قصة نجاح تطبيق Instagram
بيقولك ياسيدى سنة 2010 فيه واحد اسمه ” كيفين سيستروم ” عمل تطبيق كدة للموبايل وسمّاه Instagram، وبيقولك بقى فى 2012، شركة Facebook إشترت انستجرام بمليار دولار أمريكى، طب أصدمك أكتر، النهاردة انستجرام يساوي في السوق 35 مليار دولار! طب ليه تطبيق يوصل للقوة دي في الفترة دي ؟ وليه شركة زى فيسبوك تشترى حاجة بقالها سنتين بس بالمبلغ ده كله ؟ ده اللى هنعرفه ليك النهاردة، وهنقولك علي قصة نجاح تطبيق Instagram، وليه نجح النجاح الكبير ده. وهنحاول نعرفك كمان إزاى تقدر تستفيد من قصة نجاحه فى شغلك.
قصة نجاح تطبيق Instagram
هنبدأ نتكلم دلوقتي عن :
- مؤسس تطبيق انستجرام.
- قصة ظهور التطبيق ده ونجاحه.
- وازاي تستفيد من القصة دي لصالحك.
مؤسس تطبيق انستجرام كيفين سيستروم
كيفين سيستروم درس علوم الإدارة فى جامعة ستانفورد، وبعد كدة إشتغل فى شركات كتير منها شركة ” Odeo ” اللى عملت تويتر، ومنها كمان شركة جوجل،
سيستروم كان كل يوم بالليل بعد شغله، وكمان فى الاجازات، كان بيشتغل على مشاريع صغيرة عشان يتعلم منها البرمجة لانه كان حابب موضوع البرمجة ده جدًا.
قصة ظهور تطبيق Instagram
فى 2009، ظهر ” تطبيق Foursquare ” اللى بيتيح للمستخدمين إنهم يعملوا Check-in فى الأماكن اللى بيروحوها من خلال موبايلاتهم. فى آواخر نفس السنة بقى بدأ كيفين يركز شوية فى موضوع البرمجة ده، وبدأ يشتغل على مشروع مُحدد وهو تطبيق للايفون بيتيح للمستخدمين إنهم يعملوا Check-in فى الأماكن اللى بيروحوها، وكمان يحددوا إيه هى الأماكن اللى ناويين يروحوها،
يعنى مثلًا المستخدم بيقول إنه دلوقتى فى الجامعة، وبالليل هيروح مطعم كذا مع فلان وفلان مع اصحابه، وكمان التطبيق ده ممكن من خلاله انك تحمل صور ليك انت واصحابك فى الأماكن اللى بتروحوها دى.
كيفين طلع نسخة تجريبية من التطبيق ده وطلب مع اصحابه يجربوه، وفعلًا اصحابه عجبهم جدًا التطبيق، وبدأوا فعلًا يستخدموه على طول.
بداية العمل علي تطبيق Burbn
كيفين سمّى التطبيق ده ” Burbn ” ، وقرر يشتغل عليه أكتر عشان يحسنه ويزود الـFeatures اللى فيه،
بس كان فيه مشكلة بسيطة وهي الفلوس. لحد اللحظة دى كان لسة بيشتغل فى شركة إسمها Nextstop، وكان طبعًا معظم وقته للشغل،
فقرر إنه لازم يلاقى مصدر تانى للدخل عشان يقدر يركز على التطبيق بتاعه. ومن هنا، بدأ كيفين سيستروم رحلة البحث عن مستثمرين،
وفى مارس 2010، قرر كيفين إنه يسيب وظيفته ويغامر فى مجال الـStartup، وبعد فترة قليلة كان كيفين قدر يقنع 2 مستثمرين بإنهم يدعموا مشروعه ده بـ500 ألف دولار.
كذلك بدأ كيفين يدور على حد يشتغل معاه، وفعلًا لقى الـCo-Founder المناسب، ” مايك كريجر ” ، مهندس برازيلى كان معاه فى برنامج تدريبى فى جامعة ستانفورد. بدأ كيفين ومايك يقّيموا التطبيق بتاعهم بشكل عام كده، ويشوفوا إيه اللى ممكن يعملوه عشان يحسنوا التطبيق ده أكتر.
