إزاي تكون محلل أعمال ناجح في سوق العمل؟

لو انت عاوز تبقى محلل أعمال “Business Analyst” بس مش عارف هيكون مناسب لموهبتك وتوقعاتك ولا لأ.
التدوينة دي هتعرفك كل حاجة عن المفاهيم الأساسية في تحليل الأعمال، وهتفيدك تعرف الخطوات المطلوبة عشان تكون Business Analyst ناجح.

مين هو محلل الأعمال “Business Analyst”؟

محلل الأعمال هو اللي بينصح بالحلول للشركة، وبيوصلها بالموارد التقنية عشان تزود كفاءتها، هو كمان بيشتغل زي الجسر بين التقنية والأعمال، بيجمع ويقّيم بيانات التحليل، وبيحدد الاحتياجات، وبيقدم توصيات وحلول للتنفيذيين.

ايه هي المهارات المطلوبة عشان تكون محلل أعمال؟

شغل الـ Business Analyst بيحتاج منك إنك تكون مؤهل في مجالات كتير، بيتوقع منك إنك يكون عندك مهارات معينة زي التواصل والقدرات الفنية والمهارات التحليلية ومهارات التفاوض.

التواصل

الـ Business Analyst لازم يتفاعل مع ناس من أقسام مختلفة في الشركة، وكمان مع العملاء في كل مرحلة من شغله، فلازم يكون عنده مهارات في اللغة والتواصل الكتابي، والأهم إنه يكون حد ممتاز في الاستماع وبيتعامل مع العملاء بطريقة ودية، وكمان يقدر يعبر عن نفسه بجمل مختصرة عشان يتواصل بشكل فعال مع أي حد حواليه.

القدرات الفنية

في شوية مهام بيعملها محلل الأعمال مش محتاجة خبرة كبيرة في أنظمة المعلومات أو متطلبات التقنية، بس في الغالب أجزاء كتير من الحلول اللي بيوصّي بيها الـ Business Analyst لازم تعتمد على البرامج والتطبيقات، فمحلل الأعمال مش متوقع منه إنه يكون خبير تقني، لكن لازم يكون عنده فهم عام لأنظمة البرامج وقادر يستخدم أحدث التقنيات المتاحة، عشان يختار أفضل الخيارات اللي الموقف بيحتاجها، وكمان يتابع كل الخطوات اللي بيتم اتخاذها عشان نوصل لأفضل حل.

المهارات التحليلية

أهم حاجة في شغل الـ Business Analyst هي تحليل وتفسير أنواع مختلفة من البيانات، وترجمتها، وتحديد المناطق اللي فيها مشاكل، وياخد الخيارات الصح من الحلول المختلفة، بمعني أنه لازم يكون عند الـ Business Analyst مهارات تحليلية قوية عشان يقدر يقّيم البيانات ويتأكد إن الحلول اللي بيوصّي بيها هتحقق الأهداف بكفاءة.

مهارات التفاوض

محلل الأعمال متوقع منه إنه يحافظ على التواصل مع مختلف أنواع الناس، زي العملاء والمطورين والمستخدمين والإدارة وفريق تقنية المعلومات، وفي نفس الوقت اللي بيشتغل فيه على انه يلاقي أفضل الحلول للعملاء، لازم يشتغل لمصلحة الشركة كمان، عشان كدا لازم يكون عنده مهارات إقناع ومهارات توازن عشان يقدر يحافظ على وجود اتصال صحيح بين الشركة والعملاء.

مستويات محللين الأعمال

شغل الـ Business Analysis بينقسم لـ 3 فئات على حسب المهارات، والمؤهلات، والخبرة اللي محتاجينها.

المستوى المبتدأ

شغل الـ Business Analysis اللي في البداية بيكون في مجالات تطوير البرمجيات وضمان الجودة، الـ Software Developers اللي بيشتغلوا في المجال ده لازم يكون عندهم مهارات تقنية مطلوبة عشان يقدروا ينشئوا برمجيات، ومهارات اتصال مطلوبة عشان يقدروا يتواصلوا مع الأشخاص المهتمين وأصحاب المصلحة.

