ملخص كتاب Common Stocks and Uncommon Profits – فيليب فيشر
كتاب “الأسهم العادية والأرباح غير العادية” بيوجه الناس للنجاح في الاستثمار عن طريق شرح طرق تحليل الأسهم، وفهم السوق وأخد قرارات استثمارية ذكية ومنطقية والربح منها عن طريق الصبر على السوق والاستثمار لفترة طويلة. كتاب Common Stocks and Uncommon Profits بيقولك عشان تستثمر محتاج يكون عندك اساسيات التداول في البورصة، وعقلانية في القرارات، وده بيسمح للمستثمرين يستفيدوا من السوق، ويحافظوا على فلوسهم للمدى البعيد بدل ما يدخلوا في مشاريع فيها مخاطرة كبيرة ويخسروا فلوسهم.
المستثمر الناجح في الأغلب هو شخص مهتم من جواه بمشاكل البيزنس.
فيليب فيشر
إقرأ المزيد: ملخص كتاب The Little Book of Common Sense Investing للخبير المالي جون بوجل
مقدمة الكتاب
أفضل طريقة عشان تبدأ الاستثمار هي فهم المفاهيم والفلسفة اللي بتدير السوق المالي، على الرغم من إن السوق مستمر في التطور بس المفاهيم الأساسية للسوق زي ما هي، وقيمة الشركة الجوهرية بيتم تحديدها من خلال أساسياتها، في الوقت اللي سعر السهم فيه بيعتمد على معرفة المستثمرين للشركة والتغيرات اللي بتحصل في السوق بسبب أحداث خارجية أو تغيرات في الإدارة والتغيرات السوقية وغيرها.
كتاب “Common Stocks and Uncommon Profits” لـ “فيليب فيشر” بيقدم طريقة كويسة عشان تفهم ازاي البورصة بتشتغل، وتحديد الاستثمارات اللي ليها قيمة، الكتاب ده مش هيعلمك ازاي تكون غني بسرعة وتبعد عن الشغل المتعب بس، ده كمان هيوفرلك مجموعة من الدروس القيمة عن ازاي تنمي ثروتك وتحافظ عليها لضمان حياة مالية آمنة.
دروس مهمة من كتاب Common Stocks and Uncommon Profits
- لازم تحلل السهم والشركة اللي هتستثمر فيها بطريقة شاملة قبل ما تستثمر فيه.
- لما ينخفض سعر السهم، ده الوقت المناسب للشراء.
- الأفضل تدور على شركات كبيرة ومستقرة، ويكون هدفك تحقيق أرباح ثابتة على المدى البعيد.
يلا بينا نشوف التفاصيل!
الدرس الأول: لازم تحلل السهم والشركة اللي هتستثمر فيها بطريقة شاملة قبل ما تستثمر فيه
أكيد مش هتقدر تحط فلوسك في شركة قبل ما تعمل بحث شامل عنها، تبدأ ازاي ومنين؟
- أول حاجة اعمل قائمة بالشركات اللي عايز تدرسها، وكمان دور عن أسماء شركات في المجال اللي انت فاهم فيه أو شغال فيه.
- تاني حاجة لازم تختار الشركة اللي هتدرسها بطريقة شاملة من كل النواحي، هتحتاج تدرس نشاط الشركة وتحلل الصناعة، ومنافسينها وعملائها الرئيسيين وازاي بتدير فلوسها، كل ده مش سهل تحليله، بس بالكلام مع الأشخاص اللي جوه الشركة وتاخد معلومات منهم، وكمان ممكن تستخدم طريقة “Scuttlebutt” ودي بتكون أكتر كفاءة.
“Scuttlebutt” معناها الاتصال المباشر بأصحاب المصلحة ومعرفة المعلومات منهم بشكل مباشر، بالطريقة دي هيكون عندك فكرة صح عن الشركة، بس المشكلة إنها بتاخد وقت كبير عشان تختار الأسهم الصح للاستثمار فيها.
- لما تختار الشركة اللي هتستثمر فيها، اتأكد من كفاءة الإدارة ومدى استثمارها في البحث والتطوير، عشان تعرف لو كان عندهم رؤية للمستقبل من خلال خطوط إنتاجهم وخدماتهم، كمان اتأكد من سمعتهم ومدى رضا الموظفين والعملاء، عشان تعرف اذا كانت الشركة قوية ولا ضعيفة.