كيفين ومايك لقوا إن Burbn فيه حاجات كتير بتخلى المستخدم متلغبط وتايه،كذلك لقوا إن الـFeature بتاعة الصور هى أكتر حاجة الناس بيستخدموها، فقرروا يبدأوا من الصفر، عملوا تطبيق جديد غير Burbn عشان قصة الصور دى بس، وسمّوه Instagram.
بعد كدة بدأوا يجربوه مع اصحابهم والناس اللى يعرفوهم وكده عشان يشوفوا إيه هى المشاكل اللى فيه ويظبطوها.
انطلاق تطبيق Instagram
وأخيرًا، يوم 6 أكتوبر 2010، الساعة 12 وربع الصبح، تم إطلاق تطبيق Instagram. كيفين ومايك كانوا متخيلين إن التطبيق هيقعد على الأقل 6 ساعات على ما الناس تاخد بالها منه ويبدأ حد يعمله Download.
بس اللى حصل إن فى خلال ساعات كان فيه أكتر من 10 آلاف شخص من العالم كله عملوا Download للتطبيق وبدأوا يستخدموه فعلًا، وتانى يوم الصبح كان كيفين فى المكتب بيزود الـCapacity أو سعة الإستخدام بتاعة التطبيق عشان يستحمل عدد المستخدمين الكبير اللى بدأ ينمو بسرعة جدًا.
وبعد 3 شهور بس من إطلاق Instagram على الـApp stores المختلفة، وصل عدد المستخدمين لأكتر من مليون شخص.
كذلك مع بداية 2011 بدأ المستثمرين ياخدوا بالهم من صعود Instagram،
وفى شهر فبراير 2011 مجموعة مستثمرين قرروا يستثمروا 7 مليون دولار فى الشركة الناشئة. وفى نفس السنة وصل عدد المستخدمين لحوالى مليون و750 ألف مستخدم، بيحملوا حوالى 300 ألف صورة فى اليوم،
وتم تقييم شركة Instagram بقيمة 20 مليون دولار.
تخيلوا كدة شركة بالحجم ده فيها كام موظف ؟ 10 موظفين بس !
شركة Instagram كان فيها 10 موظفين بس لحد بداية 2012، بدأوا يعينوا موظفين جداد، ووصل عدد المستخدمين لأكتر من 30 مليون مستخدم.
النهاردة، Instagram عليه أكتر من 300 مليون مستخدم من العالم كله، وفيه أكتر من 20 مليار صورة.
ازاي تستفيد من قصة نجاح تطبيق Instagram ؟
تعالوا بسرعة كدة نشوف إيه اللى ممكن نتعلمه من القصة دي :
- كيفين لما لقى نفسه بيحب البرمجة مقعدش يقول بقى أنا مش درستها فى الكلية يبقى خلاص مش مشكلة اني اتعلمها، لأ قرر إنه يتعلم البرمجة وإتعلمها فعلًا.
- كيفين لما قرر يعمل Application مقلدش حد، هو اه عمل حاجة كان فيه زيها قبل كدة، بس أضاف حاجة جديدة اللى هى موضوع الصور ده، ولما لقى الناس بتتفاعل معاه قرر إن التطبيق بتاعه يبقى مجرد صور وبس، ويمكن ده يكون سر نجاحه !
- فى الوقت المناسب، كيفين قدر ياخد قرار إنه يسيب شغله ويتفرغ للـStartup بتاعه. وده قرار مهم جدًا فى حياة أى Entrepreneur، بس المهم تاخد القرار ده فى الوقت الصح.
- كذلك كيفين فى الوقت المناسب بردو لقى الـCo-Founder المناسب، عشان مفيش حد بيعمل كل حاجة لوحده.
- وأخيرًا، قدر يقنع المستثمرين بمشروعه ده، وقدر كمان يتابع نمو المشروع ويحافظ على نجاحه.
دي تعتبر أكتر الحاجات اللي كانت سبب في نجاح تطبيق الانستجرام وشهرته قبل حتي ما شركة الفيس بوك تشتريه،
بعد كده الفيس بوك أخد باله من التطبيق ده وأنه لسه هينجح أكتر وأكتر،
وده نتيجة للافكار الجديدة اللي ضافها كيفين في التطبيق واللي عجبت الناس وخلت فيه اقبال كبير علي استخدام تطبيق Instagram.
ذو صلة:
كذلك متنساش تتابع الموضوعات الجديدة من خلال صفحة باش محاسب علي فيسبوك :