اللي بيشتغلوا في مجال ضمان الجودة بيشتغلوا على تطوير البرمجيات عشان يتأكدوا إنها بجودة عالية، فلازم يكونوا قادرين يشتغلوا بكفاءة في فريق واحد، وبما إن ده شغل للبداية، فالشركات غالبا بتتوقع من الناس اللي مقدمة إنهم يكونوا خريجين بكالوريوس في تخصصات زي التمويل، إدارة الأعمال، أو تطوير البرمجيات ويكون عندهم خبرة بين 0-3 سنين.

المستوى المتوسط

شغل تحليل الأعمال للمستوى المتوسط، فيه محلل الأعمال في تقنية المعلومات، ورائد أو مدير تحليل الأعمال.

محلل الأعمال في تقنية المعلومات، بيحتاج لمهارات تحليل البيانات والاتصال، يعني بيعمل زي قناة بين فريق تقنية المعلومات وأصحاب المصلحة، كمان لازم يكون بيعرف يستخدم آخر التقنيات الموجودة واستخدام إبداعهم للوصول للحلول.
رائد أو مدير تحليل الأعمال، لازم يكون عنده معرفة كبيرة بعمليات الأعمال والمال اللي الشركة بتمر بيها، كمان لازم يكون عنده خبرة بين 3-8 سنوات مع درجة البكالوريوس في مجال الأعمال، ودرجة الماجستير هتساعدك أكيد انك تاخد الوظيفة.

المستوى العالي

شغل تحليل الأعمال في أعلى المستويات بيتقسّم لأنواع كتير، زي محلل متطلبات العمل، محلل العمليات، محلل القرار، محلل أنظمة الأعمال، محلل وظيفي، وعشان تاخد وظيفة في المستوى ده لازم تكون خريج كلية IT أو تجارة، وتكون عايز تكمل طريقك في مجال تحليل الأعمال، وتكون عندك خبرة ومعرفة في كل جوانب عمليات التحليل المالي والأعمال.

كتب لازم كل محلل أعمال يقرأها

إزاي تكون محلل أعمال ناجح في سوق العمل؟ — كتب لازم كل محلل أعمال يقرأها

Babok (Business Analysis Body of Knowledge) من IIBA.
الكتاب ده بيعرفنا على 6 مهام مختلفة لمحللي الأعمال، وبيشرح أساسيات المهام الأكتر أهمية، فالكتاب ده لازم يكون عند كل محلل أعمال عشان يلجأ ليه في أي وقت لو واجه مشكلة في شغله.
The PMI Guide to Business Analysis من Project Management Institute.
ده بيوجّه اللي بيقرأه عشان يحسّن ممارسات تحليل الأعمال بشكل عام، والمعلومات اللي بيقدمها ممكن تُستخدم في أي شركة وفي أي صناعة.
Business Analysis for Practitioners: A Practice Guide من Project Management Institute.
ده بيدي نصايح عملية لحل المشاكل المرتبطة بمتطلبات المشروع، الكتاب ده مفيد أوي للمبتدئين في تحليل الأعمال عشان بيعرفهم على المشاكل المحتملة اللي ممكن تقابلهم وطرق حلها.
CBAP/CCBA Certified Business Analysis Study Guide, 2nd Edition من Susan Wesse و Terri Wagner.
ده بيدي دليل لامتحان شهادة CBAP اللي ممكن يساعدك أوي في مسيرتك المهنية، بس حتى لو مش مهتم بالشهادة، فالكتاب ده شامل وبيقدم معلومات عن كل حاجة ليها علاقة بتحليل الأعمال.
Agile and Business Analysis من Lynda Girvan و Debra Paul.
أما الكتاب ده بيقدم Agile methodologies اللي هي نموذج تطوير البرمجيات، الكتاب ده مفيد أوي للي عاوز يتعلم ممارسات الـ Agile في حقل تحليل الأعمال.

التعليم والتدريب

لو عايز تشتغل Business Analyst، محتاج يكون عندك بكالوريوس في الإدارة والأعمال على الأقل، وغالبية الشركات بتفضّل الناس اللي عندهم ماجستير في المجال ده، والأفضل إنك تشترك في برامج تدريبية أو تدريب عملي عشان تتعلم الشغل ده عشان الخبرة مهمة أوي.

كمان ممكن تبدأ من وظيفة في مستوى مبتدأ عشان تجّمع خبرة وتفهم المجال أكتر، والوقت اللي هتقضيه في الوظيفة دي هيساعدك تكسب مهارات جديدة وتقرر في انهي مجال في الشغل الاهتمام فيه بيكون أكبر، بعد كدا هتقدر تطور نفسك وتبدأ تشتغل في وظايف في مستوى متوسط وعالي.

