أدوات التحليل المالي – تحليل القوائم المالية بالتفصيل
![أدوات التحليل المالي](https://bashmohasb.com/wp-content/uploads/2021/02/different-business-objects-workplace-1024x683.jpg)
قبل ما اتكلم عن أدوات التحليل المالي هقولك نبذه مختصرة عن وظيفة كل قائمة وطبعا كل قائمة وليها بنودها،
فـ ضروري تكون عارف كل بند ايه فايدته ؟ و كذلك ايه سبب وجوده في القائمة ؟ وده عشان تعرف تستخدمه في التحليل المالي وتشوف ازاي هتستفيد منه ؟
أدوات التحليل المالي
- القوائم المالية
- أدوات التحليل المالي
القوائم المالية
مهم جدا نتعلم وظيفة كل قائمة ومعرفة بنودهم قبل ما نتكلم في أدوات التحليل المالي ، وللعلم الأدوات دي بتساعدنا نفهم القوائم المالية بشكل أفضل.
المركز المالي
ببساطة بتعرفني الشركة ليها ايه وعليها كام؟ نقاط الضعف اللي في المركز المالي هي ان بنودها بتقيم بالقيمة التاريخية (اسعارها في تواريخ الشراء)، ومبتعبرش عن القيمة الحالية أو السوقية، والاصول طويلة الاجل الغير متداولة من اكتر البنود اللي متأثره بالكلام دا،
وطبعا القيم الحالية ممكن تخلي شركات خسرانة لشركات بتحقق ارباح وتقلب الميزانية و كذلك بيدخل فيها التقدير الشخصي في بعض بنودها، وكمان صعوبة تقييم بعض بنودها زي العنصر البشري في الشركة.
محتاج أكد علي أهمية انك تكون فاهم وظيفة القائمة ومعرفة بنودها عشان تقدر تستخدم أدوات التحليل المالي في تحليل القوائم المالية.
قائمة الدخل
بتعرفك كسبت قد ايه؟ أو خسرت قد ايه؟ بيظهر فيها المعاملات الخاصة بنشاط الشركة،
المصروفات و كذلك الايرادات والفرق بينهم ارباح أو خسائر.
التدفقات النقدية
بتعرفك الفلوس جت منين؟ و كذلك اتصرفت في ايه؟ وتقدر من خلالها كذلك تعرف ايه المصدر الاكبر اللي الفلوس بتدخلك منه؟ تشغيلي ولا استثماري ولا تمويلي! وكمان اللي بتصرف فيه؟ يعني بتعرفك ازاي الشركة بتدير النقدية الفلوس بتاعتها.
وطبعا القوائم ده بيكون مرفق معاها ايضاحات بيكون فيها تفاصيل الارقام الموجودة في القوائم دي وغالبا الايضاحات دي مش بتستخدم في أدوات تحليل القوائم المالية، يعني بيكون فيها تفصيلة كل بند موجود ف القوائم و كذلك السياسات والطرق المحاسبية المستخدمة، وللعلم القوائم ربع السنوية مهمة جدا هي اللي هتعرفك الوضع الحقيقي للشركة هي العدسة المكبرة اللي هتعرفك نقاط القوة والضعف،
وعادتا الربع التاني من السنة بيكون الافضل والشركات بتحقق فيه افضل نتائج.
ادوات التحليل المالي
- الاتجاهات (التحليل الافقي – التحليل الراسي)
- النسب المالية
التحليل الافقي: أهم أدوات التحليل المالي وبيسمي بردو بتحليل الاتجاه، الفكرة هي انها بتعرفك نسبة التغير ما بين سنة وسنة تانية، يعني مثلا الاصول المتداولة بـ 100.000 في سنة 2020 دي سنة الاساس اللي هقيس بناءا عليها، وانا عايز اعرف نسبة التغير ما بين سنة 2020 وسنة 2021 بالنسبة للاصول المتداولة؟ هطرح قيمة الاصول المتداولة سنة 2021 من قيمة الاصول المتداولة سنة 2020 واقسمها علي قيمة الاصول المتداولة لسنة الاساس اللي هي 2020 ثم اضربها في 100 هيجيبلي نسبة التغير، أدوات التحليل المالي
وممكن اقارن ما بين شركة وشركة تانية في نفس القطاع واشوف في زيادة ولا انخفاض بناءا علي سنة الاساس دي لكل بند في القائمة وطبعا لازم توحد الفترة لما تيجي تقارن، يعني متقارنش سنة بشهر لازم توحد الفترة سنة بسنة أو شهر بشهر.
طيب سؤال وليه نعمل مقارنات؟
عشان اقدر اعرف التغير اللي حصل ده حصل فجأة ولا في اسباب للتغير ده و كذلك ايه التطور اللي حصل في بنود القوائم المالية في فترة معينة؟
التحليل الراسي: أسهل أدوات التحليل المالي وبيسمي بردو بالتحليل الثابت، وده عشان بيكون تحليل لسنة واحدة بس!
بتمسك القائمة من دول وتعملها تحليل، بتعرف نسبة كل بند من الاجمالي بتاعه، يعني مثلا لو عايز نسبة النقدية من اجمالي الاصول كلها، هتقسم النقدية علي اجمالي الاصول هيقولك نسبة النقدية من اجمالي الاصول “الجزء من الكل”
ده هيتم مع كل حساب عشان اعرف التغير اللي حصل علي كل حساب؟ و كذلك ايه اللي زاد؟ وايه اللي قل؟ وزاد أو قل بنسبة قد ايه؟ وهل ده كويس ولا لأ؟
كل ده هيساعدني اقدر افهم القوائم واداء الشركة أفضل، هل الديون بتزيد ولا بتقل؟ و كذلك الارباح والاستثمارات والسيولة والالتزامات بتزيد ولا بتقل؟ وقائمة الدخل بتفترض ان صافي المبيعات 100% وبتقسم كل البند علي صافي المبيعات ثم تضرب في 100 هيديك نسبة البند من صافي المبيعات.
الخلاصة
بعد ما تكون اطمنت لظروف الاقتصاد واخترت قطاع أو صناعة هتستثمر فيها، طبعا دا بيكون من خلال دراستك ومتابعتك للسوق بشكل عام، بتبدأ تشوف ايه افضل الشركات اللي شغاله في القطاع؟ وبتقارن ما بينهم من خلال القوائم المالية بتاعتهم وتحللهم من خلال إستخدام أدوات التحليل المالي وبما انك متابع الاخبار الخاصة بالشركات فخد بالك من حاجة الخبر بيقتل الشارت والمستفيد الوحيد من الاخبار الكاذبة أو الاشاعات اللي بتطلع كل شوية اللي بيقولها أو اللي بيخرجها للمستثمرين والاخبار طبعا كتير اوي فضروري تتعلم تغربل الاخبار ومتمشيش مع القطيع وخليك هادي في التعامل معاها.
للعلم أدوات التحليل المالي بيوصلك لنتائج افضل من التحليل الفني.
بإختصار بنحلل القوائم المالية عشان نعرف الشركة اللي هنستثمر فيها صالحة للاستثمار ولا لأ!