إزاي تدير يومك بدون تضييع وقت ؟ ازاي تنظم يومك وتدير وقتك بأفضل صورة
ادارة يومك وتنظيم وقتك من العوامل المهمة اللي هتساعدك تنجح في حياتك وخاصةً بالوقت الحاضر بعد ما زادت وسائل الترفيه اللي بدأت في اهدار الوقت وعدم استغلاله بشكل صحيح والاستفادة منه، عشان كده هنعرفك النهاردة علي إزاي تدير يومك بدون تضييع وقت، كذلك هنوضحلك الخطوات اللي هتساعدك علي كده.
إزاي تدير يومك
هنتعرف علي الخطوات اللي لازم تعملها عشان تقدر تستفيد من يومك وتديره كويس جدا بأفضل شكل ممكن.
إزاي تدير يومك بدون تضييع وقت ؟
دي الحاجات اللي لازم تخلي بالك منها وتراعيها عشان تدير يومك :
- حدد إنت محتاج تنام كام ساعة ؟
- شوف هتعمل ايه لما تصحي ؟
- إظبط المنبه بتاعك.
- فّوق نفسك.
- قلل الكافيين (المنبهات).
- خدلك تغفيله.
- نام كويس.
حدد إنت محتاج تنام كام ساعة
الدرسات اللي إتعملت في تقدير معدل النوم اللي محتاجه الإنسان مش ثابته، وكل يوم يطلع دراسة جديدة.
يعني في دراسات بتقول إن جسم الإنسان محتاج 6 لـ8 ساعات.
كذلك في دراسات بتقول من 7 لـ9 ساعات، وفي قالوا إن كل شخص مختلف عن التاني.
يعني ممكن واحد يكون كفايته من النوم 8 ساعات بس ويكون مرتاح أوي علي كده،
الخلاصة: جسمك علي حسب ما تعوده، عودته ينام 6 ساعات هينام 6 عودته علي 9 ساعات هينام 9 وده بيحصل تدريجي مش مره واحده وفي ناس بتنام 4 ساعات بس بالمناسبة.
شوف هتعمل ايه لما تصحي
يعني تكون محدد مهام تعملها مش فكرة إنك صحيت بدري وخلاص.
لازم يكون وراك حاجة تعملها، كل ليلة راجع علي خطة اليوم اللي بعده والمهام اللي هتعملها وهكذا.
كذلك الخطة دي هتديك دافع إنك تصحي في معادك بدون تردد.
وقبل ما تحدد المهام اللي المفروض تعملها إفهم وإعرف قدراتك كويس، يعني مش تيجي تعد علي نفسك مهام كتير،
وليكن مثلا 8 مهام بحجة إنك عايز تنجز حاجات كتير وإنت قدارتك أساسا مش تشيل أكتر من 3.
بنكرر تاني: إنت بتحدد المهام اللي هتقوم بيها بناءا علي وقتك وقدراتك.
إظبط المنبه بتاعك
المنبه هيساعدك تصحي في معادك بالظبط، المهم إنك تقوم فعلا أول لما يضرب مش تفضل تأخر المنبه أو تظبطه علي مواعيد تانية، قوم من السرير علي طول أول ما يضرب مش تدي فرصة لنفسك للكسل
فّوق نفسك
كذلك عشان مترجعشي تنام من تاني قوم وضب سريرك وإعمل 10 دقايق شوية تمارين تساعدك تصحصح،
وإتوضي وصلي الفجر وإفطر وإشرب كوباية الشاي بتاعتك وإبدأ يومك.
قلل الكافيين (المنبهات)
زيادة المنبهات طول اليوم مش كويسة وليها أثار سلبيه علي صحتك وجسمك فحاول تقللها ومتعودش نفسك عليها وفي الليل إشرب حاجات مهدئه تساعدك علي النوم زي اللبن أو الأعشاب.
خدلك تغفيله
كذلك القيلولة مهمة جدا للجسم والعقل هتخليك تقدر تكمل يومك بنفس نشاطك في بداية اليوم.
كمان هتبقي فايق وتعرف تركز، وخد بالك القيلولة لمدة طويلة هتحسسك بتعب وخمول وغالبا مش هتعرف تكمل يومك بنشاط.
نام كويس
إعمل الحاجات اللي هتخليك تنام نوم هادي وعميق زي :
- متكترش ف العشاء وحاول تنام خفيف.
- كذلك إبعد عن الفون والتليفزيون واللاب قبل النوم مباشرة.
- شغل قرآن بصوت هادي.
- إطفي النور.
- إبعد عنك أي مصدر ممكن يسببلك قلق وإنت نايم.
- كذلك خلي في مصدر لإضاءة طبيعية بحيث ضوء النهار يدخلك منه ويصحيك في معادك.
والمجهود اللي هتعمله في المهام بتاعتك في خلال اليوم هيخليك تنام في معادك ومش هتاخد وقت في النعاس وتفكير قبل النوم، لأنك هتكون تعبان وهتروح في النوم علي طول.
أهم حاجة تكون واقعي وإنت بتخطط ليومك وعلي حسب قدراتك حدد عدد المهام بتاعتك، المهام دي هي اللي هتخليك تصحي بدري وتديك دافع إنك تقوم من النوم وحاول تحفز نفسك بإستمرار ممكن تقرأ حاجات تديك دافع إنك تكمل أو تسمع فيديوهات تحفيزية أو إنك تتكلم مع أشخاص بتقدر تنجز حاجات في حياتهم.
كذلك ممكن تتعرف علي مواضيع أكتر عن إزاي تدير يومك من خلال قسم :
انضم لينا بردو علي صفحة الفيس عشان تكون علي علم بموضوعاتنا الجديدة أولًا بأول :