الشهادة

الشهادات مش مهمة بس ممكن تساعدك تتميز عن باقي الناس اللي مقدمة على الوظيفة، فيه برامج شهادات مختلفة في مجال تحليل الأعمال بتقدمها منظمات مختلفة، البرامج دي بتساعدك تركز على مواضيع معينة وتحترفها، وفي نفس الوقت بتشمل عضوية في الجمعية المهنية اللي هتساعدك تتعرف على خبراء تحليل الأعمال وتبني شبكة علاقات.

مؤشرات الأداء الرئيسية (KPI’s)

عشان الـ business analysts بيقيسوا إنجازاتهم وبيحافظوا عليها، لازم يستخدموا مؤشرات أداء معينة، والـ KPIs الأكتر أهمية فيها:

مؤشرات الأداء الرئيسية لتحسين عمليات الأعمال

من أهم العوامل اللي بيتم قياسها في تحسين عمليات الأعمال هي:

زيادة إنتاجية عملية الأعمال: ايه الزيادة اللي حصلت في إنتاجية العملية بسبب النظام الجديد.
تقليل وقت الدورة: ايه الفترة اللي نقصت بسبب النظام الجديد.
تخفيض التكاليف: ايه الأموال اللي اتوفرت بسبب النظام الجديد.

مؤشرات الأداء لإدارة المشاريع

الوقت: الوقت اللي محتاجه محلل الأعمال عشان يفهم المشكلة ويجيب حلولها، وكمان الوقت اللي هيستخدمه في الإعادة والتعديلات.
الانحراف: نسبة الانحراف عن خطة محلل الأعمال في الوقت وتنظيم العمل.

فعالية جودة مؤشرات الأداء الرئيسية

المساهمة: الفكر اللي محلل الأعمال أضافه للحل.
الكفاءة: قدرة محلل الأعمال على توفير المصاريف واستغلال الميزانية بالشكل الصحيح وقت العمل على المشروع.

مؤشرات رضا أصحاب المصلحة

بيتم استخدام مؤشر رضا أصحاب المصلحة عشان نقيس رضاهم عن الحل اللي اتوصل ليه محللين الأعمال.

مسؤوليات محلل الأعمال

المسؤولية الأساسية لمحلل الأعمال هي تحليل وتفسير البيانات واستخلاص التغييرات المطلوبة في عمليات الأعمال والأنظمة المعلوماتية والسياسات لزيادة الكفاءة والإنتاجية والربحية للمؤسسة، كمان محللين الأعمال لازم يشوفوا أفكار جديدة ويصمموا برامج، ويطوّروها وينفذوها ويتحكموا فيها عشان يتأكدوا إنها بتشتغل بشكل كويس.

لما محلل الأعمال بيعمل شغله، بيتعامل مع عدد كبير من الأقسام في الشركة، فمهمته إنه يتأكد إن الاتصال بينهم شغال صح، وكمان يتوقع ازاي العملاء هيتصرفوا عشان يضمن إنهم راضيين، كمان لازم يتأكد إن الشركة بتحقق أرباح، ويبلغ الإدارة عن أي معلومات مهمة.

مهام محلل الأعمال

أهم مهامه هي:

إعداد تحليل شامل للأعمال وتحديد احتياجات المنظمة.
تطوير مؤهلات وحدة تكنولوجيا المعلومات لتحسين كفاءة الأعمال.
إعداد تقارير مالية وتوقعات.
تحديد المشاكل والخروج بحلول مناسبة.
تفسير تحليلات البيانات والإبلاغ للأطراف المعنية.

مرتبات محللين الأعمال

المرتب اللي بتجيبه كمحلل أعمال بيتغير حسب خبرتك ومكانتك في الشركة بشكل كبير.

مبتدأ: المطورين اللي بيدخلوا الشركة بياخدوا مرتب 57000 دولار تقريبا، واللي شغالين في ضمان الجودة بياخدوا مرتب 44000 دولار في السنه.
مستوى متوسط: مرتب محللين أعمال تقنية المعلومات بين 46000 و 85000 دولار، وبياخد كبار محللين الأعمال بين 56000 و 98000 دولار في السنة.
أعلى المستويات: بياخد كبار محللين صنع القرار ما بين 37000 و 117000 دولار، وبياخد كبار محللين نظم الأعمال ما بين 34000 و 88000 دولار، وبياخد مدير العلاقات في المتوسط 46000 دولار في السنة.

