ملخص كتاب One Up on Wall Street – بيتر لينش

كتاب One Up on Wall Street “أعلى بخطوة من وول ستريت” بيتكلم عن مشاكل التداول في البورصة، وبيشرح ازاي أي حد ممكن يختار أسهم كويسة وناجحة حتى لو مكنش عنده خبرة في المجال، وده من خلال اتباع بعض الخطوات الأساسية، الاستثمار في البورصة دايمًا كان معروف إنه وظيفة كويسة، وده اللي بيخلي المجال ده في منافسة وصعب على الناس إنها تفهمه وتدخل فيه.

الفكرة مش إنك تثق في مشاعرك، الفكرة إنك تعود نفسك على إنك تتجاهلها، خليك مع أسهمك طول ما قصة الشركة الأساسية ما تغيرتش.

بيتر لينش

إقرأ المزيد: ملخص كتاب Charlie Munger عن الملياردير تشارلي مونجر

في البداية

في كتاب “One Up on Wall Street”، بيقدم “بيتر لينش” فكرة جديدة عن الاستثمار الجيد، وازاي أي حد ممكن يتفوق على المستثمرين المشهورين باستخدام المنطق والحس السليم كأسلوب تحليل للاستثمار، الفكرة إنك تستثمر في الشركات اللي بتفهمها، متدورش على توصيات المحللين وتقاريرهم عن شركات بتقدم خدمات ومنتجات صعبة الفهم.

مثلا لو شفت محل “دونات” كويس في منطقتك وبيدخله ناس كتير، وشفت نفس المحل ناجح في منطقة تانية، فكر في إنك تستثمر فيه، بالطريقة دي الناس العادية اكتشفت سهم “دانكن دونتس”، في النهاية، إبتكارات بسيطة وسهلة ممكن تكون أحسن أسهم في الأداء، بس فيه حاجات تانية محتاج تدرسها زي ازاي تقّيم قيمة السهم وتحلله صح؟

دروس مهمة من كتاب One Up on Wall Street

• في 6 فئات من الأسهم اللي لازم تعرفهم.
• لو بتدور على سهم يعملك عوائد كبيرة، فيه 13 خاصية لازم تفكر فيهم.
• 5 خصائص أساسية لازم تتجنبهم لما تستثمر في الأسهم.

الدرس الأول: اعرف 6 فئات من الأسهم عشان تعرف اللي يناسبك أكتر

في بعض الصفات اللي بتحدد إيه هو نوع المستثمر اللي انت عايز تكونه، ده بيعتمد على إمكانياتك وميزانيتك وغيرها، لكن بيتر لينش بيقول إنه فيه كمان بعض الفئات من الأسهم لازم تعرفها قبل ما تحدد هدّخل فلوسك فين.

• الشركات اللي بتنمو ببطء: دي عادةً بتكون شركات كبيرة في صناعة ناضجة، وبتنمو ببطء.

• الشركات المحافظة: دي أكتر خطورة من الأولى، عشان بتنمو بمعدل 10-15% في السنة، وبيعها لو ربحها بين 30-50%.

• الشركات اللي بتنمو بسرعة: دول بيتميزوا بنموهم السريع، واللي بيخلي استثمارتها بتتميز بخطورة عالية، عشان ممكن تخسر قيمتها بسرعة، بس ليها عوائد كبيرة جدًا، لما تكون بتدور على شركة بتنمو بسرعة، اسأل نفسك دايمًا: هل ممكن تستمر بنفس معدل النمو ده؟ هل ده مستدام؟ لو لقيت إن الخطورة عالية بالمقارنة مع تقييم الشركة، والسوق بيدور عليها بطريقة غير موضوعية، متدخلش فيها.

• الشركات الدورية: دي الشركات اللي بيتحرك ربحهم أو خسارتهم نتيجة لدورة الأعمال، ليهم عيب واحد إنهم بينتجوا سلع بيتأجل شرائها في حالات عدم اليقين المالي.

• الشركات اللي بتحتاج تعديل: دي شركات بياناتهم المالية فيها مشاكل، أسهمهم ممكن تكون أسهم مكسب كبير لو اتمكنت الشركة من التعافي وتحسين وضعها المالي وفعالية الإدارة، بس لو حصل العكس فخطر خسارة قيمة استثمارك بيزيد بشكل كبير.

عشان تستثمر صح، لازم تعرف إن الأسهم مش ثابتة وده بيتغير كل فترة، شركة محتضرة ممكن تبدأ تتحول لشركة نمو، وشركة نمو ممكن تنخفض بعد فترة من الزمن بسبب تغير الظروف الاقتصادية، فلازم تكون دايمًا على اطلاع بتغيرات السوق والشركات عشان تقدر تاخد القرارات الصحيحة وتحافظ على استثماراتك.

