ملخص كتاب Quit Like A Millionaire – أسرار الثراء والحرية المالية

كتاب Quit Like A Millionaire هيديلك طريقة رياضية مثبتة علميًا عشان تدير فلوسك وتبني ثروتك اللي هتخليك تتحرر ماليًا، مفيش فلوس هتشتري السعادة، دي حاجة انت سمعتها كتير جدًا، وإنك مكنتش هتفكر قد ايه هتكون مش مبسوط لو كنت عايش في فقر، حبك للفلوس والممتلكات مش هيجيبلك السعادة، بس هيساعدك توفر وقت وحرية أكتر عشان تعمل الحاجات اللي بتخليك مبسوط.

كل ما كان عند الناس حاجات مادية أقل وكل ما أنفقوا أكتر على تجارب زي السفر أو تعلم مهارات جديدة، كانوا أكتر سعادة ورضا.

كريستي شين

إقرأ المزيد: ملخص كتاب The Automatic Millionaire

بداية الكتاب

خد مثال عيلتك، عايز تهتم بأهلك اللي بيكبروا في السن؟ الفلوس هي الحاجة الوحيدة اللي هتخليك تعمل كده، لو بتدور على وقت أكتر مع أولادك، كمان الفلوس هي الحل، لو بتحب السفر، أو عايز يكون عندك وقت فراغ، بصراحة مش هتقدر تعمل كل ده من غير ما يكون عندك ثروة.

عايز تتعلم من حد اتقاعد في سن 31 سنة بس؟ جميل، عشان ده بالظبط اللي حصل مع “كريستي شين”، مؤلفة كتاب “Quit Like a Millionaire: No Gimmicks, Luck, or Trust Fund Required“، وهي جايه تعلمك إزاي تحقق نفس الأهداف المالية والحياتية.

أهم تلات دروس تقدر تتعلمهم من كتاب Quit Like A Millionaire

• اتبع الرياضيات والحسابات قبل ما تتبع قلبك واحساسك.
• لو عايز تكون مبسوط، متشتريش حاجات كتير وتدخل في ديون، بس اصرف فلوسك على تجارب جديدة.
• التقاعد المبكر بيعتمد على اختياراتك في الاستثمار وتعلمك للادخار.

يلا بينا نبدأ نخش في التفاصيل!

الدرس الأول: اتبع الرياضيات والحسابات قبل ما تتبع قلبك واحساسك

كتير من الأغنياء زي “ستيف جوبز”، بيقولوا نصائح مهنية بتتلخص في جملة “اتبع قلبك واحساسك”، إنك تعمل حاجة بتحبها بيكون فيها فايدة كبيرة، صح؟ “كريستي” بتعلمنا إن الاختيار ده مش دايمًا الصح، “كريستي” كانت لازم تختار ما بين 3 تخصصات: الكتابة الإبداعية، هندسة الكومبيوتر، والمحاسبة. في قلبها حست إن الكتابة الإبداعية هي اللي لازم تدرسها، بس لما حسبت الموضوع بالعقل، لقت إن هندسة الكومبيوتر هي الاختيار الأفضل.

برنامج الدراسة لمدة 4 سنين هيكلفها 40 ألف دولار، أما متوسط دخل الكاتب ساعتها كان 17 ألف دولار، بمعنى إنها هتكسب 2752 دولار أكتر من أدنى أجر في الساعة، لكن هندسة الكومبيوتر هتجيبلها 40 ألف دولار أكتر من أدنى أجر في الساعة في السنة. انت دلوقتي عارف انها كان لازم تعمل اللي بيحسّن موقفها المالي، مهما كان شغفها، لو بتفكر في الأساسيات، زي إنك تشتري الأكل أو تدفع الإيجار، مش هتعيش حياة سعيدة، صح؟

وحتى لو الكتابة شغفها، الدراسات بتثبت إن الشغف بيتغير بشكل كبير على مدار الحياة، حتى في فترة 10 سنين بس. هي فكرت وحسبتها كويس بالعقل وكملت في هندسة الكومبيوتر، والنهاردة هي كاتبة، الوظيفة اللي كانت فيها بتقبض منها كويس وساعدتها تحقق حلمها في الكتابة، كانت بتقدر تعمل كل إبداعاتها الفنية في وقت فراغها، لما مكنتش قلقانه على إنها تدفع الفواتير والمصاريف.