أدوات محلل الأعمال

محللين الأعمال لازم يستخدموا أدوات معينة علشان يتابعوا ويديروا ويوصفوا المتطلبات ويتعاونوا مع أعضاء الفريق وأصحاب المصلحة، والأدوات اللي لازم تستخدمها كمحلل أعمال هي:

المتطلبات الحديثة

“Modern Requirements”، دي الأداة الرئيسية للشركات عشان بتوفر طريقة سهلة لتجميع، وتعريف، وتحليل المتطلبات، الأداة دي بتدعم الرسم البياني، والمحاكاة، والمستندات الذكية، والحالات الاستخدامية، وتحليل الروابط، والأساسيات، وإدارة المراجعات، ومجموعة متنوعة من أدوات الاستدلال.

برنامج Adobe Acrobat X

“أدوبي أكروبات X” بيسمحلك تعمل، تعدل، وتوزع ملفات PDF، دي أداة مهمة أوي في كتابة التقارير والمستندات اللي مرتبطة بالمشاريع.

برنامج Blueprint

برنامج كل محلل أعمال محتاجه، البرنامج ده بيقدم ليك لوحات تحكم سهلة الاستخدام وأدوات تقارير مفيدة أوي عشان تقدر تبني التطبيقات، كمان البرنامج بيقلل من مخاطر الامتثال التكنولوجي عشان بيوحد استخدام الامتثال المعتمد.

أداة Axure

هي أداة بيستخدمها المحترفين في مجال الأعمال في كل دول العالم، الأداة دي بتحول أي مشروع ليك لـ HTML، وبتديلك اللينك اللي بتقدر تشاركه وتوصله بسهولة، كمان الأداة بتسمح لأعضاء الفريق إنهم يشتغلوا في نفس الوقت على المشروع.

أداة Smart Draw

دي أداة تحليل أعمال بتساعد في إدارة المشاريع، الأداة بتسمح للمستخدمين إنهم يرسموا أنواع مختلفة من الرسومات والمخططات اللي بتكون من أهم مهام محللين الأعمال، بتقدر تدمج الأداة دي مع أدوات تانية زي مايكروسوفت أوفيس، دروب بوكس، جوجل درايف، أو ون درايف، علشان تزيد من إمكانياتها.

Excel

من بين الأدوات اللي محللين الأعمال بيحتاجوها، إكسيل هي الاساس في الادوات دي، لازم هتتعامل مع أنواع مختلفة من الوظايف وإكسيل هيساعدك في كل جزء منهم تقريبًا، ودي بعض الوظايف في إكسيل اللي بيستخدمها محللين الأعمال بشكل كبير:

VLOOKUP: بتساعدك تدمج بين اتنين من البيانات مختلفين في data sets واحد، باستخدام وظيفة تانية.
Pivot Tables: دي أداة بنستخدمها لمعالجة البيانات، بتسمحلك بتلخيص وتنظيم وتجميع أو عدّ البيانات المتخزنة في قاعدة بيانات.
COUNTIFS: الوظيفة دي بتديك عدد الخلايا اللي بيكون فيها واحد أو أكتر من المعايير زي التواريخ والأرقام والنصوص أو غيرها من الشروط.
INDIRECT: دي الوظيفة اللي بيستخدمها محللين الأعمال عشان يرجّعوا مرجّع لمجموعة من الخلايا.
MATCH: دي الوظيفة اللي بيستخدمها محللين الأعمال عشان يحددوا مكان القيمة المطلوبة في الجدول.
HLOOKUP: دي الوظيفة اللي بيستخدمها محللين الأعمال عشان يلاقوا البيانات المطلوبة من صف مُحدد في الجدول.

مهم: مين هو المحلل المالي الفاهم والهدف منه؟

في النهاية

محلل الأعمال لازم يشتغل في مجالات كتير ومنها تكنولوجيا المعلومات، لازم يكون عنده معرفة كويسه بالبرامج والأدوات اللي بيستخدمها عشان يكون ناجح، ومن ضمن الأدوات اللي مهمة أوي، اللي موجودة في إكسيل.

اذا كنت حابب تسأل عن أي حاجة بخصوص محللين الاعمال والوظايف المختلفة بتاعتهم ممكن تتواصل معانا.