا على تداولات الناس من غير ما تعرف حقيقة اللي بتعملوا، فلو انت جديد وشايف إن في ناس كتير بتدخل في عملة معينة، ممكن تفكر انت كمان تدخل، بس لازم تخلي بالك، في ناس خبرة بتدخل في الأسعار من ناحية معينة، بس تستنى شوية عشان السعر يزيد وبعدين تبيع، مش تستنى لحد ما يوصل سعره لأقل من اللي دخلت بيه.
عشان انت جديد، مش هتعرف امتى هيحصل الصعود والهبوط في السعر، فده بيعرضك لمخاطر كبيرة لو استثمرت بناءًا على إجماع الناس، وكمان لازم تعمل حساب إن الموضوع ده مختلف عن كل الاستثمارات التانية، ولازم تستخدم المنطق العادي والتفكير المنطقي في أي استثمار تعمله.
وعشان تقلل المخاطر دي، لازم تنّوع في استثماراتك، كمان لازم تكون حريص على متابعة تفاعل السوق وعملتك في حالات الأحداث العالمية، لو عارف إن عملتك بتتفاعل بمواقف اقتصادية معينة، ممكن تعرف امتى الوقت المناسب للخروج منها قبل ما الأمور تبقى صعبة.
في نهاية ملخص كتاب Cryptoassets – دليلك لفهم البيتكوين
عشان نفهم البيتكوين والعملات المشفرة، لازم نكون استعدينا نتعلم ونتكيف مع التغييرات السريعة في المجال ده، لازم نفهم حاجات زي التشفير والأمان وإدارة المحافظ الرقمية. الشجاعة والقدرة على المرونة في التعلم دي حاجة مهمة جدًا في النجاح في عالم العملات المشفرة. لازم نكون مستعدين نتحمل المخاطر وناخد قرارات صح مبنية على المعرفة والتحليل.
في الخلاصة، لو بتفكر تستثمر في عالم العملات المشفرة، يبقى اعرف إن اللعبة مش سهلة بس ممكن تكون فرصة كبيرة تجيبلك ربح كويس، اتعلم بشكل مستمر وخليك شجاع في أخد القرارات، وده هو الطريق للنجاح في المجال ده اللي مليان إثارة وتطور.
مهم: ملخص كتاب Playing With FIRE – دليل تحقيق الاستقلال المالي
الكتاب مناسب للراجل الستيني اللي مش متحمس للاستثمار في العملات الرقمية بس عايز يبدأ يستثمر فيها، والشاب اللي عنده 19 سنة وعايز ينّوع في استثماراته، وأي حد مستعد لمستقبل الأموال الثوري.