أسرار تداول البورصة من خبير السوق مارك دوجلاس
![أسرار تداول البورصة من خبير السوق مارك دوجلاس](https://bashmohasb.com/wp-content/uploads/2023/04/أسرار-تداول-البورصة-من-خبير-السوق-مارك-دوجلاس.jpg)
المتداول مش بس بيشتري ويبيع، في جانب نفسي للمتداول قليل اللي بيهتم بيه، وهو اللي بيأثر بشكل كبير على أي نتيجة للتداول، الجانب النفسي ده بيفرق جدا بين متداولين مستخدمين نفس الإستراتيجيات ونفس الأدوات، عشان كده لازم نفكر ديما في الجانب النفسي ونقرا عنه أكتر، وفي تدوينة النهاردة هنتكلم عن نصايح و أسرار تداول البورصة من خبير السوق مارك دوجلاس ، واللي عمل كتاب اسمه “التداول في المنطقة“.
إقرأ المزيد: أفضل الشركات للاستثمار: كيفية تحليل Market Share و Industry Trends
5 نصائح من مارك دوجلاس لتداول ناجح في الأسواق المالية
النجاح في التداول بيعتمد على الفهم والتعلّم من الأخطاء
النجاح في التداول مش محتاج إنك يكون عندك ذكاء عالي أو شهادات عالية زي الماجستير، المهم إنك تفهم كويس وتقدر تتعلم من أخطائك وتصححها، ده اللي بيساعدك تبني عقلية متداول ناجح.
التفكير الصحيح في التداول، تداول بناء على الاحتماليات
مش دايما كلامك صح، كام مرة بتكون عامل تحليل لسهم أو عملة وشغلت عقلك بالتفاصيل، واخترت إتجاه الصفقة، بس للأسف حصل العكس وخسرت، بتفكّر كتير إن السوق ضدك وفي مؤامرة كبيرة بيتلاعبوا فيها بحسابك واللي بيتداول في المنصة يوميا مليارات، فأكيد تفكيرك ده مستحيل يحصل، لازم تفكر دايما إنك بتتداول على أساس الاحتماليات، وإنّ تحليلك ودراستك للسوق هي بس وسيلة عشان تزود احتمالية حدوث السيناريو اللي بتتوقعه، وبردو مش بالضرورة يحصل.
فكر في الصفقات بتاعتك زي ماهي، سلسلة بتكمل بعضها، فيه صفقات هتخسر وفيها صفقات هتكسب، المهم إنّك تطلع في النهاية بربح، وتنسى كلمة “صفقة كاملة” أو “صفقة بدون خسارة”، ومش تغامر وتخاطر بفلوسك في صفقة واحدة، انت مش دايما على حق.
السيطرة على الجانب النفسي في التداول الناجح
![أسرار تداول البورصة من خبير السوق مارك دوجلاس](https://www.bashmohasb.com/wp-content/uploads/2023/04/السيطرة-على-الجانب-النفسي-في-التداول-الناجح.jpg)
التداول بيديك فرصة تختبر فيها قدراتك اللي ممكن تكون بعيده تمامًا عن روتين حياتك اليومي، أهم حاجة هي قدرتك علي التحكم في نفسك وتكون سيد نفسك قدام الـChart، يعني انت اللي تحدد تشتري ولا تبيع ولا تخرج دلوقتي ولا تستنى أكتر عشان تزود أرباحك، فيه ناس بيدوروا على طريقة تداول تديهم أوامر دخول وخروج وبس، مش بيعملوا حساب الجانب النفسي اللي لازم تكون قوي فيه وتتحكم في مشاعرك، سواء كانت مشاعر سلبية في الحياة العادية أو اتنقلت للتداول زي القلق أو الخوف من الخسارة، فلو هتتعلم تتحكم في نفسك وقراراتك وأفكارك، هتكون قادر تتحكم في أي موقف ممكن يحصل في السوق.
ونصيحة، لو مش في مزاج كويس أو عندك مشاكل شخصية، مش تتداول في اليوم ده، مش تجيب مشاكلك معاك للـ Chart، عشان هتأثر بالسلب على قراراتك، السوق مستمر وهيبقى في فرص كتير، فمش تقلق إنك تفوت فرصة، بس خلي بالك إن الأهم هو إنك تحافظ على نفسيتك وتحسنها علي قد ما تقدر، عشان تكون جاهز لمشوار التداول وتحقق أرباح أكتر.
مفيش حاجة ممنوعة ولا مضمونة، بس لازم يكون فيه خطة تداول
مفيش حاجة ممنوعة في البورصة، كل حاجة ممكن تحصل ومفيش حاجة مضمونة، كل لحظة فيها شروطها ونتايجها، زي ما قولنا في النقطة اللي فاتت إننا بنتداول على أساس الاحتمالات ولازم نكون مستعدين إن الأمور ممكن تمشي ضد ما إحنا عايزين، قدرتك على وضع خطة تداول محكمة والالتزام بيها عشان تحمي نفسك في الأوقات اللي قرارك هيخونك، هي الخدمة الأهم اللي ممكن تقدمها لنفسك وده سر نجاح كتير من المتداولين اللي بيتداولوا من سنين كتير رغم كل التقلبات اللي حصلت في السوق، وعشان كده دايما لازم تكون مستعد لفشل رؤيتك وانعكاس السوق عليك.
التداول في الأسواق المالية عاوز صبر قبل ما توصل للأرباح
لازم تدي لنفسك الوقت الكافي عشان تحترف التداول قبل ما تحكم على السوق إنه مش بيديك فلوس، مش تفكر إن السوق بيتعامل بسهولة، ولا إنك تقدر تفتح حساب وتلاقي طريقة تداول تجيبلك بيها إشارات بيع وشراء وخلاص، لا الموضوع بيحتاج لمجهود ووقت وتعليم وخبرة عشان توصل لنتيجة ترضيك، والنجاح مش بيجي في يوم أو اتنين، بيجي بالتجربة والتعليم والتطوير.
فكر في الموضوع ده قبل ما تحكم على حد بالفشل، ومش تنسى إن التداول في الأسواق المالية مش بيختلف عن أي مجال تاني، لازم تمر بمراحل من التعليم والتجربة واكتساب الخبرة الكافية عشان تقدر تحقق الأرباح، والصبر على التعلم هو سر النجاح، وحاول تستفيد من تجارب الناس اللي قبلك، عشان توصل لأهدافك بسرعة ونجاح.
مهم: نفسية المستثمر في سوق المال: ليه الأمل والتفاؤل بيخليك تحقق أرباح
في النهاية
كان فيه واحد كان بيتداول في البورصة، بيشتري وبيبيع بس بطريقة معينة، بيحط خط واحد اسمه “الترند”، ولما السعر بينزل لتحت الخط في الاتجاه الصاعد بيشتري، ولما يطلع فوق الخط في الاتجاه الهابط بيبيع، السر اللي بيستخدمه مش كان الأداة اللي بيستخدمها بس، لكن كما كانت نفسيته وقدرته على الاستفادة من الفرص المناسبة والخروج بربح في النهاية بعد التداولات الكتير خلال الأسبوع أو الشهر.
النصايح اللي في التدوينة دي من مارك دوجلاس بتبين إن العامل الأساسي في نجاح التداول هو الشخص نفسه، مش الأدوات اللي بيستخدمها.