ملخص كتاب Everyday Millionaires – كريس هوجان
كتاب “Everyday Millionaires” بيثبت إن أي حد ممكن يبقى مليونير لو كان عنده خطة عمل سليمة وكان عايز يشتغل بجد، من خلال إستنتاجات بتتجمع من أكبر دراسة عملوها عن حياة المليونيرات. إزاي تقدر تبقى مليونير؟ في الحقيقة الأغلبية مش عارفة ازاي، بس في الكتاب ده، الدراسة بتكشف الأمور المشتركة بين المليونيرات: ازاي وصلوا لمكانتهم الحالية؟، وازاي أي حد ممكن يحقق نفس النتائج؟.
الكتاب ده للمؤلف “كريس هوجان” هو دليل خطوة بخطوة لتحقيق الثراء، حتى لو مش عندك فلوس كتير في البنك، بناءًا على أكبر دراسة عملوها عن حياة المليونيرات، الكتاب ده بيعلمك ازاي تسيطر على أمورك المالية وتحول أحلامك لواقع.
لما يرتبط الموضوع بمسار حياتك المهنية، عايز تحاول تبقى النوع ده من الأشخاص اللي بيوصفهم باتريك لينسيوني في كتابه “اللاعب المثالي في الفريق”: انه حد نشيط ومتحمس (بيشتغل بجهد عشان يوصل للنجاح)، ومتواضع (عارف نفسه وعارف إيه اللي بيقدمه للفريق)، وذكي (بيدير العلاقات ببراعة)، أكيد ده نوع الناس اللي عايز تتعاون معاها، مش كده؟
كريس هوجان
إقرأ المزيد: ملخص كتاب Blue Ocean Strategy – دبليو تشان كيم
أهم الدروس من كتاب Everyday Millionaires
- معظم المليونيرات فلوسهم مش كانت ورث، كانوا بشتغلوا عشان يكسبوا فلوس.
- لو كان عندك وظيفة بسيطة وتعرف بعض القوانين المالية البسيطة، ممكن تبقى مليونير.
- بدل ما تكون ضحية، خليك مسؤول وحدد أهداف.
الكتاب بيقدم حقائق صعبة لكنها مفيدة جدًا. لو حابب تكون مسؤول مالي، كمل معايا الملخص وهتلاقي مزيد من النصائح والتفاصيل.
الدرس الأول: معظم المليونيرات فلوسهم مش كانت ورث
الحقيقة إن معظم المليونيرات ناس صنعوا ثرواتهم بنفسهم واشتغلوا وتعبوا عشان يوصلوا لكدا، مش ورثوا ثرواتهم لكن خلقوها بنفسهم بالارادة والعزيمة، وكمان بعض الاستثمارات الذكية. بيأكد المؤلف إن المقابلات اللي أجراها مع المليونيرات كشفت إن معظمهم مش ورثوا فلوسهم، لكنهم اشتغلوا بجد عشان تكون عندهم، فمعظمهم أشخاص عاديين مش من عائلات غنية أو بيشتغلوا في وظائف ليها مرتبات عالية أو حتى مشهورين.
بدل ما يعيشوا على المشاكل، بيعيشوا تحت ظروفهم، بيسددوا ديونهم على طول، بيستثمروا من أول ما يقدروا، وبيتميزوا بالانتظام في أفعالهم، “مايكل فيلبس” مثال عظيم علي كده، هو أكتر الرياضيين الأولمبيين نجاحًا في التاريخ. بيتدرب 6 أيام في الأسبوع لـ 6 ساعات، ومع كدا الناس بيقولوا إن نجاحه صدفة.
في الحقيقة، معظم الناس بيحبوا يتكلموا عن المليونيرات زي لو كانوا مخلوقات سحرية محظوظة جدًا، الناس في العادة بيفضلوا يفكروا في الناس الناجحين على إنهم محظوظين بدل من إنهم اشتغلوا عشان يوصلوا لكده، وكلامهم ده بيديهم راحة نفسية، يعني ممكن يبرروا عدم استمراريتهم في الشغل بسبب الحظ والكلام ده.
الدرس التاني: حتى لو كان عندك وظيفة بسيطة، ممكن تبقى مليونير
الخرافة اللي بتقول إن المليونيرات بس بيدخلوا مدارس مرموقة، عندهم شهادات كتير، وبيشتغلوا في وظايف أجورها عالية لازم تبطل تفكر بالطريقة دي. المليونيرات مش لازم يكونوا خريجين مدارس غالية أو عندهم شهادات من جامعات كبيرة، أو لازم يشتغلوا في العقارات والمالية وحاجات زي كدا، الحقيقة إن الأغلبية من المليونيرات مش بيبقوا من عائلات غنية، وفي الحقيقة بعضهم متخرجش حتي من الكلية.
