قصة حياة Barry Minkow اللي كسب 240 مليون دولار قبل ما يتخرج من الجامعة

في 1987، قدمت لينا فيلم “Wall Street” عن الملياردير المخادع “إيفان بويسكي”، وبعد 12 سنة في 1999، عملوا فيلم تاني عن سمسار البورصة المخادع “نيك ليسون” بإسم “Rogue Trader”، وكمان عملوا الجزء التاني من فيلم “Wall Street: Money Never Sleep” في 2010. الفيلم المشهور “The Wolf of Wall Street” اللي نزل في 2014 عن “جوردان بيلفورت” اللي كان سمسار في أسهم بِنسات، وفي 2017، عملوا فيلم تاني عن قصة حياة Barry Minkow الطفل المعجزة اللي كان بينصب في واحدة من أكبر عمليات النصب اللي حصلت في القرن العشرين.

إقرأ المزيد: ازاي أدير فلوسي في تداول الفوركس؟

مين Barry Minkow وايه قصته؟

نبذة بسيطة عن بداية حياته

باري منكو هو واحد من رجال الأعمال اللي خدع الناس ونصب عليهم في أمريكا، اتولد في 1966، وبدأ يشتغل في النصب من وهو صغير، وفتح شركة لتنظيف السجاد والأرضيات، وقال إنها بتستخدم تكنولوجيا جديدة ومتطورة.

بداية تكوين ثروة Barry Minkow

لما كان عنده 9 سنين بدأ يشتغل في محل لتنظيف السجاد اللي كان تحت إدارة أمه، ولما كمل الـ 10 سنين، بقى بيشتغل في تنظيف السجاد بشكل احترافي، وكان بيشتغل في الصيف وليل ونهار في أيام الدراسة علشان يقدر يوفر فلوس وخلال 4 سنين جمع 6 آلاف دولار، ولما وصل سن 15 سنة، أسس شركته الخاصة لتنظيف السجاد في جراج بيته وسماها “زي بست” ZZZZ Best، وفي الثانوية بدأ يوظف طاقم كبير جدا في شركته وفيهم أمه وأبوه ولما بقي عنده 18 سنة، بقي مليونير!

وقتها بدأ يحاول يخلي مظهره يتناسب مع ثروته الكبيرة، فاشترى فيراري حمرا وكان عنده فيلا كبيرة فيها حمام سباحة، وكتب كتاب اسمه ” Make it in America” وظهر في برنامج أوبرا كفتى وول ستريت العبقري، وعمل فروع لشركته في ولاية كاليفورنيا، أريزونا ونيفادا، واتشهر بكلامه اللي بيجرح وتعبيراته القاسية، وفي مرة قال إنه مستعد يطرد أمه من شغلها لو خرجت عن حدود الشغل، وكان بيوصف إدارته بانها أفضل من إدارة شركة IBM وانها هتبقى جنرال موتور تنظيف السجاد في يوم من الأيام.

الصدمة والدهشة في وول ستريت

في 1987 قعدوا مصدومين في وول ستريت، لأنهم اكتشفوا إن شركة “زي بست” كانت شركة نصب واحتيال وغسيل أموال، وباري منكو وصحبه كانوا متهمين في واحدة من أكبر قضايا الفساد في التاريخ، وفي 1989 لما كان عنده 23 سنة، كانوا اتهموه في 57 قضية فساد ونصب، وحكموا عليه بالسجن لمدة 25 سنة، لأن القاضي قال إنه شخص خطير على المجتمع بموهبته في الإقناع.

بس قصة باري مينكو مش خلصت لحد هنا.

أعمال Barry Minkow ونهاية قصته

بعد ما دخل السجن، أول حاجة عملها كانت ترتيب أولوياته، وبقى متدين، ورجع زي ما كان للطريق الصح ويقدر ياخد درجة البكالوريوس من الجامعة، وبعد ما فضل 54 شهر في السجن، خرج للحياة العامة كقس لأحد الكنايس في كاليفورنيا في امريكا، وكتب مجموعة من الكتب زي “التنظيف لأعلى ولأسفل، ولكن ليس للخارج”، وساعد المباحث الفيدرالية في الكشف عن كتير من قضايا النصب ورجعلهم ملايين الدولارات.

مهم: أكتر عادات مشتركة لكل الأغنياء فى العالم !

بعدين، في 2009، عمل فيلم اسمه “Redemption”، كتبه بنفسه، وحكى حكايته، وكان خدعة تانية، يعني، مِنكو لسه هو هو الشخص النصاب المخادع ده، ومش اتغير من جوه رغم إن شكله من بره كان غير كدا، وفي 2011 اتهموه تاني في قضية نصب لشركة مساهمة وحكموا عليه بالسجن خمس سنين، وفي 2014، اعترف إنه سرق ٣ ملايين دولار من فلوس الكنيسة اللي كان قس فيها.

دلوقتي منكو عنده ٥٢ سنة، وعاش حياة مليانة بالغش والنصب، وقدمت هوليوود فيلم اسمه Minkow في يونيو ٢٠١٧ اللي حكى قصة حياته المأساوية.

تابع معانا كل جديد أول بأول من خلال الانضمام لينا علي الفيس بوك.