ازاي تكون غني: ملخص كتاب I Will Teach You To Be Rich
ملخص كتاب I Will Teach You To Be Rich بيقدملك نصايح تساعدك توفّر فلوس بشكل تلقائي وفي نفس الوقت بيسمحلك تصرف على الحاجات اللي بتحبها من غير ما تحس بالذنب، يعني تقدر تكون غني وتعيش الحياة اللي بتحلم بيها بشكل مستقل ومريح، راميت سيثي مؤلف الكتاب كان طفل هندي صغير وعبقري، دلوقتي بقى واحد من أكبر خبراء التدبير المالي الشخصي في القرن الواحد والعشرين، بدأ بمدونة في سنة 2004 بقت إمبراطورية بملايين الدولارات، بيبيع عليها كورسات وحصص تدريبية بفلوس كتير، كل ده عن طريق الإيميل.
ومن أهم الحاجات اللي ممكن تتعلمها من الكتاب ده هي:
- إنك انت اللي مسؤول عن مشاكلك المالية.
- اعرف حجم الفلوس اللي بتدخلك، وبعدين حوّلها بشكل اوتوماتيك للمكان اللي عايزها توصل ليه.
- ابدأ استثمارك دلوقتي، حتى لو كان استثمارك ده دولار واحد بس.
المهم في البداية إنك تجرب وتتعلم، مهما كان مستواك، بدل ما تستنى تحترف وتكون خبير في الحاجة وبعدين تبدأ.
راميت سيثي
إقرأ المزيد: إزاي تدخل معركة الفوركس وأنت مطمئن؟
الدرس الأول: ابدأ اتحمل مسؤولية فلوسك
زي كتاب الأب الغني والأب الفقير، الكتاب ده بيبدأ بفكرة ضروري تكون عارفها، وهي إنه لازم تبدأ تتقبل إنك انت اللي بتتحكم في فلوسك، أغلب الناس بيتفقوا إنه “لازم نمارس رياضة أكتر” أو “لازم نبطل الأكل الزيادة”، حتي لو مش عارفين يغيروا فعلا من نفسهم، على الأقل الوعي موجود. بس هل سمعت حد قبل كده قال: “أنا حقيقي محتاج أتعلم إزاي أدير فلوسي بشكل أفضل.”؟ نادر جداً، لان محدش بيحب يعترف إنه مش كويس في إدارة الفلوس، علي الرغم إنه في الحقيقة في ناس كتير بتعاني من الموضوع ده.
صحيح، في ناس كتير وعوامل أكتر ممكن نحملهم مسؤولية ده، زي وسائل الإعلام اللي بتلخبط دماغك بمعلومات متناقضة. ونظام التعليم اللي مبيعلمكش إزاي تصرف فلوسك أو حتي توفّرها، ولا حتى تستثمرها، بس المبررات هتفضل مجرد مبررات، مهما كانت صح، التوفير والاستثمار بيخوف، وممكن تخسر فلوس، بس الأحسن إنك تخسر دلوقتي، مش قدام.
كل ما كنت صغير في السن، كل ما كان ممكن تحمل المخاطرة أكتر، لأنه لسه سهل عليك تكسب الفلوس تاني، وعلى الرغم من إنه هياخد وقت عشان تشوف النتايج، بس لو مش بتقدر تستثمر كتير، مش مهم قوة الفايدة التراكمية، بمعني لو عملت استثمار صغير واخدت فلوس بتزيد عليه، هتلاقي إن دخلها هيزيد بعد فترة، فمهم تفهم إن لما تفضل في الاستثمار ده ومش تتخلي عنه حتى لو كانت الفلوس قليلة، ده هيعمل فرق كبير في المستقبل، عشان كده لازم تبطل أعذار وتبتدي تتحمل مسؤوليتك عن فلوسك الخاصة، ده الأساس عشان تبدأ تحقق ثروتك وتكون غني.
الدرس التاني: خصص مبلغ ثابت من مرتبك واستخدمه بشكل تلقائي عشان تحقق أهدافك
الواحد ممكن يقعد كل شهر يحسب ويشوف هيصرف كام على إيه، وأغلبنا مبيحبش يعمل كده، عشان كده مؤلف الكتاب بيقترح خطة إنفاق واعية، يعني تخصص جزء من فلوس المرتب وتصرفهم بشكل تلقائي على الحاجات المهمة اللي أنت محتاجها.
مثال توضيحي
يعني مثلًا خد 60% من دخلك وادفع بيهم المصاريف الثابتة زي الإيجار والفواتير والاكل وقسط بطاقة الائتمان، وخد 10% واستثمرهم في الأسهم أو في حساب التقاعد الخاص بيك، أو في حساب الجمعية التعاونية للتقاعد، وخد 10% كمان وادخرهم عشان تقدر تسافر أو تشتري هدايا للأعياد أو تستعملهم في الحالات الطارئة، في الاخر هيفضلك 20% من فلوسك، واللي هتقدر تصرفهم في أي حاجة بتحبها، من غير أي ضغوط أو شعور بالذنب.
خلي العمليات والدفعات دي تتحول اوتوماتيك، فمثلًا لو أنا بدخر 50 جنيه كل شهر، وده اللي بيتسحب تلقائي من حسابي في اليوم الأول، كدا بقدر أتأكد إني بدخر على الأقل 600 دولار في السنة، ومفيش فرصة إني أصرف الفلوس دي بالغلط، زي أي عادة، لما بنتخلي عن الحاجة للإرادة، بيبقى أسهل بكتير نعملها صح.
الدرس التالت: ابدأ الاستثمار من دلوقتي
الاستثمار صعب، لازم تقرأ كتب، وتتكلم مع الناس، وتتعلم بنفسك، بعد كده هتندم كل يوم تفوته من غير ما تبدأ تستثمر لما تكبر، طب ليه؟ فيه مثال كويس بيوضح الكلام ده بالأرقام.
لو افترضنا إنك استثمرت 5000 دولار كل سنة (واللي بيساوي 417 دولار في الشهر) لمدة 10 سنين، من عمر 25 لعمر 35 وبعدين متستثمرتش تاني بعد كده، هتكون معاك فلوس أكتر في التقاعد، أكتر من أي حد تاني بيبدأ يستثمر ويدفع 5000 دولار كل سنة من عمر 35 وحتى لما يتقاعد، الشخص اللي بدأ في 25 سنة هيستثمر 55,000 دولار وهيوصل لـ 615,000 دولار (بفرضية عائد سنوي 8%، وهو قريب من متوسط عائد سوق الأسهم في السنة)، والشخص اللي بيبدأ في 35 سنة هيستثمر 130,000 دولار وهيوصل ل 431,000 دولار.
فهمت المدى اللي ممكن يتحقق فيه الفرق؟ بتقدر تستثمر أقل من نص المبلغ وتجيب أكتر من مرة ونص من فلوس التاني! كل ده بس لما تبدأ قبلها بـ 10 سنين، حقيقي فايتك كتير ولازم تبدأ الاستثمار دلوقتي.
مهم: 8 حاجات مهم تعرفها عشان تنجح في تداول الفوركس
الكتاب ده بننصح بيه للخريج اللي عمره ٢٤ سنة واللي بيصرف كل فلوسه على الفيديو جيمز والأكل الجاهز، والست اللي عمرها ٣٥ سنة وقاعدة على كومة فلوس ومش عايزة تخسرهم، وأي حد بيحمل التاني مسؤولية إنه عايز فلوس.