الدرس التاني: السهم اللي بيديلك عوائد كبيرة “Tenbagger”، ليه صفات معينة بتساعدك تتعرف عليه بشكل أسهل

الـ Tenbagger هو لما تجيب سهم وتبيعه بعد فترة ويكون اتضاعف 10 مرات من قيمته، وفيه مؤشرات بتساعد المستثمرين يلاقوا الأسهم دي:

• أول مؤشر هو الاسم، يعني لو الاسم مضحك أو ممل هيبقى أقل اهتمام من “وول ستريت” ومش هيبيعوا منه كتير.
• المؤشر التاني والتالت مرتبطين بنشاط الشركة، لو كان نشاطها ممل أو عملت حاجة المساهمين مش موافقين عليها، كده المستثمرين مش هيشتروا منها.
• وده يوصلنا للمؤشر التالت، إن مؤسسات كتير مش مالكة السهم والمحللين مش بيتابعوه، يعني السهم لسه مش اتعرف.

بالاضافة لكده، شركة ممكن تكون فرصة استثمار جيد لو في حاجة محزنة عنها، زي شركة خدمات الجنازات، الناس مش بتتسابق تشتري منها إلا لو بتقدم أرقام كويسة تعوض عن سمعتها، ومتنساش تدور على شركات في صناعات بتنمو ببطيء، وتكون ليها مكانة معينة، زي اللي بيعمله “وارن بافيت”.

لو الشركة بتحقق دخل ثابت، دي علامة كويسة على استثمار كويس، عشان المستهلكين بيشتروا منتجاتهم تاني وبيكونوا مُخلصين للعلامة التجارية، وكمان لو الداخليين في الشركة بيشتروا السهم بيكون ده مؤشر إنه فيه حاجة مهمة جدًا مش هنعرفها زيهم، وفي النهاية لازم تشوف لو كانت الشركة بتشتري أسهم خاصة بيها، بعد كل ده هما يعرفوا أكتر مننا لو كانوا استثمار كويس ولا لأ.

الدرس التالت: اتعلم ازاي تكتشف الاستثمارات اللي مش مجدية بالنظر لـ 5 مؤشرات رئيسية

زي ما بتقدر تعرف الأسهم الكويسة، بتقدر تتعلم تتجنب الأسهم السيئة وده من خلال 5 مؤشرات وهما:

1. أول حاجة لازم تشوفها هي نوع الصناعة، لو الشركة في صناعة ساخنة جدًا، خلي بالك إن السهم ممكن يكون غالي ومش مستاهل.
2. الحاجة التانية إنك لازم تخلي بالك لو الشركة بتعمل إعلانات كتير وبتتكلم في الأخبار إنها “جوجل الجديدة” أو “أمازون الجديدة” أو “فيسبوك الجديدة”، دي علامة على إن السهم ممكن يكون مُضلل.
3. خد بالك من تنويع الشركة، لو الشركة بتشتري أسهم في شركات من صناعات مختلفة، ده ممكن يكون إشارة على إنها استثمار مش كويس.
4. شوف كمان عملائهم، لو الشركة بتعتمد على عدد قليل جدًا من العملاء، أو نوع واحد من العملاء، لو راحوا هيكون في مشكلة كبيرة.
5. خلي بالك من الأسهم اللي بيتم الكلام عنها إنها هتكون حاجة كبيرة جدًا قريب، الشركات دي بتعمل إعلانات مغرية إنها هتكتشف حاجة روعة أو هتعمل حاجة مستحيلة تخلي سعر السهم يزيد بشكل كبير، بس في الغالب دي أساليب تسويق رخيصة بتحاول تغري الناس يشتروا سهم مش مجدي لفترة قصيرة.

نهاية الملخص

بعد ما اتكلمنا عن ملخص كتاب One Up on Wall Street للكاتب العبقري بيتر لينش، دلوقتي بقينا فاهمين أكتر عن كيفية استثمار فلوسنا بطريقة سليمة وبسيطة، وعرفنا إزاي نشوف الأسهم اللي بتدينا ربح كبير، ونحلل الشركات بطريقة سهلة، كمان اتكلمنا عن إزاي نعرف الاستثمارات اللي مش هتدينا فوائد، والمؤشرات اللي بتعرفنا اذا كان في مشاكل في الشركات زي المشاكل المالية والادارية.

مهم: ملخص كتاب The Little Book of Common Sense Investing للخبير المالي جون بوجل

الملخص مناسب للشاب اللي عنده 25 سنة وعايز يستثمر ويكسب دخل سنوي، أو اللي عنده 30 سنة ومحتاج يبدأ صندوق تقاعد مبكر ويبني محفظة استثمارية فيها أصول قيمة، أو طالب مالية عمره 22 سنة حابب يتعلم أكتر عن شغفه في استثمار الأسهم بره المنهج الدراسي.