ملخص كتاب Stocks for the Long Run – جيرمي سيجل
![ملخص كتاب Stocks for the Long Run - جيرمي سيجل](https://bashmohasb.com/wp-content/uploads/2023/08/ملخص-كتاب-Stocks-for-the-Long-Run-جيرمي-سيجل-1024x576.jpg)
كتاب Stocks for the Long Run بيتكلم عن الاستثمار ونتايجه اللي بتيجي مع اختيار الأوراق المالية سواء كانت أسهم أو سندات أو سلع، ولازم ناخد بالنا إن الأسهم بشكل عام بتدي عوائد أعلى بمرور السنين، و كمان الكتاب بيتكلم عن ازاي تقدر تبني محفظة استثمارية متوازنة تقدر تتعامل بيها مع الأوقات الصعبة.
في المدي القصير، عوائد الأسهم بتتغير بشكل كبير، بسبب التغيرات في الأرباح، وأسعار الفائدة والمخاطر والشكوك بالإضافة للعوامل النفسية، زي التفاؤل والتشاؤم وكمان الخوف والطمع.
جيرمي سيجل
إقرأ المزيد: ايه هي مؤشرات الأسهم وإزاي بيتم تداولها في البورصة؟
بداية الملخص
الاقتصاد هو آلية متطورة دايمًا بتتغير بشكل كبير خلال وقت قليل، الناس بتعمل فلوس من كل حاجة، من الشغل ومن السياسة وغيرها وحاليًا بقي ممكن تعمل فلوس أكتر من الاستثمار في الأسهم، السوق المالي بيأثر على سعر الأسهم وقادر إنه يحول مئات الدولارات لآلاف والآلاف لملايين. بس مع الأرباح الكبيرة بيكون فيه خطر كبير، في الحالة دي الخطر إنك تخسر كل فلوسك بسبب قرار واحد غلط، عشان كدا لازم تختار الأسهم بحكمة وتفكر في كل المتغيرات قبل ما تعمل أي صفقة.
كتاب “Stocks for the Long Run” لـ “جيرمي سيجل” بيعرفنا ازاي نقدر نعمل قرارات استثمارية ذكية، ونختار الأسهم الكسبانة، ونركز على الأرباح اللي ممكن نجيبها علي المدى البعيد. التاريخ بيعرفنا إن الأسهم أرباحها أعلى من السندات خلال الـ200 سنة اللي فاتت، في الـ60 سنة الأخيرة وبالذات بعد 2011، الأسهم ارتفعت بمعدل كبير وملحوظ، ده خلى المستثمرين يبقوا مليونيرات في فترة قصيرة، السبب هو وجود محفظة متوازنة وإدارة استثمار كويسة والوقت المناسب في السوق.
أهم 3 دروس من كتاب Stocks for the Long Run
- الأسهم ممكن تكون أقل خطورة من السندات.
- سعر الأسهم مش ضروري يعكس قيمتها الحقيقية.
- صناديق المؤشرات المتداولة والأسهم اللي قيمتها عالية أفضل فرص الاستثمار.
الدرس الأول: الأسهم أقل خطورة من السندات
في فكرة منتشرة في المالية والاقتصاد، إن السندات أكتر أمان كاستثمار من الأسهم، لو شوفناهم من ناحية معدل التغيرات، الأسهم بتتغير أكتر من السندات ومفيهاش ضمان إنها ترجع ربح بعد الخسارة، وكمان الأسهم ممكن تخلص فلوسك وحياتك لو مكنتش واخد بالك. بس فيه عوامل كتير تخليك تستثمر في الأسهم بدل السندات، مثلا الأسهم هي أفضل استثمار على المدى البعيد، بتجيب أرباح أعلى من السندات بعد ما تحسب معدل التضخم خلال 20 سنة مثلا، بيقول “سيجل” إن الاستثمار في أي شركة كويسة هيديك عوائد إيجابية كمستثمر.
يعني السندات بتكون أقل في التغيرات والتقلب، بس بتدي أرباح أقل مع الوقت، وأوقات مش بتكون قادرة تعوض زيادة الأسعار بسبب التضخم، عشان السندات بتتحرك بناءًا على أسعار الفايدة واللي أوقات مش بتكون لصالح المستثمر. عشان نوضح أكتر هنتكلم عن الفترة من سنة 1946 لسنة 2001، خلال الفترة دي الأسهم كانت بتجيب عائد سنوي متوسط 7٪ والدهب بيجيب عائد -0,1٪. والسندات بتجيب عائد سنوي -2,8٪. بالإضافة إن البيانات مش شاملة المعدل السنوي للأرباح الموزعة واللي وصلت 4,6٪.
