ملخص كتاب The Cult of We عن آدم نيومان وشركة WeWork – إليوت براون

كتاب The Cult of We بيحكي قصة شركة “WeWork”، الشركة الأمريكية للعقارات واللي كانت بتعرض مكاتب للإيجار للشركات الجديدة الـ “start-up” وكانت أكبر شركة ناشئة في العالم، بس اتعرف عنها بعد كدا إنها بتخسر مليون دولار كل يوم ده ليه وازاي؟ ده اللي هنعرفه في ملخص كتابنا النهارده.

إقرأ المزيد: ملخص كتاب Small Giants – للكاتب بو بورلينغهام

مقدمة الملخص

قصة شركة WeWork انتشرت في عالم البيزنس والصحف، “آدم نيومان” كان رئيس تنفيذي لأكبر شركة ناشئة من حيث قيمتها في العالم، وكان محترف في إخفاء تدهور البيزنس بتاع الشركة من خلال بيانات مُضللة ومش صح، طموحه المتسرع للنمو وعدم التخطيط الاستراتيجي وصل لنهاية مفاجئة لشغله سنة 2019.

WeWork كان ممكن تكون من أكبر الشركات الناجحة النهاردة، بس اللي وقفها كان القيادة المرتبكة والتخطيط المتسرع، واللي كان مدعوم بكلام كتير على الفاضي وملوش أساس تنفيذي على أرض الواقع. كتاب “The Cult of We” للكاتب “إليوت براون” بيستكشف قصة WeWork وازاي الرئيس التنفيذي بتاعها “آدم نيومان” قدر يخدع مستثمرين ومؤسسات عالمية معروفة لأكتر من عشر سنين.

جروس ونيومان طلعوا مهووسين بشراء ألبوم راب من فرقة “Wu-Tang Clan” اللي مفيش غير نسخة واحدة بس اتعملت منه!

إليوت براون

أهم 3 دروس من كتاب The Cult of We

• الحلم الكبير والخطاب المقنع ممكن يوصلوا رائد الأعمال بعيد في البيزنس.
• خطط دايمًا لنمو الشركة بشكل استراتيجي ومتضيعش الرؤية الأساسية للشركة.
• لما القادة يسمحوا لمشاعرهم تتحكم فيهم، بتكون نهاية مشروعهم كارثية.

القصة دي درس من دروس الحياة لأي رائد أعمال، بس عشان نفهم النقاط الرئيسية لازم نتكلم عن كل نقطة لوحدها!

الدرس الأول: الحلم الكبير والخطاب المقنع ممكن يوصلوا رائد الأعمال بعيد في البيزنس

إنك تعرف تبيع حلمك بطريقة كويسة بتفتحلك أبواب كبيرة في الحياة، “آدم نيومان” كان بيعرف يتواصل بشكل كويس وكان بيعرف يبيع فكرته، في بداية سنة 2006 قابل “ميغيل مكيلفي” اللي بقى بعد كدا شريك مؤسس في “WeWork”، “ميغيل” مش كان هدفه يدخل بيزنس وكله مخاطر، بس “آدم” أقنعه إنه يبدأ معاه رحلة كلها جنون ومخاطر مع بعض.

• في البداية كانوا بيبيعوا مكاتب جاهزة للشركات الجديدة، وكانت الأرباح كويسة، وبعد كدا قدموا الفكرة لمستثمر اسمه “جويل شرايبر” وقالوله إن قيمة الشركة بـ 45 مليون دولار، فاشترى تلت الشركة بـ 15 مليون دولار.
• بعدين بدأوا يعملوا دعاية لنفسهم كشركة تكنولوجية بتوفر خدمات التأجير، عشان يزودوا قيمة الشركة وياخدوا تمويل من رجال الأعمال، “آدم” كان بيقارن الشركة بـ “فيسبوك” في الحياة الحقيقية، وبيقارن نفسه بـ “ستيف جوبز” الجديد، وفعلا كل الناس انجذبوا للفكرة و “وي وورك” انتشرت بسرعة في أوروبا وآسيا.
• بعد كدا خسروا السيطرة على معدل النمو، و”ميغيل” خرج من الشركة، بس “آدم” استمر في البحث عن نمو ضخم، فراح عشان يطلب تمويل من الرئيس التنفيذي لـ “سوفت بنك”، “ماسايوشي سون”، وخد التمويل اللي عايزه. قدّرت “سوفت بنك” قيمة الشركة بـ 47 مليار دولار.