الدرس التاني: لو عايز تكون مبسوط، متشتريش كتير وتدخل في ديون، اصرف فلوسك على تجارب جديدة ومفيدة

لو قريت كتاب “Dave Ramsy’s The Total Money Makeover”، هتلاقي إن الديون هي عدوك الأكبر، كل اللي بتعمله هي إنها بتحطك في دايرة ملهاش نهاية من الشغل والسداد، لو كنت نفسك تكون مستقل ماليًا، لازم تتخلص من كل الديون في أسرع وقت، أسوأ دين هو الدين الاستهلاكي لأنه فيه أعلى أسعار الفايدة.

لو لسه واقع في الديون الكتير، مفيش فايدة من الاستثمار أو التوفير، مش هتقدر توفر أكتر من اللي عندك من الديون، فانت محتاج تركز على إنك توفر كل الفلوس اللي تقدر توفرها عشان تسدد الديون. ابدأ بالفوايد الأعلى وحط كل الفلوس اللي ممكن ترميها فيه، لو ينفع اعمل إعادة تمويل للقروض، المحاولة في إنك تكون مستقل ماليًا وفي نفس الوقت عندك ديون، مش بتختلف كتير عن محاولة الجري في ماراثون مع شنطة على ضهرك مليانة بالحجارة.

لو عايز تزود ثروتك، لازم تحرر نفسك من الديون. في الأوقات اللي عندك فيها شوية فلوس، أفضل استغلال ليها هو في تجارب وأوقات ممتعة بدل من إنك تشتري حاجات ملهاش لازمة، لما تشتري زوج الأحذية الفاخر هيديك زيادة في هرمون “الدوبامين” زي تأثير الكوكايين بالظبط، المشكلة إن المخ بيتعود على كده وبيحتاج أكتر، يعني الشراء مش بيديك سعادة دايمة، بس التجارب اللي بتبقى ذكريات ممتعة، دي بتديك سعادة أكتر ولفترة أطول.

الدرس التالت: التقاعد المبكر بيعتمد على اختياراتك في الاستثمار وتعلمك للادخار

• ناس كتير بيكونوا حذرين جدًا لما يرتبطوا بالديون، بس الاستثناء الوحيد اللي معظم الناس بيسمحوا بيه هو التمويل العقاري، لكن “كريستي” بتقول إن الناس بيحبوا يفكروا مرتين قبل ما يدخلوا في سوق العقارات، عشان ناس كتير بيكونوا في وضع أفضل لو استأجروا بدل من إنهم يشتروا.

• بس هل العقارات فيها استثمار كويس؟ الناس بتفكر إن بعد ما تعيش في مكان لفترة، الأسعار هتزيد وبتقدر تبيع بسعر أعلى، بس العيلة العادية بتفضل في البيت لمدة 9 سنين بس، حتى لو كان في زيادة كويسة في قيمة العقار بنسبة 6% في السنة، هتضيف على بعضها كل الرسوم اللي بتدفعها لما تشتري وتبيع، الضرائب العقارية، الصيانة، ومتنساش الفوايد، محتمل تكسب ربح صغير بس.

• الاستثمار في صندوق المؤشرات هو استثمار كويس، عشان آمان وفي الغالب بيكون عندهم عائد كويس علي طول، بجانب الاستثمارات، “كريستي” بتتدرب على الطريقة الصحيحة عشان التقاعد المبكر وهي الاستمرار في التوفير، ده بيخدم هدفين: بيخفض حجم محفظتك المستهدفة، أو المبلغ اللي محتاجه للتقاعد، وبيضيف فلوس أكتر في المحفظة دي.

• خليك مستعد للتضحية ببعض الحاجات دلوقتي، زي الخروج للأكل مرة واحدة في الأسبوع بس، أو تبيع العربية وتستخدم المواصلات العامة، هي بتقول إن الموضوع مش مرتبط بكام بتكسب، هو مرتبط بتوفير أكبر ما يمكن من دخلك.

في نهاية ملخص كتاب Quit Like a Millionaire

هدف الكتاب إنه بيقنعك إنك تقدر تحقق الكمية الكبيرة من الفلوس اللي عايزها مهما كان وضعك المالي، الكتاب ذكي وفيه بعض النصائح المالية الجديدة والعملية اللي بتقدر تستفيد منها، هيخليك تفكر مرة تانية في طريقة صرفك للفلوس وبيساعدك تدرك إنه بمجرد التضحية شوية، ممكن تكون عندك حياة مريحة بجهد أقل، وممكن تتقاعد في وقت مبكر.

مهم: ملخص كتاب The Little Book of Common Sense Investing

الكتاب ممكن يناسب الشخص اللي عنده 38 سنة وشغله متعب وملّ من الشغل اليومي من 8 لـ 5، والشاب اللي عنده 23 سنة وبيقوم للشغل بنفسه وبيجتهد، وأي حد عايز يتقاعد في وقت مبكر.