أنظمة التداول الفعالة: تقنيات وأساليب لتحسين أدائك في السوق المالية

معظم استراتيجيات ومناهج التداول بتحقق نجاح بنسبة 70% في أحسن حالاتها، لو اتصممت صح للتداول في السوق، ومش كل استراتيجيات التداول بتضمنلك النجاح خالص، وفي الحقيقة كل متداول بيعاني من خساير بين فترة والتانية، وده بيعتمد على خبرته واستراتيجيته وتحليله للسوق، فالأفضل إنك تتعلم أنظمة التداول الفعالة وأساسيات التداول وتحاول تطور استراتيجية تكون مناسبة لاهتماماتك وأهدافك، وكمان تدرب نفسك على التحليل الفني والأساسي والتحكم العاطفي، وتحدد نسبة المخاطرة المناسبة وتديرها بشكل كويس، ده هيزود فرصة نجاحك، لكن مش هيضمنلك النجاح بنسة 100%.

إقرأ المزيد: إزاي تستثمر في سوق المال – أفكار وارن بافيت

مراحل استراتيجيات التداول

• المرحلة اللي بيتحرك فيها السوق في اتجاه واحد بشكل مستمر، واللي بتقدر تحدد الاتجاه ده وتتبعه هي (المرحلة الاتجاهية) “TREND“.
• المرحلة اللي بيتحرك فيها السعر بين مستويين أفقيين بشكل عرضي متذبذب هي (المرحلة العرضية) “Sideways“.
• المرحلة اللي بيبدأ فيها السعر يدي إشارات لنهاية اتجاهه الحالي هي (المرحلة الانعكاسية) “Reversal“.

أحب أقولك انه مش سهل إن المتداول ينجح في التداول في السوق في التلات مراحل دي بنفس الاستراتيجية، بيحصل كتير إن الاستراتيجيات بتنجح في مرحلة واحدة وبتفشل في التانية، وممكن تتغير وتتحول في السوق من مرحلة للتانية، والمتداولين في الأسواق المالية بيعتمدوا بشكل كبير على التحليل الفني، وبيتوقعوا إن الأنظمة الخاصة بيهم بتضمن ليهم الربح المستمر لو هما اتبعوها، بس طبيعي إن ده مش صح، حتى لو كانت الصفقة بتكسبك في أوقات، لازم تتوقع إنها ممكن تكون خسرانة في النهاية.

أسباب الخسارة

أهم أسباب الخسارة في السوق، هي:

الدخول بطريقة غلط (mis-Entry) & (Bad Entry)

في أوقات كتير بيبقى فيه أخطاء تخلي المتداول يدخل في صفقات خطأ، وبعض الناس بيشوفوها أخطاء بسيطة، بس هي في الحقيقة مؤشر على ضعف المتداول في التداول، والأسباب الرئيسية للدخول الخاطئ هي:

• الضغط على زرار التداول بشكل خاطئ، وبيتم الدخول في صفقة معاكسة للصفقة المطلوبة، ودا بيحصل كتير في حالات ارتفاع وانخفاض قوي السوق، والمتداول ساعتها بيحتاج ياخد قرار سريع.
• الضغط على زوج عملات/ سهم/ سلعة غير مطلوب التداول عليها، بسبب سرعة التنفيذ.
• عدم التأكد من حجم العقود المتاحة، وبيحصل كتير إن المتداول يخاطر بأكتر من المفروض في الصفقة أو يخاطر بأقل.
• الدخول في الصفقة وقت صدور الأخبار أو المؤشرات اللي بتأثر كتير في حركة السوق.
• الدخول في الصفقة قبل أو بعد إشارة التداول المحددة في نظام التداول الخاص بالمتداول.

عدم وضع وقف الخسارة (Bad Stop-Loss) في المكان الصح

وضع “وقف الخسارة” مش محتاج نتكلم فيه كتير، لو محطتش الـ”Stop Loss” في أي سوق مالي بيعتبر في رأي أغلب المتداولين الكبار لعب قمار، أهم حاجة للمتداول في البورصة إنه يقدر يعرف امتى يكون غلطان في تحليله ويحط وقف خسارة في المكان المناسب، عشان يحدد حجم الخسارة اللي ممكن يتحملها ويمنع الخسارة الكبيرة، وغالبًا لما السعر يروح ضد الصفقة بتاعته ويوصل لمستوى مقاومة قديمة، بيرجع تاني لاتجاه الصفقة، فلازم ياخد باله من كده لما يحط وقف خسارة.

عدم وضع كسب الأرباح (Bad Profit Limit) في المكان الصح

غالبًا ما بيخطئ المتداولين في تحديد أهداف ربح كبيرة أوي مش مناسبة للإطار الزمني اللي بيتادولوا فيه أو سرعة حركة الأسعار المتوقعة، المتداولين في الإطارات الزمنية الطويلة في الأغلب بيكون ليهم أهداف كبيرة لصفقاتهم، ولكن لو بصوا لصفقاتهم على إطار زمني أقل، هيلاقوا نفس الصفقة بتنقسم لنقاط الدخول بأهداف وقف خسارة أقل، وممكن تكون أكتر ربح.

