ملخص كتاب Cryptocurrency Investing For Dummies – كيانا دانيال

الكتاب ده دليل عملي على طريقة البدء في استثمار العملات الرقمية المشفرة، وعمل صفقات مالية بدون وسيط أو سمسار وتوضيح معنى العملات الرقمية وكيفية اختيار الأفضل من بين كل العملات الموجودة في السوق، كل ده هتقدر تتعرف عليه من خلال شرحنا لملخص كتاب Cryptocurrency Investing For Dummies.

العملات الرقمية مصممة عشان تتخلص من الوسطاء وتخلق أسواق جديدة، وكمان تقدر تطلق عملات رقمية تانية، “الإيثريوم” هي واحدة من أكبر العملات الرقمية في الفئة دي.

“كيانا دانيال”

إقرأ المزيد: ملخص كتاب The Snowball – السيرة الذاتية لـ”وارن بافيت”

أهمية العملات الرقمية

أكيد سمعت عن العملات الرقمية؟ وبتشوف إن الناس اهتمامها بيزيد بالعملات الرقمية، وده بيخلي فكرة إنها مجرد موضة مؤقتة هتقل بالتدريج، الشركات بدأت تبني منصات رقمية وبتستخدم العملات الرقمية كجزء أساسي في وظائفها، وده بيخلي فائدة العملات الرقمية حاجة حقيقية وواقعية.

مش لازم أقول إن العملات الرقمية موجودة وهتفضل فترة طويلة، ومفيش وقت أحسن من دلوقتي عشان نتعلم أكتر عن الموضوع ده، ليه؟ عشان الناس اهتمامها بيزيد بنظام الدفع الالكتروني بدل البنوك، وبالمنصات اللي بتركز على تجربة المستخدم بدل النظم الإدارية، وكمان عشان دفع الفلوس أونلاين بطريقة أسرع وبأقل عمولة.

أكيد العملات الرقمية بتخلينا نحقق كل ده وأكتر، التكنولوجيا الجديدة دي بتحقق تقدم عظيم في الاقتصاد وبتخليه أكتر أمان وسرعة، وعشان كدا الاستثمار في الأصول الجديدة دي يستحق على الأقل اننا نجرب، منين نبدأ؟ كتاب “Cryptocurrency Investing For Dummies” للكاتبة “كيانا دانيال” موجود فيه الإجابة على السؤال ده وكل الأسئلة اللي هتيجي في بالك بخصوص العملات الرقمية.

أهم 3 دروس من كتاب Cryptocurrency Investing For Dummies

• دايمًا لازم تقّيم مستوى المخاطرة واحتفظ بصندوق طوارئ جاهز.
• افهم مبادئ تقنية “Blockchain”والعقود الذكية عشان تعرف الاستثمارات الصح.
• التنويع في الاستثمار بيكون ناجح في الفترات اللي فيها مشاكل مالية.

طبعًا في حاجات تانية كتير لازم تدرسها وتعرفها لما تيجي تفكر في العملات الرقمية، بس الدروس دي هتساعدك تعرف أكتر، يلا بينا مع التفاصيل!

الدرس الأول: الاستثمار في “الكريبتو” مش بسيط، فاستعد نفسيًا وماديًا للمخاطرة

التقلبات السعرية من أهم الحاجات اللي لازم تفكر فيها لما تستثمر في العملات الرقمية “الكريبتو”، سعرها بيتغير بشكل كبير حتى في فترات قصيرة جدًا، ممكن في يوم واحد وممكن خلال شهور أو سنين، فبلاش تدّخل المشاعر في الاستثمار عشان مش تاخد قرارات غلط ومتسرعه وركز على المدى البعيد، الكلام ده مش هيفيد صحتك بس لأ كمان فلوسك مع الوقت هتظهر بقوة في المشاريع الكبيرة والموثوق فيها.

قيمة العملة بتتحدد بناءًا على توجه السوق، لو الناس بتبيع أكتر ما بتشتري السعر هينزل والعكس صحيح، بس المشكلة إن السوق مش دايمًا منطقي، ممكن يتجاهل الصورة المنطقية ويتفاعل بشكل قوي مع الأخبار والأحداث وكمان مع التغريدات على تويتر والسوشيال ميديا في الفترة الأخيرة، بس المستثمر الذكي في السوق بيعرف إن لو سعر العملة اللي معاه متغيرش، مفيش داعي للبيع السريع.

ده بيودينا لفكرة تانية إن دايمًا لازم تحط فلوسك في أصول ليها قيمة، زي العملات اللي وراها فريق إدارة كويس وليها حلول لأي مشكلة حقيقية وليها عرض وطلب، عمومًا مش هتكون عايز تخاطر بفلوسك اللي كسبتها بصعوبة في استثمار في أي عملة ملهاش قيمة، عشان ممكن يحصل انخفاض كبير في سعرها فجأة.

