ازاي تدير رأس مالك في تداول الفوركس؟

إدارة فلوسك في التداول في البورصة بشكل عام والفوركس بشكل خاص هي حاجة مهمة جدا لو عايز تكسب فلوس وتخسر بنسبة أقل، لازم تفهم إنك مش هتكسب في كل عملية تداول هتعملها ومش منطقي كمان إن كل التحليلات اللي تعملها تبقى ناجحة ١٠٠٪، خصوصا لو انت عندك معرفة بالتحليل الفني والأساسي.

الحقيقة إن السوق مش بيتبع حتى التحليل الفني والأساسي بس، فيه عوامل تانية كتير ممكن تأثر على حركة السوق زي الأزمات العالمية أو الأحداث المفاجئة أو الصدمات اللي ممكن تحصل فجأة، وده ممكن يخليك تحس إنك ضايع لو خسرت عملية تداول كنت متأكد إنها هتنجح بس مش مشكلة، السوق كده دايما، مرة تكون كسبان ومرة تانية خسران.

إقرأ المزيد: أسرار التداول الناجح في سوق البورصة

طب ازاي ممكن أدير رأس المال بتاعي صح عشان أقدر اتداول وأكسب أكتر؟، فيه شوية حاجات كده لازم تكون علي علم بيها عشان تقدر تدير رأس مالك بشكل فعال وهي:

1- افهم خطورة السوق قبل ما تدخل في التداول

قبل ما تفكر تحد الأرباح اللي هتكسبها من التداول، لازم تفهم مخاطر السوق والتداول فيه، هو ده مش حاجة زي دخول المغارة عند علي بابا وتطلع منها بأحلامك متحققة ومعاك ثروة في يوم وليلة، بجد التداول في الفوركس ممكن يحققلك أهدافك وأحلامك، بس زي أي مجال استثماري فيه مخاطر خسارة. السوق بيتقلب في أي وقت، فبناء على ده لازم تتحكم في مشاعرك وقت التداول، وتتجنب المخاطرة بكل حاجة في صفقة واحدة وتفكر دايما بإن مفيش حاجة اسمها صفقة ناجحة 100%.

2- قبل ما تفكر في الربح، فكر في الخسارة

اضحك واتفائل لكن توقع الأسوأ في البورصة، قبل ما تدخل صفقة فكر في ازاي تقدر تخرج منها بأقل خسارة، متفكرش في الربح اللي ممكن تكسبه في الاول، مثلا لو كنت بتدخل 5 صفقات في اليوم الواحد وخسرت 2 منهم بـ 100 نقطة خسارة، وربحت 3 صفقات تانية بـ 150 نقطة مكسب، يبقى صافي ربحك 50 نقطة، وده هو اللي بيخليك تطلع من البورصة فرحان، فعلا ده المبدأ الأساسي لإدارة رأس المال في البورصة.

تتخيل لو دخلت صفقة ومنزلتش أمر وقف الخسارة وانت رايح شغلك أو مش موجود قدام الجهاز والسعر بيتحرك ضد صفقتك وبيروح فى اتجاه معاكس، تقدر تتفاجئ إن الصفقة مش بس خسرت فلوس بس، الصفقة خسرت كل رأس مالك، ودي حاجة مخيفة!

الالتزام بوضع هدف معين وأمر تحقيق الربح عند السعر اللى انت متوقعه للعملة أو الأداة المالية ده أكيد بيحمى رأس مالك من أي انعكاسات ممكن تحصل. ووضع أمر تحقيق الربح “تيك بروفيت” مش أقل أهمية من أمر وقف الخسارة “ستوب لوس”.

3- مش تتداول بشكل عشوائي

الأفضل انك متتداولش عشوائي في البورصة والأسواق المالية، مفيش نجاح بيحصل عن طريق الصدفة في الاستثمار والتداول، نادراً ما الناجحين في المجال ده كانوا بيتداولوا عشوائي، ممكن الحظ يبان في صالحك في بعض الأحيان، بس مش بيحصل كل مرة.

متقولش إن البورصة عشوائية، حتى سوق الفوركس الكبير بيتحكم فيه بنظام، لازم تحدد أهداف واضحة، وتتعلم المجال كويس وبشكل متواصل، وتحدد استراتيجيتك في التداول، ولازم التداول يكون بطريقة صحيحة ومدروسة عشان تحقق النجاح في المجال.

4- مهما كنت واثق إن صفقتك هتنجح، متدخلش بنسبة أكبر من 5% من رأس مالك في صفقة واحدة

الحاجة دي غلط تمامًا في إدارتك لرأس المال، مفيش حاجة في التداول والاستثمار مضمونة 100%، حاول تدخل في كل صفقة بنسبة 5% بس من رأس المال، فلو دخلت 5 صفقات هتبقى استخدمت ربع رأس المال بس، ولو خسرت الـ 5 صفقات هتكون عندك 75% من رأس مالك باقي علشان تعوض الخساير وتحقق الأرباح في فرص أفضل في السوق.

5- اتحكم في مشاعرك وماتخليهاش تسيطر عليك لما تتداول

في بعض الأحيان بنبقى عاوزين نجيب فلوس أكتر وده بيخلينا نفتح صفقات زيادة عن اللزوم ونعّرض رأس المال للخطر، أو نحس بالخوف والقلق لما صفقة بتخسر، لو مشينا ورا المشاعر دي هتلاقي إن قراراتنا غير مدروسة، وبنفتح صفقات زيادة عن الحاجة ونقفل صفقات في وقت غلط، بس لو مشينا ورا خطة محددة لكل صفقة وحددنا وقف الخسارة، هنكون أكتر هدوء واستقرار وهنقدر نحلل الأمور بشكل صحيح وناخد قراراتنا بحكمة وبتركيز.

تفتكر ايه أفضل ليك؟ تسيب مشاعرك هي اللي تسيطر علي تفكيرك وممكن تكون سبب في انك تاخد قرارات غلط وتكون سبب في الخسارة؟ ولا تسيطر أنت عليها وتكون هادي عشان تقدر تكون مركز أكتر وتعرف تاخد قرارات صح ده حتي لو خسرت صفقتك فأنت في الاخر هتقدر تعوضها بواحدة تانية؟

خلاصة القول

القاعدة الأساسية للفوز في سوق تداول الفوركس ده هي إدارة فلوسك صح، متيأسش ولا تتشائم لو خسرت فلوس في صفقة، ومش توقف أبدا انك تتعلم مهما كانت خبرتك ونجاحاتك وعدد الصفقات اللي فزت بيها.

مهم: التركيز على الخروج في التداول وتفادي الخساير

إدارة الكاش هي الأساس الحقيقي لفوزك في التداول، وخلي بالك دايما، وحافظ على فلوسك واستمر في التداول لان الاستمرار هو طريق وصولك لفرص جديدة، وافتكر إن خسارة صفقة واحدة ده مش معناه إن الحياة اتقفلت، والفوز في صفقة واحدة مش معناه إنك هتفوز في كل صفقة، وميزان نجاحك في التداول هو إنك تكون كسبت في صفقات أكتر من اللي خسرت فيها في نهاية الأسبوع أو الشهر أو السنة.

ودي صفحتنا علي فيس بوك عشان تقدر تتابع كل جديد بينزل عليها.