الأخبار أو صدور المؤشرات الاقتصادية (News)

الأخبار والمؤشرات الاقتصادية بتأثيراتها المختلفة على السوق، هي اللي بتحرك السوق وبتخليه يتهز، وكمان بيكون فيها تحركات عنيفة ومفاجئة للسعر، وده ممكن يخلي حد يخسر حتى لو كان تحليله صح.

المتداول اللي بيخسر صفقة، ممكن يعمل ايه؟

1. يسيب السوق يكمل في حركته ويرجع تاني لاتجاه الصفقة، أو يعمل أمر وقف الخسارة، زي ما قولنا قبل كده، ده الحل اللي بيتبعه المتداول اللي بيتمسك بخطته في التداول.
2. يقفل الصفقة ويتقبل الخسارة اللي حصلت ويدور على فرصة تانية، ده حل بيناسب بعض المتداولين، بس للأسف ممكن يزود الضغط السلبي اللي بيسيطر على نفسيتهم بسبب الخسارة، وعيبه إنه بيمنعك من أرباح التحليل اللي عملتها، والنظام اللي بتتبعه في التداول، وكمان ممكن يمنعك من انه يدي السوق فرصة انه يتحرك في اتجاهك.
3. الـ Hedge أو عكس الصفقة بيتعب أوي ومش متاح إلا للي عنده خبرة كبيرة في التداول، لازم تحسب حسابات كتير ومعقدة، ولو مش نجحت فيها، هيسبب ضغط نفسي كبير على المتداول، كمان لو مش ظبطت الـ Hedge ده ممكن يسبب خساير كبيرة أوي.
4. لو قررت تحريك وقف الخسارة لفوق بدل ما كان، عشان تتمنى انه السوق يتحرك تاني في اتجاه الصفقة، دا قرار صعب جدا ومش هينفعك غير لو كنت متداول محترف وعارف حسابات كتير، وفي حالة فشل الخطة دي ممكن تخسر فلوس كتير، بس لو كنت عارف تحلل السوق صح وواخد قرار منطقي ومحسوب، وحجم الخسارة الجديد متناسب مع مستوى المخاطر اللي بتتحمله، ممكن يكون قرارك صح، ولو كنت بس عامل كدا عشان خايف من الخسارة، فالقرار ده ممكن يبقى غلط.

حاجات لازم تفكر فيها لما تعمل نظام تداول

• السوق مش ثابت، بيتحرك ويتطوّر مع الوقت زي أي حاجة تانية، فلازم تغيّر نظام التداول اللي بنيته بعد فترة من استخدامه، أو على الأقل تحسّنه.
• خلّي بالك إنك بنيت نظام التداول عشان يتوافق مع حركات السوق، مش عشان تفرض على السوق انه يتوافق مع النظام اللي بنيته.
• الاختيار الصح للإطار الزمني بيأثّر على جودة وكفاءة نظم التداول، فلازم تختار الإطار المناسب لنظامك، عشان لو كنت بتتداول في فترة قصيرة المدى، تختار إطار زمني صغير، ولو كنت بتتداول في فترة طويلة المدى، تختار إطار زمني كبير.
• لازم تختار إشارات التداول اللي بينتجها نظام التداول بتاعك، عشان مفيش نظام ناجح بنسبة 100%، وعادةً أدوات تحليل الاتجاهات هي الأفضل للإختيار.
• لازم تختبر النظام قبل ما تستخدمه في التداول، ومش بس على البيانات التاريخية، لازم تختبره على البيانات الجديدة على حساب تجريبي، عشان تتأكد من جودة الإشارات.
• مهم جدًا التحكم في المخاطرة، مهما بلغت درجة اتقانك وثقتك في نظام التداول.
• بعض نظم التداول بتنجح في الاختبار بس مش بتحقّق نفس النجاح في التداول، فلازم تعمل وصف كامل لنقطة الدخول والخروج من السوق قبل ما تستخدم النظام.
• متنساش إنك تشوف صفقاتك بشكل مستمر، عشان تتعلم امتى هيبدأ السوق يخرب على نظام التداول اللي عندك، وتبقى عارف ساعتها تعمل إيه.

مهم: اتعرف على الطرق المثلى لو عندك مشكلة في تحديد وقف الخسارة

باختصار، عشان تحسن أدائك في التداول، لازم انك تتبع نظام تداول فعّال يناسب شخصيتك وأهدافك، وكمان تتعلم المبادئ الأساسية للتحليل الفني والأساسي وإدارة المخاطرة بشكل صح، وتكون متحكم عاطفي قوي، ويكون في توازن بين الخبرة والتحليل والحكمة في صنع القرارات.