ده الوقت اللي لازم فيه نعيد التفكير في فكرة “الاشخاص الأغنياء”، الغنا مش في كمية الفلوس اللي بتجيبها، لكن في كمية الفلوس اللي بتحتفظ بيها.
دي بعض الحقايق المهمة عن المليونيرات:
- بيشتغلوا بجد وبيوفروا فلوسهم، مبيصرفوش زي الأغلبية، بيعملوا استثمارات ذكية وبيمشوا على ميزانية.
- بيعرفوا يعيشوا تحت مستواهم، حتى لو كانوا بيجيبوا راتب من 6 أرقام في السنة.
- المليونيرات بيعرفوا إن في أكتر من حاجة مهمة في الحياة غير إنك تجيب حاجات على “الكريديت كارد” وتاخد اجازات كتير في السنة.
- بيستثمروا في مستقبلهم بالتوفير علي قد ما يقدروا وهم شباب، عشان يقدروا يتقاعدوا بدري ويستمتعوا بالحياة.
- المليونيرات مش بيشتغلوا في وظيفة واحدة، بيكون عندهم مصادر دخل كتيرة.
السر في إنك تبقى غني مش بيعتمد على الحظ ولا وظيفة أحسن أو حاجة تانية أكبر من كده، كل ده مرتبط بتطبيق قوانين الفلوس وتحقيق الاستفادة الكبيرة من دخلك، عشان كدا كتير من المليونيرات دول بيبقوا أشخاص عاديين كانوا بيشتغلوا في وظائف بسيطة، واللي خلّاهم أغنياء كانت عاداتهم.
الدرس التالت: بدل ما تكون ضحية، خليك مسؤول وحدد أهداف
ممكن تكون سمعت الكلام ده قبل كده، بس المليونيرات، خصوصًا اللي نفسهم يبنوا ثروتهم بنفسهم، مبيحبوش يشتكوا، ومبيتكلموش كتير في الكلام الفارغ، وطبعًا مبيحملوش اللوم على الحاجات الخارجية للشعور بالتعاسة والفشل، بمعنى تاني، مبيعيشوش بمنطق الضحية، ومبيضيعوش وقت في التفكير الكتير في المواقف.
بدل كده بيشتغلوا وبيتحركوا بالكلام القليل والشغل الكتير والشكوي القليلة وبيكونوا كمان راضيين أكتر، القايمة دي ممكن تكمل بس المهم من الدرس ده إننا نفهم إن عقلية الفوز وعقلية الضحية مش بيقدروا يتوافقوا مع بعض. عشان توصل للمنطق ده، لازم تمارس النية الحقيقية في حركاتك، ولما تكون ناوي في أفعالك، مبتمشيش في الحياة زي الروبوت وتستنى الحاجات تحصل ليك لوحدها، لازم تحددها بنفسك. ازاي؟ بإنك تاخد إجراءات وتتحكم في قراراتك.
زي أي حد تاني، هتبقى لازم تحدد قراراتك، فلازم تفكر فيهم كويس وتكون واثق في اختياراتك، واحدة من الطرق إنك تبدأ تحدد فيها الأمور المالية بدل من الاعتماد على الحظ، هي إنك تبدأ تخطط للمستقبل وتعمل خطة للتوفير وخطة للتقاعد وخطة للاستثمار.
مش تكون بتتغنى بالفقر وتستنى تكون غني بعد كده، اشتغل عشان تكون كدة، زي ما بتشتكي من نقص الفلوس، بتقدر تبدأ توفر شوية فلوس من اللي بتشتغل عليها بتعب، والأفضل تخلي الفلوس دي تشتغل علشانك، حدد أهدافك وشوف إيه الأهداف الفرعية اللي متحتاج تحققها، عشان تكون عندك خطة واضحة، بمعنى تاني ابدأ حدد قراراتك وسيبك من منطق الضحية.
نصيحة أخيرة
الكتاب ده بيفتح الطريق للشخص العادي اللي بيعاني في الحياة، واللي بيفكر إن الاستقلال المالي دا حاجة غير ممكنة ولا بيعرف ازاي يخلص من تفكيره السلبي، لو عايز تعرف ازاي تكون من المليونيرات، وازاي الفلوس بتشتغل لصالحك، وازاي دماغ المليونيرات بتفكر، حاول تقرأ الكتاب ده. الكتاب بجد بيشرح بشكل مفيد وعميق ازاي الأشخاص الناجحين بيفكروا وبيعيشوا، وإن المليونيرات مش دايمًا بيكسبوا فلوس كتير، كمان بيديروا وبيوفروا بعقلانية.
مهم: ملخص كتاب Millennial Money Makeover – كونور ريتشاردسون
الملخص مفيد للشخص اللي بيعيش من راتب لراتب وعايز يخلص من دورة الفقر دي، والشخص اللي جاهز وعايز يبدأ بفلوسه، واللي محتاج يطور مهاراته ويتعلم نصايح تفيده وتفيد الناس.