الدرس التاني: خطط دايما لنمو الشركة بشكل استراتيجي ومتضيعش الرؤية الأساسية للشركة

مشكلة “WeWork” إن “نيومان” كان بيدور على التوسع بأكبر من قدراته، الشركة نفذت خطة التوسع في أوروبا وآسيا والمشكلة كانت إن ده حصل قبل ما يتم تأسيس الشركة بشكل كامل، بس الكلام على الشركة كتر لحد ما وصل الموضوع إن الناس كانوا بيستثمروا فيها من غير ما يدرسوا الموضوع بالتفصيل.

في الحقيقة كانت “WeWork” هدفها إنها تخلق مكان عمل جديد زي “جوجل”، فيه فوائد زي الأكل المجاني وخيارات للأكل النباتي، والنادي الرياضي المجاني والساعات السعيدة للموظفين والعملاء، وطبعًا الشركة مكنتش بتحقق أي أرباح، بالعكس كانت بتخسر مليون دولار كل يوم. المشكلة التانية كانت التوسع في الأسواق الكتير، بتقديم الخدمات المجانية واللي خلت الكل ينسى نموذج الأعمال الأساسي اللي هو توفير المكاتب للشركات الجديدة، حتى المستثمرين والمؤسسات زي البنوك الأمريكية والآسيوية، كلهم ما لاحظوش الأخطاء في الشركة لحد ما وصل الموضوع لحيطة سد.

“نيومان” كان بيعرف يقدم صورة مستقبلية مشرقة ويخطط للتوسع بطريقة روعة وكلامه كان مقنع لأي حد، لدرجة إن الناس نسيوا الجوانب الأساسية لـ “WeWork” وبدأوا علي طول الاستثمار فيها، كل ده أدى لنهاية كبيرة لـ “WeWork”، والمشاكل دي بدأت تظهر في 2019، واللي نتج عنه تخفيض قيمة الشركة بمليارات الدولارات خلال ليلة واحدة.

الدرس التالت: في البيزنس لازم العقلانية تسيطر على المشاعر

“آدم نيومان” كان عنده أفكار غريبة ومجنونة عن شركة “WeWork”، وكان عايز يوسّع نشاط الشركة ويدخل في أسواق جديدة، ويقدم خدمات إضافية ومجانية، كل ده كان سبب في تدهور الشركة وانسحاب الممولين منها. لما سحبت شركة “Softbank” التمويل، كان لازم الشركة تلاقي مصدر تمويل جديد، وأعلنوا عن نيتهم للاكتتاب العام في السوق، وبعد كدا “WeWork” طرحوا أسهمهم في البورصة يوم 19 أغسطس 2019، و”آدم نيومان” استقال من مجلس الإدارة بعد فترة قصيرة.

بشكل أساسي، الغرور والرغبة في التوسع السريع أهم عوامل السقوط، وده بيوضح إن لازم تحافظ على وعيك وتستخدم التفكير الإستراتيجي في الأعمال التجارية وابعد عن المشاعر، القائد الجيد بيتعامل مع شركته بحرص شديد وحكمة من غير غرور.

آدم نيومان كان مؤمن جدًا بمقولته الشهيرة اللي هي:

التحدي الحقيقي هو بناء شركة بتحظى بتأييد الجميع وبتلهمهم بالانضمام لرحلتك.

آدم نيومان

خلاصة الكلام

الكتاب بيتكلم عن سقوط أكبر وأشهر الشركات الناشئة في أمريكا “WeWork”، الشركة العقارية المتخصصة في توفير المكاتب، عملت على الترويج لنفسها كشركة خدمات تكنولوجية لجذب استثمارات ضخمة، بس بمجرد ما “نيومان” خد الفلوس، بدأ يبان عدم قدرته على استخدام الفلوس بطريقة حكيمة، وبسبب الطمع والرغبة في السيطرة والتوسع السريع والغنى، بدأت “WeWork ” تنهار من الداخل، ووصل الموضوع لفضيحة كاملة لما الشركة دخلت في البورصة.

مهم: ملخص كتاب الخطة المالية من صفحة واحدة

الملخص مناسب للصحفي المالي اللي بيحب القصص الجميلة اللي بتوصل للأخبار، والمؤسس اللي عايز يتعلم من أخطاء الناس في الأعمال التجارية، والشخص اللي بيحب يتابع أخبار البيزنس في كل العالم.