على الرغم إن الأسهم فيها تغيرات وتقلبات، بس الأكيد هي الأقل خطورة عن غيرها، عشان الأوراق المالية التانية مش بتقدر تتماشى مع معدل التضخم، ولا بتقدر تدي عائد إيجابي للمستثمرين، الأحسن ندخل في تجارة احتمال المكسب فيها أفضل بدل من الدخول في تجارة احتمال الخسارة أكتر.
الدرس التاني: سعر الأسهم مش ضروري يعكس قيمتها الحقيقية
![ملخص كتاب Stocks for the Long Run - جيرمي سيجل](https://www.bashmohasb.com/wp-content/uploads/2023/08/سعر-الأسهم-مش-ضروري-يعكس-قيمتها-الحقيقية.jpg)
إنك تدور على أسهم من كل الأنواع للاستثمار فيها حاجة كويسة، بس لما الموضوع يكون مرتبط بسعر السهم، ممكن مش يعكس القيمة الحقيقية للسهم، المستثمرين بيميلوا للتغيير من التفاؤل الزائد للتشاؤم المبالغ فيه، وعشان كدا بنشوف تغير في الأسعار كبير في الصناعة دي.
عشان كدا الصك ليه قيمة جوهرية بتتحدد من قيمة الشركة (الإيرادات، كفاءة الإدارة، هامش الربح، التدفق النقدي، وغيرها من الجوانب) وقيمة سعر السهم. الشركة المدرجة في البورصة نادرًا ما بتتقيم بشكل صحيح، ودور المستثمرين إنهم يحددوا إذا كان السهم يستحق الشراء أو يتم تقييمه بأقل من قيمتة الحالية.
بصورة عامة، أسعار الأسهم بتتغير لأسباب كتير، “سيجل” بيقترح فرضية “نظرية السوق الضوضائية” كتفسير كويس للموضوع ده، الفرضية بتقول إن الأسهم بتتحرك عن أسعارها الحقيقية بسبب المستثمرين اللي بيتداولوا بحاجات مش مرتبطة بقيمة الأسهم، يعني حاجات زي جمع الضرائب وضبط التوازن في المحافظ وقطع الخساير وكسب الأرباح، وهكذا. بشكل عام الشخص بيكون أفضل لو بيستثمر فلوسه لفترة طويلة بدل ما يبيع بشكل متسرع في حالة الخسارة.
الدرس التالت: صناديق المؤشرات المتداولة والأسهم اللي قيمتها عالية أفضل فرص الاستثمار
“ETF” اختصار لصناديق الاستثمار المتداولة، ده نوع من الأوراق المالية اللي بتتبع مؤشر معين أو سلعة زي الدهب أو الفضة أو صناعة معينة، كمان بتتبع أنواع أصول تانية، الصندوق ده بيتداول زي السهم وممكن تشتريه وتبيعه في البورصة زي أي سهم عادي.
أكبر ميزة للـ”ETF” إنه بيتحمل الانخفاضات في السوق، وفي نفس الوقت بيقدم عوائد ملحوظة للمستثمرين، مثلا لو استثمرت في “ETF” بيتتبع مؤشر زي مؤشر “S&P 500” الشهير، مش بس بتشتري أسهم شركة واحدة، كمان بتشتري جزء صغير من أسهم الـ500 شركة الموجودة في المؤشر ده، بتقدر تشتري وتبيع الـ”ETF” خلال ساعات التداول زي ما بتشتري أي سهم.
نهاية ملخص كتاب Stocks for the Long Run
الكتاب لأي حد عايز يدير فلوسه ويبقى مستثمر ناجح، الكتاب فيه معلومات مهمة للمبتدئين والمستثمرين المتوسطين، عشان بيشرح مبادئ الاستثمار في الأوراق المالية في السوق، وكمان بيديك معلومات عن كيفية التداول الناجح وكيفية اختيار الأسهم الكسبانة، لو جاهز تستخدم فلوسك وتستثمر في الأسهم، وتتعلم أكتر عن المالية، وتبقى مدير مالي أفضل، الكتاب ده هو اللي يناسبك.
مهم: ملخص كتاب Make Money Trading Options – مايكل سنسير
الملخص مناسب للشاب اللي قدر يوفر من فلوسه وعايز يتعلم ازاي يستثمر فلوسه في البورصة، والطالب المالي اللي عايز يزود معرفته في المجال، والشخص اللي فلوسه مستثمرة في السوق ومحتاج يتعلم ازاي يعدل محفظته عشان تتحمل الأزمات.