عائد الربح الرأسمالي – التعريف والمعادلة وازاي تقدر تحسبه بسهولة
عائد الربح الرأسمالي “Capital Gains Yield” هو مفهوم اقتصادي بيتعّرف علي إنه العائد اللي المستثمرين بيحققوه لما يستثمروا رأس المال في مشروع معين أو ممكن نقول عليه الزيادة في قيمة أصل أو محفظة بسبب ارتفاع سعر الأصل (مش بسبب الأرباح الموزعة لإن الشخص كان معاه الأصل)، وبمجرد ما نضيف ليه عائد الأرباح الموزعة، بيدينا العائد الكلي، يعني باختصار هو الربح اللي بيجي بسبب إمتلاك أصل معين.
أفضل طريقة توصل بيها للثراء هي إنك تخلي الفلوس تشتغل عنك.
جون روكفلر
إقرأ المزيد: مفاهيم عامة في التداول: العناصر الرئيسية في السوق المالي
معادلة عائد الربح الرأسمالي
احنا بنستخدم المعادلة دي لما نكون عايزين نعرف العائد اللي هناخده على أساس الزيادة أو النقص في سعر السهم.
معادلة عائد الربح الرأسمالي = (P1 – P0) / P0
- P0 = سعر السهم لما استثمرنا فيه.
- P1 = سعر السهم بعد الفترة الأولى.
احنا بنشوف سعر السهم في البداية وسعر السهم في نهاية الفترة الأولى، وبعدين نقارن السعرين دول ونشوف الفرق بينهم. وبعد كده نحسب النسبة المئوية للفرق بناءًا على سعر السهم في البداية.
وكمان ممكن نكتب المعادلة بطريقة تانية زي كده:
معادلة عائد الربح الرأسمالي = (P1 / P0) – 1
مثال على عائد الربح الرأسمالي Capital Gains Yield
هناخد مثال عملي علي عائد الربح الرأسمالي – التعريف والمعادلة وازاي تقدر تحسبه بسهولة عشان نفهم الفكرة دي بالتفصيل:
“مريم” عايزه تعرف الفلوس اللي كسبتها على سهم معين بناءًا على الزيادة أو النقص في رأس المال، لاحظت إنها لما اشترت السهم كان سعره $105، بعد سنتين زاد سعر السهم لـ $120 للسهم الواحد، ياترى العائد الرأسمالي على السهم ده هيكون كام؟
كل اللي علينا نعمله هو نحط البيانات في المعادلة عشان نحسب العائد الرأسمالي:
- العائد الرأسمالي = (P1 – P0) / P0
- العائد الرأسمالي = ($120 – $105) / $105
- العائد الرأسمالي = $15 / $105 = 1/7 = 14.29%.
من خلال المعادلة دي هنعرف إن “مريم” كسبت 14.29% عائد رأس المال بعد سنتين من الاستثمار، ولو الشركة بتقدم أرباح موزعة، ممكن كمان نحسب عائد الأرباح الموزعة ونعرف العائد الكلي على الاستثمارات.
استخدام عائد الربح الرأسمالي
لكل مستثمر، عائد الربح الرأسمالي ده مقياس مهم جدًا، كتير من الشركات مبتوزعش أرباح، وفي الحالة دي، المستثمرين بياخدوا العائد الرأسمالي بس كعائد على استثماراتهم. بما إن العائد الرأسمالي ده ممكن يكون إيجابي أو سلبي, فبيأثر على العائد الكلي للمستثمرين.
مثلا, لو الأستاذ A حصل على عائد كلي 25% على السهم, ممكن يكون ده نتيجة عائد رأسمالي سلبي – 5% وعائد أرباح موزعة 30%. فهنا اللي بناخده في الاعتبار لما بنحسب العائد الكلي هو العائد الرأسمالي وعائد الأرباح الموزعة. واحنا اتعرفنا من شوية علي حساب العائد الرأسمالي، وعشان نحسب عائد الأرباح الموزعة, لازم نستخدم المعادلة دي:
عائد الأرباح الموزعة = الأرباح الموزعة السنوية / السعر.
عائد الربح الرأسمالي في Excel
هنعمل نفس المثال اللي فوق ده في برنامج الإكسل. الموضوع سهل جدًا، كل اللي عليك تعمله هو تحط البيانات في المعادلة زي ما هو واضح في الصورة دي.
مهم: العرض والطلب Bid-Ask Spread – افهم الفروق بين العرض والطلب وازاي تتداول بطرق صحيحة؟
الملخص
باختصار، ممكن نقول إن فهم عائد الربح الرأسمالي أمر بسيط وضروري جدًا في عالم الاستثمار. لإنه بيساعدنا نحسب العائد المحقق من استثماراتنا سواء في مشروع أو أصول مالية زي الأسهم والسندات وغيرها وده باستخدام المعادلات اللي اتكلمنا عنها، كمان عائد الربح الرأسمالي بيساعد في تقييم أداء الاستثمارات المختلفة واتخاذ القرارات المالية السليمة.