في الحقيقة، المنطق بيقول إنك تستثمر المبلغ اللي لو خسرته متزعلش عليه وميأثرش عليك، والاستثمار المثالي إنك تعمل صندوق طوارئ يكون فيه ما بين 3 لـ 6 شهور من مصاريفك المستقبلية وتستثمر الباقي، حلل قيمة العملة بشكل صحيح ومش تعتمد على توجه السوق، طالما إن الرمز أو “Token” اللي معاك مش بيتغير في قيمته الأساسية هتكون كويس في المدى البعيد.

الدرس التاني: تقنية الـ “Blockchain” والعقود الذكية بتحل مشاكل حقيقية

الـ “Blockchain” ببساطة هي تكنولوجيا لتسجيل التعاملات الرقمية، وهي الأساس لكل العملات الرقمية وبالأخص “البيتكوين” اللي كانت أول عملة رقمية ولسه هي الأكتر شعبية في السوق، ازاي وصلت للشهرة دي؟ ببساطة، الناس فهموا الفكرة الذكية ورا “البيتكوين” وهي تقنية سلسة الكتلة أو Blockchain.

التكنولوجيا دي عبارة عن نظام رقمي مميز بيسمح للمستخدمين بتداول وتخزين المعلومات بشكل آمن وفعال، المعلومات بتتحط في “بلوك” وبيتم إضافتها على “البلوكات” القديمة بمجرد ما يتم ملي البلوك بالبيانات وده اللي بيشكل سلسلة الكتلة، وبيمنع الجهات المركزية من التلاعب بالبيانات وإن يحصل أي أخطاء، وبيتم بنائها بشكل يخدم المستخدم.

هتشوف ازاي تكنولوجيا الـ Blockchain هي براءة اختراع حقيقية بتحل مشكلة في الحياة العملية وبتخلي من المستحيل إن الناس يرتكبوا احتيال أو أخطاء، وده اللي بيدّخلنا على العقود الذكية، وهي زي العقود العادية بالظبط، العقود الذكية هي عبارة عن اتفاقية بين طرفين على الالتزام بإجراء معين، العقود الذكية بتساعد المستخدمين في تنفيذ شروط وأحكام العقد بتلقائية.

الدرس التالت: استخدم التنويع في الاستثمار لصالحك

التنويع هو أحسن حاجة تقدر تعملها عشان تخفف الخساير اللي عندك، ليه؟ عشان لما تشتري أنواع أصول مختلفة وحتى أصول تانية من نفس النوع، احتمالية إن سعرها ينزل في نفس الوقت بتقل، يعني لو استثمار واحد قدامك نزل، ممكن تلاقي استثمار تاني يكون أحسن ويخفف الخسارة، يعني حاجة بتعوض حاجة.

الكاتب بيقصد بالتنويع إنك تشتري أصول غير “الكريبتو”، عشان السوق متقلب، فخطر إن السعر ينزل بنسبة كبيرة في أي وقت موجود، وعشان مش تعاني من خساير كبيرة وتضيع أي فرص في أسواق تانية لازم تفكر في الأسهم أو المؤشرات المتداولة أو السندات، أو حتى العقارات.

حتى لو كنت مستثمر بتخاطر بنسبة عالية، لازم تهتم بتأمين ممتلكاتك الاول، عشان كدا من المهم إنك تخلق محفظة آمنة على الإنترنت، المحافظ بتساعدك تخزن العملات الرقمية بشكل آمن وتسحبهم لما تحتاجهم، اختار منصات محترمة فيها ملايين المستخدمين واقرأ الآراء عنها قبل ما تستثمر في أي تطبيق للمحفظة.

نهاية ملخص كتاب Cryptocurrency Investing For Dummies

الكتاب ده مرجع مفيد جدًا للي عايز يفهم ويستثمر في العملات الرقمية، الكتاب بيشرح بطريقة سهلة ومُبسّطة كل حاجة عن العملات الرقمية، زي البيتكوين والإيثيريوم والكريبتو وغيرها، بيوضحلك أهمية التكنولوجيا اللي وراء العملات الرقمية وكيفية استخدامها بشكل آمن.

كمان الكتاب بيديك أدوات واستراتيجيات مهمة للتداول والاستثمار في العملات الرقمية، وبيوضح طرق تحليل السوق واختيار العملات المناسبة للتداول، وبيشرحلك ازاي تعمل محفظة رقمية آمنة عشان حفظ العملات الرقمية الخاصة بيك، الكتاب هيساعدك تكون مُلم بكل جوانب العملات الرقمية وتكون قادر تستثمر فيها بثقة.

مهم: الاستثمار المخاطر: نصائح هامة لرواد الأعمال

ممكن نرشح الملخص ده للشاب اللي مهتم بالاستثمار في التكنولوجيا الجديدة، أو المدير المالي اللي عايز يوسّع محفظته التقليدية بالاستثمار في العملات الرقمية المشفرة، أو الشاب اللي بيتداول بكل وقته وعايز ينّوع استثماراته.