الدرس التاني: لما ينخفض سعر السهم، ده الوقت المناسب للشراء
بشكل أساسي الاستثمار بيدور بين الشراء والبيع وده أكيد، وأفضل طريقة لزيادة ثروتك هي شراء سهم لما يكون سعره منخفض، بعد كدا تقدر تبيعه في وقت تاني لما يحصل زيادة في السعر، على الرغم من إن ده شكله واضح وسهل، بس هتتفاجئ لما تيجي تطبق الكلام دا بشكل عملي.
الأسهم لما بتنزل الناس بتخاف على فلوسها في البورصة، خوفهم ده بيخليهم يبيعوا الأسهم ويوقفوا الصفقة بالخسارة، بس غالبًا الأسعار بتزيد والأسهم بترجع قوية، والمستثمر العادي بيخاف يفوت الفرصة تاني ويحاول يدخل في الصعود الجاي، وده كمان بيسبب خوف من ضياع الفرصة، والعملية دي بتتكرر كتير، خوف وقلق واللي بيخليك متعرفش تاخد القرار الصح بسبب تقلب السوق المستمر.
الموضوع ده بيخلق أسهم مرتفعة القيمة أو منخفضة القيمة في السوق، كمستثمر للأجل البعيد لازم تبص دايمًا للمستقبل واصبر على السوق وانت هتكسب، واعرف إن السوق غير منطقي وبيتصرف دايمًا على أحداث قصيرة المدى، مثلا شركة مشهورة ممكن تقلل أرباحها بسبب مصاريف قسم البحث والتطوير، وعلى الرغم من إن ده هيكون في صالح الشركة بعد كدا، المستثمرين مش بيشوفوها كده.
خليك خايف لما يكون الناس طماعين، وطماع لما يكون الناس خايفين.
وارن بافيت
لو دخلت في السوق في الوقت المناسب، ممكن تزود ثروتك بشكل كبير، وبعدين خلي تركيزك في الأوقات اللي السوق بينخفض فيها، عشان دي بتكون فترات مؤقتة، وخلي تركيزك على المدي البعيد وانت تكون كسبان.
الدرس التالت: دور على شركات كبيرة ومستقرة، وخلي هدفك تحقيق أرباح ثابتة على المدى البعيد
البعض بيفضل التداول في البورصة عن طريق شراء وبيع الأسهم، والبعض بيفضل يستثمر في الشركات عن طريق صناديق الاستثمار مثلا ويستفيد من توزيع أرباح الشركة، النصيحة الأفضل إنك تحاول تحتفظ بموقعك في السوق، عشان السوق غير منطقي ومنحاز للمدى القصير.
يعني بدل ما تحاول تشتري في وقت الانخفاض وتبيع في وقت الارتفاع وده صعب تلاقيه، خلي فلوسك مستثمرة في الشركات اللي عملت ليها تحليل كويس، وحدد توقيت دخولك للسوق لما تشوف انخفاض كبير من غير سبب جوهري والسوق بيتصرف بشكل غير منطقي.
المقصود بالسبب الجوهري هو تغيير في أساسيات الشركة، هدفك إنك تستثمر في شركات كبيرة ومستقرة، بصافي أرباح عالية مقارنة بإيراداتها التشغيلية وموظفين راضيين وعملاء موجودين بشكل ثابت، وحاول تستثمر في الشركات اللي عندها براءات اختراع وآليات توزيع واسعة في كل المجالات، الجوانب دي ليها قيمة في أي تحليل عشان بتحدد مش بس القيمة الحالية للشركة وكمان القيمة المستقبلية.
نهاية ملخص كتاب Common Stocks and Uncommon Profits
الكتاب بيضيف قيمة كبيرة عن البورصة وتحليل الاستثمارات المحتملة، وبيقدم للمبتدئين والمتوسطين كل المعلومات اللي محتاجينها عشان يدخلوا المجال، ولو عايز تجمع وتحافظ على ثروتك مع الوقت، الكتاب ده هيفيدك جدًا، الاستراتيجيات اللي مقدمها الكتاب اتجربت ونجحت مع الوقت، فبقت مفاهيم دايمًا بيدرسها ويطبقها كل المستثمرين.
مهم: ملخص كتاب Charlie Munger عن الملياردير تشارلي مونجر
الكتاب لأي شاب عايز يتعلم أكتر عن البورصة، أو الطالب اللي عنده دراسة في المالية والبيزنس وعايز يزود معرفته في المجال ده، والشخص اللي بيستعد عشان يبدأ يجهز صندوق التقاعد وبيدور على طرق للاستثمار في فلوسه اللي جمعها لحد دلوقتي.